რუსეთი: ვირუსის გავრცელება პიკს უახლოვდება, მედიცინა მზად არ არის, ხელისუფლება კი იზოლაციის შესუსტებაზე ფიქრობს
რუსეთში, COVID-19-ის პიკს აპრილის ბოლოს ელიან. მაგრამ ეპიდემიოლოგების აზრით, პროცესი უკვე დაიწყო.
9 აპრილს, ერთი დღე-ღამის განმავლობაში, ინფიცირების 1 467 ახალი შემთხვევა დაფიქსირდა – 306-ით მეტი, ვიდრე ერთი დღით ადრე. სულ, პანდემიის დაწყებიდან, ქვეყნის 81 რეგიონში კორონავირუსის 10 131 შემთხვევა დაფიქსირდა. გარდაიცვალა 76 ადამიანი, გამოჯანმრთელდა – 698.
თუმცა, ნაკლებად შეიძლება, ეს რიცხვები რეალურ სურათად მივიჩნიოთ.
- რუსეთი პანდემიის მოლოდინში: მწვადები ბუნებაში და ხელისუფლების უმოქმედობა
- „მიმაჩნია, რომ არანაირი კორონავირუსი არ არსებობს“ – ამის დასამტკიცებლად ვლადიკავკაზში საავადმყოფოს შეუტიეს
- კორონავირუსი სამხრეთ ოსეთში: ექიმის ბუნტი, ნიღბებისა და ტესტების დეფიციტი – და ეჭვები თბილისის მიმართ
პნევმონიის ძალიან ბევრი შემთხვევაა, რომლებსაც კორონავირუსის ტესტი არ ჩატარებია
სემიონ გალპერინი „ექიმთა დაცვის ლიგიდან“ რადიო „თავისუფლებას“ უყვება, რომ რუსეთში, საავადმყოფოებში, ძალიან ბევრ პაციენტს იღებენ პნევმონიის დიაგნოზით, რომელთათვისაც კორონავირუსის ტესტის ჩატარებაც კი ვერ მოასწრეს.
„სიტუაცია მოსკოვში ძალიან სერიოზულია, მასობრივი ინფიცირების შემთხვევებია პოლიკლინიკებისა და საავადმყოფოების სასწრაფო დახმარების ოთახებში, სადაც ათობით ადამიანი მაღალი ტემპერატურითა და ხველებით საათობით ზის ჰოსპიტალიზაციის მოლოდინში“.
რადიო „თავისუფლება“ ასევე ეყრდნობა 30-წლიანი სტაჟის მქონე ექიმ-პულმონოლოგს, რომელმაც საკუთარი ვინაობის გამხელა არ ისურვა:
„ერთი ღამის განმავლობაში, მოსკოვის ოლქის რეანიმაციებში ბევრი მძიმე პაციენტი გავსინჯე. თითქმის ყველას ორმხრივი პნევმონია ჰქონდა, მაგრამ კორონავირუსი ოფიციალურად არც ერთს არ აქვს, რადგან მათთვის ამ დრომდე არ ჩაუტარებიათ COVID-19-ის ტესტი ან პასუხები არ არის ჯერჯერობით მზად“.
ის, რომ აღნიშნული პნევმონიის ფაქტების უმეტესობა, ალბათ, იგივე COVID-19-ია, აღიარა მოსკოვის წამყვანი საავადმყოფოს, „კომუნარკის“ მთავარმა ექიმმა, დენის პროცენკომ, რომელიც თავად დაინფიცირდა კორონავირუსით და თვითიზოლაციაში იმყოფება.
„პნევმონიის მქონე და COVID-19-ის მქონე პაციენტების გაყოფას ფაქტობრივად აზრი არ აქვს“, – წერს ის Facebook-ის საკუთარ გვერდზე გამოქვეყნებულ პოსტში.
რეანიმაციებში ადგილებისა და ხელოვნური სუნთქვის აპარატების მწვავე დეფიციტია
მოსკოვი და მოსკოვის ოლქი – ლიდერები არიან ინფიცირებულთა რაოდენობით.
