"პრემიერი უნდა გადადგეს" - აქცია საქართველოს პარლამენტთან
მრავალრიცხოვანი აქცია მიმდინარეობს საქართველოს პარლამენტის შენობასთან, მთავარი მოთხოვნაა – გადადგეს საქართველოს პრემიერ-მინისტრი ირაკლი ღარიბაშვილი.
მიტინგი სპონტანურად, ფეისბუკზე დაიგეგმა სამოქალაქო აქტივისტების და ჟურნალისტების მიერ მას შემდეგ, რაც ცნობილი გახდა, რომ გარდაიცვალა ლექსო ლაშქარავა, ტვ “პირველის” ოპერატორი, რომელიც სასტიკად სცემეს 5 ივლისის თბილისში ჰომოფობიური ჯგუფების მიერ გამართული აქციის გაშუქების დროს.
აქციას რიგით მოქალაქეებთან ერთად შეუერთდნენ ოპოზიციონერი პოლიტიკოსები, უფლებადამცველები.
რუსთაველზე შეკრებილი ადამიანები მიიჩნევენ, რომ 5 ივლისის ძალადობა ხელისუფლების მიერ იყო წაქეზებული და სამართალდამცავების არასაკმარისი მობილიზაციის გამო ძალადობრივმა ჯგუფებმა რამდენიმე ათეული ადამიანის დაშავება მოახერხეს.
რუსთაველის გამზირზე ავტომობილების მოძრაობა შეზღუდულია – მომიტინგეებმა გზის სავალი ნაწილი გადაკეტეს.
გამომსვლელთა შორის ძირითადად ჟურნალისტები იყვნენ.
_____________________________________________________
- ნადირობა მედიაზე. პრაიდის საწინააღმდეგო აქციაზე ოცზე მეტი რეპორტიორი მძიმედ დაშავდა
- ჰომოფობების ცეკვა პარლამენტთან. ფოტორეპორტაჟი
- პრემიერის განცხადების შემდეგ ჰომოფობიურმა ჯგუფებმა ოპოზიციის კარვები დაარბიეს
__________________________________________________
“ჟურნალისტები ამ მოედანზე ყოველთვის მოვდიოდით იმისთვის, რომ გაგვეშუქებინა აქციები, საქართველოს ხელისუფლებამ ნაბიჯ-ნაბიჯ მიგვიყვანა იქამდე, რომ დღეს ჩვენ ვატარებთ საპროტესტო აქციას და ჩვენ ამ საქმეს მივიყვანთ ბოლომდე. არავინ იფიქროს, რომ ეს არის ერთდღიანი შეკრება. ჩვენი ბრძოლა გაგრძელდება მანამდე, სანამ პასუხს არ აგებენ მკვლელობისთვის. ბიძინა ივანიშვილს აქვს საფიქრალად დრო დილამდე. ღარიბაშვილი აღარ არის დღევანდელი დღიდან პრემიერ-მინისტრი, ის არის არალეგიტიმური პრემიერ-მინისტრი და ის უნდა წავიდეს”, – განაცხადა აქცია ტვ “ფორმულას” ჟურნალისტმა ვახო სანაიამ, რომელსაც მიტინგი მიჰყავდა.
“დღეს ამ ხელისუფლების მოქმედებითაც და უმოქმედობითაც მეტირება მთელი დღეა. ამ ქვეყნიდან წავიდა დაღლილი, მშრომელი, ნაცემი, ნაგვემი, გულნატკენი ბიჭი. მთელი 9 წელი გვამადლიან, გვაყვედრიან და სპეკულირებას ეწევიან წინა 9 წლის თარიღებით, რომელიც მათ არ გადაუტანიათ და მე იმ წინა 9 წელს დაზარალებული ადამიანი დღეს ვამბობ, თქვენ არანაირი მორალური უფლება არ გაქვთ არცერთ თარიღზე საუბრის. დაკარგეთ ყველანაირი მორალური უფლება. არც გქონდათ, სხვათა შორის. სულ სპეკულირებდით იმ თარიღებით, რომელიც ჩვენი ზურგით გადავიტანეთ და მართლა როგორ მოახერხეთ, რომ სცენაზე ვდგავარ და აი, ამ ბანერის წინ ვარ და მთავრობა უნდა წავიდეს მეთქი, ამას ვამბობ. ყოჩაღ ამისთვის”, – თქვა “ტვ პირველის” წამყვანმა, დიანა ტრაპაიძემ.
სამთავრობო ტელეკომპანია იმედმა მრავალრიცხოვანი აქცია პირდაპირ ეთერში არ გააშუქა.
________________________________________________
- თბილისში პრაიდის კვირეული გაიხსნა. პირველმა დღემ კვერცხების სროლისა და დაკავებების ფონზე ჩაიარა
- რატომ ვერ ჩატარდა ღირსების მარში – რა აჩვენა ამ დღემ?
- როგორ იბრძვის ლგბტქ თემი საკუთარი უფლებებისთვის საქართველოში და რას მიაღწია?
