პარლამენტმა მესამე, საბოლოო მოსმენით დაამტკიცა რუსული კანონი "აგენტების შესახებ"
პარლამენტმა აგენტების კანონი მიიღო
84 მომხრე, 30 წინააღმდეგი – ერთთვიანი მრავალათასიანი აქციების, დასავლეთის მწვავე კრიტიკის, ხმაურის, დაპირისპირების, დაჭერების ფონზე, საქართველოს პარლამენტმა, 14 მაისს, მესამე, საბოლოო მოსმენით მიიღო რუსული კანონი აგენტების შესახებ.
მესამე მოსმენა პარლამენტში სულ რამდენიმე წამს გაგრძელდა.
პარლამენტის თავმჯდომარემ შალვა პაპუაშვილმა იკითხა, ვინმეს ხომ არ ჰქონდა რედაქციული შენიშვნები რუსულ კანონზე, რის შემდეგაც, საკითხი კენჭისყრაზე დააყენა.
- “ფინანსური დახმარების გადახედვა, სავიზო და ფინანსური სანქციები” – 29 კონგრესმენი კობახიძეს წერილით მიმართავს და კანონპროექტის გაწვევას მოითხოვს
- საქართველოს ელჩი საფრანგეთსა და მონაკოში რუსული კანონის გამო გადადგა
- ევროკავშირის სპეციალური წარმომადგენელი სამხრეთ კავკასიაში: საით მიდიხარ, საქართველო?
“არა რუსულ კანონს” – ისმოდა დარბაზში ოპოზიციონერი დეპუტატების შეძახილები. რამდენიმე მათგანმა ევროკავშირის დროშები გაშალა.
შეძახილები – “არა რუსულ კანონს”, “მონებო”, საყვირების ხმა ისმოდა პარლამენტის შენობის გარედანაც, სადაც დილიდან ასობით ადამიანია შეკრებილი.
კანონპროექტის მესამე მოსმენა ევროპელი პოლიტიკოსებისა და აშშ-ის სახელმწიფო მდივნის თანაშემწის ევროპისა და ევრაზიის საკითხებში, აშშ-ის სანქციების პოლიტიკის კოორდინატორის ჯეიმს ო’ბრაიენის საქართველოში ვიზიტის ფონზე გაიმართა.
ამ კანონის მიხედვით, არასამთავრობო ორგანიზაციები და მედიასაშუალებები, რომელთა წლიური შემოსავლის 20 პროცენტზე მეტს უცხოური დაფინანსება შეადგენს, ვალდებულები იქნებიან დარეგისტრირდნენ როგორც “უცხოური ინტერესის გამტარები”.
მათ ასევე მოუწევთ შეავსონ ყოველწლიური დეკლარაციები. ის ვინც რეგისტრაციისგან თავის არიდებას ეცდება, დაჯარიმდება.
ოპოზიცია და სამოქალაქო სექტორი მიიჩნევს, რომ ეს კანონი დაასამარებს ქვეყანაში კრიტიკულ აზრს და მოასუფთავებს ველს იმისათვის, რომ ხელისუფლებას აღარ ჰყავდეს მაკრიტიკებელი.
კანონის კენჭისყრამდე პარლამენტში დეპუტატების პოლიტიკური განცხადებები კეთდებოდა. დილიდან დარბაზში იყო ხმაური. სიტუაცია რამდენჯერმე გადაიზარდა ფიზიკუ შეხლა-შემოხლაში.
პარალელურად, დილიდან ხალხმრავალი აქციაა პარლამენტის შენობის გარეთ. პარლამენტთან და მთელს მიმდებარე ტერიტორიაზე, დილიდან მობილიზებულია დიდი რაოდეობით პოლიცია და სპეცრაზმიც.
პარლამენტის სხდომას ვერც დღეს დაესწრო ონლაინ მედია. სპეციალურად ამ მოსმენებისთვის, პარლამენტში უსაფრთხოების ყვითელი დონეა გამოცხადებული, იმისათის, რომ მედიამ სასესიო დარბაზში შესვლა ვერ შეძლოს.
პროცედურულად, ახლა კანონი ხელმოსაწერად საქართველოს პრეზიდენტს უნდა გადაეგზავნოს. პრეზიდენტს უკვე გაცხადებული აქვს, რომ ის კანონს ვეტოს დაადებს.
თუმცა, მმართველ პარტია “ქართულ ოცნებას” აქვს საკმარისი ხმები იმისათვის, რომ ვეტო დაძლიოს.
„უცხოური აგენტების შესახებ“ კანონპროექტი მმართველმა პარტიამ, “ქართულმა ოცნებამ” პირველად ერთი წლის წინ, 2023 წლის მარტში დააინიცირა. პარლამენტმა ის პირველი მოსმენით მიიღო, მაგრამ მოქალაქეების მასობრივი პროტესტისა და დასავლეთის მწვავე კრიტიკის შედეგად, ხელისუფლებამ კანონი გაიწვია.
2024 წლის 3 აპრილს ცნობილი გახდა, რომ მმართველმა პარტიამ გადაწყვიტა კვლავ დაებრუნებინა კანონპროექტი პარლამენტში. შინაარსი იგივე დატოვეს, ოღონდ ამჯერად დაარქვეს „უცხური გავლენის გამჭვირვალობის შესახებ“ კანონი.
წელს კანონპროექტის დაბრუნებას კიდევ უფრო მასშტაბური პროტესტი მოჰყვა, ვიდრე შარშან. ათი ათასობით ადამიანი გამოვიდა ქუჩებში საპროტესტო აქციაზე.
საქართველოს დასავლელი პარტნიორები მკვეთრად აკრიტიკებენ კანონპროექტს და ღიად აფრთხილებენ ხელისუფლებას, რომ ამ კანონის მიღება დიდ პრობლემებს შეუქმნის საქართველოს ევროპასთან ინტეგრაციის გზაზე.
მიუხედავად ამისა, პარლამენტმა რუსული კანონი პირველი მოსმენით 17 აპრილს, მეორე მოსმენით 1-ელ მაისს, მესამე მოსმენით კი დღეს, 14 მაისს მიიღო.
პარლამენტმა აგენტების კანონი მიიღო