დედაქალაქის მერის, სერგეი სობიანინის თქმით, თითქმის 20 ათასი საწოლი გამოიყო კორონავირუსით ინფიცირებული პაციენტებისთვის.
მაგრამ მათ მზაობას ექიმები „კატასტროფულს“ უწოდებენ.
- მოსაზრება: რუსებმა თავისიანები მიატოვეს
- „მაგრამ ბიზნესს მაინც არ დავხურავთ“ – თურქეთი პირველ ადგილზეა მსოფლიოში კორონავირუსის გავრცელების ტემპით
„უკვე ახლა არ არის საკმარისი ექიმებისთვის დამცავი საშუალებები და აუცილებელი წამლები. რეანიმაციები უკვე გადავსებულია პნევმონიის მქონე პაციენტებით, ბევრ მათგანს ამ დრომდე არ ჩატარებია კორონავირუსზე ტესტი“, – განუცხადა რადიო „თავისუფლებას“ მოსკოვის „სეჩენოვკას“ საავადმყოფოდან ინფორმირებულმა წყარომ.
„ის, რაც არის – ეს არა სამედიცინო რესპირატორები, არამედ უბრალო კამუფლაჟია. სამედიცინო პერსონალს სწრაფად გადაედება დაავადება ინფიცირებულებისგან. პალატებში კი ნორმალური ვენტილაციაც არ არის“.
„პოლიკლინიკების ექიმები, თერაპევტები და პედიატრები საერთოდ არ არიან აღჭურვილი დამცავი საშუალებებით. ჯანდაცვის სამინისტროს ბრძანებით, ნიღბებს თავად ვკერავთ! ექიმები იძულებულები არიან გავიდნენ და შიშველი ხელებით შეამოწმონ ავადმყოფები. დაგვეხმარეთ, თუ შეიძლება!“, – წერენ ექიმები.
ოფიციალური პირების ბოდვა და პრობლემებზე საუბრის აკრძალვა ექიმებისთვის
რუსულმა საქველმოქმედო ფონდმა „პრავმირმა“ ექიმების დასახმარებლად, თითქმის 10.5 მილიონი რუბლი (დაახლოებით, 135 ათასი დოლარი) შეაგროვა.
აქ ამბობენ, რომ უკეთ შეძლებდნენ ავადმყოფების დახმარებას, რეალური ინფორმაცია რომ ჰქონოდათ.
თუმცა, რუსეთში, ექიმებს აკრძალული აქვთ საუბარი პრობლემებზე, რადგან ოფიციალურ დონეზე „ყველაფერი ნორმალურადაა“.
„ბევრ სამედიცინო დაწესებულებას არ შეუძლია ღიად მოითხოვოს დახმარება, არ შეუძლია გამოაქვეყნოს საკუთარი საჭიროებების სია ხელმძღვანელობის აკრძალვის გამო. დეფიციტის შესახებ განცხადებები პანიკის პროვოცირებად მიიჩნევა“, – ამბობს ვლადიმირ ბერხინი, ფონდ „პრედანიეს“ ხელმძღვანელი.
კორონავირუსის მქონე პაციენტებთან მუშაობისთვის დამატებით ანაზღაურებას გადაიხდიან, ამის პირობა პრეზიდენტმა ვლადიმირ პუტინმა დადო. თვეში 80 ათას რუბლს (დაახლოებით 1000 დოლარს) დაუმატებენ ექიმებს, 25 ათას რუბლს (დაახლოებით 350 დოლარს) – უმცროს სამედიცინო პერსონალს.
ეს კარია, მაგრამ არასაკმარისი, – ამბობს იგივე ექიმი-პულმონოლოგი რადიო „თავისუფლებასთან“ საუბარში.
ასევე, ექიმები ამბობენ, რომ სამედიცინო სფეროსა და ხელისუფლების ჩინოვნიკებს აშკარად არ ესმით კარგად ვითარების სერიოზულობა.
