პენტაგონის პრესსპიკერი: შემაშფოთებელი რიტორიკაა, რომ აშშ რეგიონში დაძაბულობის გამწვავებას ცდილობდა
პენტაგონის პრესსპიკერი რეგიონზე
პენტაგონის პრესსპიკერი, გენერალ-მაიორი პეტ რაიდერი “ამერიკის ხმასთან” ამბობს, რომ ამერიკა აფასებს იმ ორმხრივ ურთიერთობას, რაც საქართველოსთან წლებია აკავშირებს და დიალოგს განაგრძობს. თუმცა, წვრთნების გადადების გადაწყვეტილების მიზეზი ის შემაშფოთებელი რიტორიკა გახდა, რომლის მიხედვითაც, ამერიკა გამიზნულად ცდილობს რეგიონში ვითარების დაძაბვას.
რა თქვა რაიდერმა
“სამწუხაროდ, მიღებულია გადაწყვეტილება ამ წვრთნების გადადების შესახებ, მისი გაუქმების შესახებ იმ ფაქტის გამო, რომ ჩვენ ვიხილეთ ძალიან შემაშფოთებელი რიტორიკა, რომელიც გულისხმობს ყალბ განცხადებებს, თითქოს ამერიკის შეერთებული შტატები გამიზნულად ცდილობდა რეგიონში დაძაბულობის გამწვავებას, რაც აბსოლუტურად მცდარია.
რუსეთია ის, ვინც ცდილობს უკრაინაში ამ კონფლიქტში დაძაბულობის გამწვავებას. ასე რომ, კიდევ ერთხელ ვიტყვი, ჩვენ გავაგრძელებთ იმ გზების ძიებას, თუ რა ორმხრივი ჩართულობა შეიძლება გვქონდეს საქართველოსთან. ვაფასებთ ჩვენს პარტნიორობას. ისინი [საქართველო] მნიშვნელოვან როლს ასრულებენ რეგიონში და განვაგრძობთ ამაზე ფოკუსირებას.
ჩვენ ვხედავთ, როგორ მოქმედებს რუსეთი ბევრ ადგილას ჰიბრიდული ომის [მეთოდებით] – ომის ზღვრამდე არმისული კონფლიქტით. ჩვენ ეს ვიცით. გავაგრძელებთ მუშაობას პარტნიორებთან რეგიონში, რომ ამ საფრთხეებს გავუმკლავდეთ. საბოლოოდ, ჩვენ გვინდა უსაფრთხო, სტაბილური, თავისუფალი ევროპა. და როგორც თქვენ ნატოს სამიტზეც ნახეთ, მოკავშირეები ერთიანდებიან ჩვენი კოლექტიური თავდაცვისთვის, რუსეთის საფრთხის და მომავალი აგრესიის შეკავების გზების საპოვნელად.”
● აშშ-ის საელჩო: ზეიამ ვიზიტი დაიწყო, რომ აღენიშნა აშშ-ის ღრმა შეშფოთება მთავრობის ქმედებებზე
● არჩევნებამდე ოთხი თვით ადრე, ოპოზიცია ჯერ ისევ გაურკვევლობაშია. აქვთ მათ ამის დრო?
6 ივლისს ცნობილი გახდა, რომ ამერიკის შეერთებულმა შტატებმა განუსაზღვრელი ვადით გადადო ამერიკა-საქართველოს ერთობლივი სამხედრო სწავლება “ღირსეული პარტნიორი”, რომელიც საქართველოში 2016 წლიდან ტარდებოდა. წელს სამხედრო წვრთნა 25 ივლისი-6 აგვისტოს პერიოდში იყო დაგეგმილი.
შეერთებული შტატების თავდაცვის დეპარტამენტის ოფიციალური განცხადების თანახმად, ეს გადაწყვეტილება მიღებულია ორმხრივი ურთიერთობების გადახედვასთან დაკავშირებით მიღებული გადაწყვეტილების ფარგლებში.
განცხადებაში ასევე ნათქვამია, რომ გადაწყვეტილება განპირობებულია საქართველოს „მთავრობის ცრუ ბრალდებებით შეერთებული შტატებისა და სხვა დასავლური სუბიექტების მიმართ”.
ცრუ ბრალდებებში დასახელებულია საქართველოს ხელისუფლების ნარატივი, რომ თითქოს აშშ აიძულებდა საქართველოს გაეხსნა მეორე ფრონტი. ასევე, რომ თითქოს ამერიკის შეერთებულ შტატებს საქართველოში რევოლუციის მოწყობის ორი მცდელობა ჰქონდა.
