საფინანსო სექტორი მინუსშია: პირდაპირმა უცხოურმა ინვესტიციებმა 64 პროცენტით იკლო
პირდაპირი უცხოური ინვესტიცია
საქართველოში პირდაპირი უცხოური ინვესტიციების მოცულობა მიმდინარე წლის I კვარტალში 201.4 მილიონ დოლარამდე შემცირდა, რაც წლიურად 64.4%-იანი კლებაა. საფინანსო სექტორი მინუსშია – ეს მაჩვენებელი პირველი კვარტლისთვის პანდემიის პერიოდის (2020-2021) შემდეგ ყველაზე დაბალია. ასევე საგულისხმოა, რომ გასული ორი წლის პირველ კვარტლებში პირდაპირი უცხოური ინვესტიციების მოცულობა ნახევარ მილიარდს აჭარბებდა.
ინვესტიციები ქვეყნების მიხედვით ასე გადანაწილდა:
- თურქეთი – 42.4 მლნ. დოლარი (21%)
- ჩეხეთი – 41.5 მლნ. დოლარი (20.6%)
- აშშ – 33.7 მლნ. დოლარი (16.7%)
- ნიდერლანდები – 32.3 მლნ. დოლარი (16%)
- მარშალის კუნძულები (ოფშორი) – 22.3 მლნ. დოლარი (11%)
ყველაზე მეტი ინვესტიცია ენერგეტიკის სექტორში განხორციელდა – 78.7 მლნ. დოლარი (39.1%), მეორე ადგილზეა ვაჭრობის სექტორი – 39.5 მლნ. დოლარით (19.6%), ხოლო მესამეზე ტრანსპორტის სექტორი 38.8 მლნ. დოლარით (19.3%).
აღსანიშნავია, რომ ბოლოს სექტორში უარყოფითი მაჩვენებელი 2019 წლის მეორე კვარტალში და 2016 წლის მეოთხე კვარტალში დაფიქსირდა.
პირდაპირი უცხოური ინვესტიციები (FDI – Foreign direct investment) — პირდაპირი ინვესტიცია ქვეყნის წარმოებასა და ბიზნესში უცხოური საწარმოს მიერ კომპანიის შეძენით ან არსებული ბიზნესის გაფართოებით. პირდაპირი უცხოური ინვესტიციის გარდა არსებობს პორტფელური ინვესტიცია. პორტფელური ინვესტიცია არის პასიური ინვესტიცია სხვა ქვეყნის ფასიან ქაღალდებში, როგორიცაა აქციები და ობლიგაციები.
უცხოური ინვესტიციები ქვეყნისთვის ეკონომიკური ზრდის მიღწევის ერთ-ერთი გზაა. უცხოური ინვესტიცია ზრდის ქვეყანაში არსებული კაპიტალის მარაგს, რაც უფრო მაღალ მწარმოებლურობასა და დასაქმების მაღალ დონეს უზრუნველყოფს.
უცხოური ინვესტიციები განვითარებად ქვეყნებს ასევე საშუალებას აძლევს გაეცნონ და გამოიყენონ უახლესი ტექნოლოგიები, რომელიც განვითარებული ეკონომიკის მქონე ქვეყნებში იწარმოება და გამოიყენება.
