„პოლიტიკური ქორწილი“: ცხინვალში წინასაარჩევნოდ შეურიგებელი ოპონენტები გაერთიანდნენ
საარჩევნო ბლოკი სამხრეთ ოსეთში
ცხინვალში საპარლამენტო არჩევნებამდე ორი თვით ადრე შეიქმნა საარჩევნო ბლოკი, რამაც ამომრჩეველთა უმრავლესობაში გაუგებრობა და კრიტიკა გამოიწვია. ამ ყველაფრის მიზეზი კი ის არის, რომ ორი შეურიგებელი ოპონენტი გაერთიანდა პოლიტიკურ ალიანსში.
ესენი არიან ჩრდილოეთ ოსეთის პარლამენტის წევრი, პარტია „ალანიის პატრიოტების“ დამფუძნებელი ძამბოლატ თედეევი და სამხრეთ ოსეთის სახალხო პარტიის ლიდერი სერგეი ხარებოვი.
”მე, ძამბოლატ თედეევს და მის გუნდს ერთი მიზანი გვაქვს – გავაერთიანოთ სამხრეთ ოსეთის მოსახლეობა და ვიმუშაოთ ჩვენი სახელმწიფოს სასიკეთოდ”, – თქვა ხარებოვმა.
ის ამტკიცებს, რომ საპარლამენტო არჩევნებამდე თედეევთან გაერთიანდა მხოლოდ სამშობლოს სიყვარულისა და ხალხისადმი ზრუნვით მოტივით. მაგრამ მის თანამებრძოლებს სახალხო პარტიაში ამის არ სჯერათ.
- სამი დეპუტატი ცხინვალიდან “ქართულ ლობს“ რუსეთის მოქალაქეობის ჩამორთმევაში ადანაშაულებს
- „ჩვენ არაფერი გვქონდა გასაყოფი. რუსი რომ ჩაერია, ყველაფერი მაშინ აირია“. რას ფიქრობენ შიდა ქართლში ოსებთან თანაცხოვრებაზე
- სამხრეთ ოსეთს სურს შეუერთდეს რუსეთს, ამბობენ ადგილობრივი პოლიტიკოსები
მრავალი წლის განმავლობაში სერგეი ხარებოვი იყო თედეევის მთავარი მოწინააღმდეგის, სამხრეთ ოსეთის ყოფილი ე.წ. პრეზიდენტის, ედუარდ კოკოითის გარემოცვის წევრი. ხარებოვის ამჟამინდელმა გადაწყვეტილებამ პროტესტი გამოიწვია ექს-პრეზიდენტისადმი ყველაზე ლოიალურ “სახალხო პარტიის” დეპუტატებში. მის მიერ დაწესებული გაერთიანების წინააღმდეგ პროტესტის ნიშნად, პარლამენტის დეპუტატთა ოთხი წევრიდან სამმა პარტია დატოვა.
„მე ვერ მივიღებ ხარებოვის ამ გადაწყვეტილებას, რომელსაც არ განუხილავს მსგავსი სცენარი პარტიის შიგნით“, – ამბობს ერთ-ერთი მათგანი, ამირან დიაკონოვი, რომელიც თვლის, რომ ეს ალიანსი ვერანაირად ვერ გააერთიანებს ხალხს.
„ეს ალიანსი თავად კოკოითსა და თედეევს შორის რომ დადებულიყო, მაშინ დიახ, ეს მოხსნიდა დაძაბულობას საზოგადოებაში, რომელიც ორი პიროვნების მტრობის გამო იყოფა „კოკოევისტებად“ და „თედეევისტებად“. ეს ზავი რომ ყოფილიყო და კოკოითს და თედეევს ერთმანეთისთვის ხელი ჩამოერმიათ, მაშინ ჩვენც, მათი მომხრეებიც, ასე მოვიქცეოდით.
მაგრამ ეს ასე არ არის და ნაკლებად სავარაუდოა, რომ ასე მოხდეს. სახალხო პარტია ყოველთვის მხარს უჭერდა კოკოითს. და, როგორც ვიცი, თედეევის პარტიის ზოგიერთ ადამიანს არ მოეწონა თედეევისა და ხარებოვის ეს „პოლიტიკური ქორწილი“ – მისი ბანაკიც უკმაყოფილოა.” – ამბობს დიაკონოვი.
პოტენციურ ამომრჩევლებსაც უცნაურად მიაჩნიათ თადეევისა და ხარებოვის ალიანსი.