„მაგალითად, ვერონიკა სკვორცოვამ, ჯანდაცვის ყოფილმა მინისტრმა, განაცხადა, რომ ხელოვნური სუნთქვის ერთ აპარატზე შესაძლებელია ოთხი პაციენტის მიერთება. დიახ, აპარატს მართლაც აქვს ოთხი შესაერთებელი, მაგრამ ამის გაკეთება კატეგორიულად არ შეიძლება. ერთ პაციენტს სისხლში ჟანგბადის 80% აქვს, მეორეს – 60%, ერთი 100 კილოგრამს იწონის, მეორე – 70-ს, ერთს უფრო მეტად აქვს დაზიანებული ფილტვის ქსოვილი, მეორეს – ნაკლებდ და ა.შ.“, განმარტავს ექიმი-პულმონოლოგი.
„ეს განცხადება, უბრალოდ, სირცხვილია, – ეთანხმება სემიონ გალპერინი, – პაციენტებს მაშინვე ეკარგებათ ტვინის ფუნქცია და ადამიანების ნაცვლად „მცენარეებს“ მივიღებთ“.
რამდენი ხელოვნური სუნთქვის აპარატია რუსეთში – უცნობია. არსებობს ჯანდაცვის სამინისტროს 2018 წლის მონაცემები: დაახლოებით, 47 106 აპარატი, მაგრამ მათი მდგომარეობა და გამოშვების თარიღი უცნობია, წერს „ვედომოსტი“.
დღეს, მათი ძირითადი ნაწილი უკვე დაკავებული აქვთ სხვადასხვა დაავადების მქონე პაციენტებს.
- „გადაწყვიტო, ვინ უნდა იცოცხლოს და ვინ უნდა მოკვდეს – ის არ არის, რასაც მე მასწავლიდნენ“ – ნიუიორკელი ექიმის ისტორია
- კორონავირუსი: ტრამპი ჯანდაცვის მსოფლიო ორგანიზაციის წინააღმდეგ
ხელისუფლების ქმედებები
მოსკოვში, კორონავირუსის გამო კარანტინი არ გამოუცხადებიათ.
ამის ნაცვლად, ზოგიერთ რეგიონში თვითიზოლაცია შემოიღეს. ამასთან, მსგავსი ცნება რუსულ კანონმდებლობაში არ არსებობს.
მოსახლეობისთვის იმის ახსნის უფლება, თუ რას ნიშნავს თვითიზოლაცია, ადგილობრივ ხელისუფლებებს გადასცეს.
ცენტრალური ხელისუფლება მხოლოდ იმით შემოიფარგლა, რომ არასამუშაოდ გამოაცხადა მთელი აპრილი.
ყველაზე მკაცრი ზომები მოსკოვშია მიღებული, სადაც ყველაზე მეტი ინფიცირებულია. დაკეტილია მაღაზიები, სასურსათო მაღაზიებისა და აფთიაქების, ასევე, სახელმწიფო დაწესებულებებისა და ოფისების გარდა.
დაავადების შემთხვევათა რაოდენობის ზრდის მიუხედავად, პრეზიდენტი პუტინი რეგულარულად აკეთებს განცხადებებს იზოლაციის ზომების ეტაპობრივი შემსუბუქების აუცილებლობის შესახებ, რათა დაეხმარონ ბიზნესსა და ეკონომიკას.
ეკონომიკური უბედურება
პანდემია ნავთობზე ფასის ვარდნას დაემთხვა – რუსეთის მთავარი საექსპორტო საქონლის.
ხელისუფლებამ აპრილი არასამუშაო თვედ გამოაცხადა, ამასთან, მოითხოვა, რომ არ გაათავისუფლონ კომპანიებმა თანამშრომლები და განაგრძონ მათთვის ხელფასის გადახდა. შედეგად, ბევრი მცირე და საშუალო კერძო კომპანია თითქმის გაბანკროტების პირას აღმოჩნდა – მათი საქმიანობა შეჩერებულია და არაფრით შეუძლიათ ხელფასების გადახდა.
ეკონომისტები ვარაუდობენ, რომ გარდაუვალი რეცესიიდან გამოსასვლელად ქვეყანას მინიმუმ ორი წელი მაინც დასჭირდება, ხოლო უმუშევართა რიცხვი 20-25 მილიონი იქნება.