______________________________________________________
5 ივლისს, თბილისში, Tbilisi Pride-ის კვირეულის ფარგლებში ღირსების მარში უნდა გამართულიყო. მსვლელობა რუსთაველის მეტროსთან 18:00 საათზე დაიგეგმა.
საპატრიარქომ მალევე დააანონსა მარშის საწინააღმდეგო აქცია. იგი თავის მხარდამჭერებს ქუჩაში გამოსვლისკენ და ქვეყნის “გაუკუღმართებული ცხოვრების წესისგან” დაცვისკენ მოუწოდებდა.
5 ივლისს ჰომოფობიურად განწყობილი ჯგუფები დილიდან გამოვიდნენ პარლამენტთან. მათ ჯერ პარლამენტთან თვეების განმავლობაში მდგარი ოპოზიციური კარვები დაარბიეს, ხოპლო შემდეგ ამ ამბის გასაშუქებლად მისულ ჟურნალისტებს დაერივნენ.
5 ივლისს თბილისში ნამდვილი ნადირობა მოეწყო ჟურნალისტებზე – რადიკალები 53 ჟურნალისტს დაესხნენ თავს.
შეკრებილ ჯგუფებს ძალადობისკენ მოუწოდებდნენ სასულიერო პირები. “არა ძალადობას კი არა, ვალდებულები ხართ, იძალადოთ სამშობლოსთვის” – ასე მიმართა შეკრებილებს დეკანოზმა სპირიდონმა.
როგორც დამკვირვებლები აღნიშნავენ, მოძალადეთა ქმედებები წააქეზა პრემიერ ღარიბაშვილის მიერ 5 ივლისს გაკეთებულმა განცხადებამ. ღარიბაშვილმა ვითარების შესაძლო გართულებაზე პასუხისმგებლობა დააკისრა არა ძალადობრივი აქციის წევრებს, არამედ “ღირსების მარშის“” ორგანიზატორებს და მოუწოდა მათ, არ ჩაეტარებინათ მსვლელობა რუსთაველის გამზირზე. ღარიბაშვილმა განაცხადა, რომ დაგეგმილი “ღირსების მარში” მისთვის “მიზანშეუწონელი” და საფრთხის შემცველი იყო. ასევე მან თქვა, რომ ღირსების მარშის მიღმა ოპოზიცია დგას.
“ღირსების მარში” გაუქმდა, თუმცა, რუსთაველის გამზირზე ძალადობა კიდევ რამდენიმე საათს გაგრძელდა.
როგორც ჟურნალისტები ამბობდნენ, მთელი დღის განმავლობაში ადგილზე მობილიზებული არასაკმარისი პოლიციელი. ამაზე შს მინისტრმა განაცხადა, რომ იმდენი სამართალდამცველი იქნა მობილიზებული, “რისი საშუალებაც იყო”.
როგორც მედიის წარმომადგენლები აღნიშნავდნენ, ჰომოფობები მათ მიზანმიმართულად დასდევდნენ. ზოგ ჟურნალისტს ქირურგიული ოპერაცია და სერიოზული სამედიცინო ჩარევა დასჭირდა.
მათ შორის იყო ლექსო ლაშქარავა, ტვ პირველის ოპერატორი. ძალადობრივმა ჯგუფები ლაშქარავას და მის კოლეგას, ტვ პირველის ჟურნალისტს მირანდა ბაღათურიას თავს დაესხნენ ორგანიზაციის “სირცხვილიას” ოფისში. როგორც ბაღათურია ამბობს, ლაშქარავას 20 ადამიანი სცემდა. თვითმხილველთა თქმით, მოძალადეებს შორის სასულიერო პირებიც იყვნენ.
ლაშქარავა საავადმყოფოში გადაიყვანეს სახის ძვლების მოტეხილობით, მას ქირურგიული ოპერაცია დასჭირდა.
სამი დღის შემდეგ მან კლინიკა დატოვა. გარდაცვალებამდე ერთი დღით ადრე, 10 ივნისს, იგი ტვ “პირველის” შუადღის გადაცემის სტუმარი იყო, სადაც 5 ივლისის მოვლენები გაიხსენა.
ლაშქარავა 11 ივლისს დედამ საკუთარ ლოგინში გარდაცვლილი იპოვა.
ოჯახის წევრები ამბობენ, რომ ლაშქარავას ცხვირიდან სისხლი სდიოდა. ოჯახის ახლობლების ერთ-ერთი ვერსიაა, რომ იგი მიყენებული დაზიანებების შედეგად, თრომბოემბოლიით გარდაიცვალა.
ახალგაზრდა კაცის ცხედარი კრიმინალისტებმა ექსპერტიზაზე ოჯახის თანხმობის გარეშე გადაიტანეს. მამაკაცის ცხედარი ლურჯ პარკში გახვეული გამოიტანეს სახლიდან, საკაცის გარეშე და სირბილით მიიტანეს მანქანამდე. გარდაცვლილის მიმართ ასეთი მოპყრობა საზოგადოების უკმაყოფილების კიდევ ერთ მიზეზად და სოციალურ ქსელებში განხილვის თემად იქცა.
მომხდართან დაკავშირებით შსს-მ გამოძიება თვითმკვლელობამდე მიყვანის მუხლით დაიწყო.