„ეს არის სუფთა აზარტული თამაში. ხალხზე არავინ ფიქრობს. სერიოზული პოლიტიკოსები აღარ გვყავს. ხალხი არჩევნებზე მხოლოდ ფულს შოულობს. სულ ესაა“, – ამბობს JAMnews-ისთვის საუბრისას ცხინვალის ერთ-ერთი მცხოვრები.
„სახალხო პარტია“ ედუარდ კოკოითის ინტერესებიდან გამომდინარე შეიქმნა და 2009 წელს, მაშინდელ საპარლამენტო არჩევნებამდე, მთლიანად მის კონტროლქვეშ მოექცა.
ლეონიდ თიბილოვის ხელისუფლებაში მოსვლის შემდეგ, სახალხო პარტიის პოზიცია ოდნავ შეირყა, მაგრამ მიუხედავად ამისა, ყოველ არჩევნებზე იგი დამაჯერებლად ლახავდა შვიდპროცენტიან ბარიერს და რჩებოდა პარლამენტში.
ამავდროულად, სერგეი ხარებოვი ბოლო წლებში ძირითადად ჩრდილში რჩებოდა და არ მონაწილეობდა საჯარო პოლიტიკაში, ის ამჯობინებდა მეტი დრო და ყურადღება დაეთმო თავისი ბენზინგასამართი სადგურისთვის და ბიზნესისთვის, ხოლო პარტიის სახელით პოლიტიკურ საქმიანობას ახორციელებდნენ დეპუტატები ამირან დიაკონოვი, ძამბოლატ მედოევი, რობერტ ოსტაევი და არსენ კვეზეროვი, რომლებიც, ისევე როგორც თავად ხარებოვი, ითვლებოდნენ “კოკოითის ხალხად”.
თუმცა, ხარებოვის გარემოცვის წყაროების თანახმად, სინამდვილეში, მასსა და კაკოითს შორის უთანხმოება ჯერ კიდევ 2019 წელს დაიწყო. ან შესაძლოა უფრო ადრეც – 2017 წელს, როცა ხარებოვმა საჯაროდ მოუწოდა თავისი პარტიის წევრებს, მხარი დაეჭირათ ანატოლი ბიბილოვისთვის საპრეზიდენტო არჩევნებში.
რაც შეეხება ძამბოლატ თედეევს, ის ყოველთვის იყო ედუარდ კოკოითის შეურიგებელი ოპონენტი. 2011 წელს თედეევმა წარუმატებლად სცადა საპრეზიდენტო არჩევნებში მონაწილეობა – ბინადრობის კვალიფიკაციის ნაკლებობამ არ მისცა მას კანდიდატად დარეგისტრირების საშუალება. შემდეგ ეს კონფლიქტი გადაიზარდა თედეევის მხარდამჭერების მასობრივ პროტესტში, რომელიც სასტიკად ჩაახშო კოკოითის უშიშროებამ.
საინტერესოა, რომ თავად ედუარდ კოკოითს სიტყვაც კი არ დაუძრავს კოლეგის ქმედებაზე. ყოველ შემთხვევაში, მას ჯერ საჯარო კომენტარი არ გაუკეთებია.
თუმცა, თედეევის გუნდმა, პარტია „ალანიის პატრიოტებმა“ უკვე დაადანაშაულეს კოკოითი „შიდა პოლიტიკური განხეთქილების“ მცდელობაში.
„ედუარდ კოკოითს და მის პოლიტიკურ მხარდამჭერებს არ აქვთ უფლება ხალხის სახელით ისაუბრონ იმ სახალხო პარტიის გაერთიანების წინააღმდეგ, რომელსაც მანამდე აკონტროლებდნენ [მისი] და ალანიის პატრიოტები.
თედეევმა ჩააბარა პოლიტიკური სიმწიფის გამოცდა, ისევე როგორც “სახალხო პარტიის” ლიდერმა სერგეი ხარებოვმა – მან სერიოზული ნაბიჯი გადადგა რესპუბლიკაში შიდა ელიტური დაპირისპირების დასაძლევად და შეურიგდა თავის დიდი ხნის ოპონენტებს.
თუმცა, ყველას არ მოეწონა ეს კონცეფცია. საზოგადოების დაყოფა ჯგუფებად, კლანებად და ა.შ. არის უსაზღვრო შიდაპოლიტიკური განხეთქილების იდეოლოგიური სულისჩამდგმელი.” – წერენ ისინი ტელეგრამზე.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
