PACE საქართველოზე: რეფორმების პროცესი ჩერდება
PACE საქართველოზე
ევროპის საბჭოს საპარლამენტო ასამბლეის (PACE) მომხსენებლებმა საქართველოს მონიტორინგის საკითხებში განაცხადეს, რომ საქართველოში რეფორმების პროცესი ჩერდება მაშინ, როცა ქვეყანა ევროინტეგრაციის “გზაჯვარედინზეა”.
მონიტორინგის კომიტეტის თანამომხსენებლები კლოდ კერნი (საფრანგეთი, ALDE) და ედით ესტრელა (პორტუგალია, SOC) ერთობლივ განცხადებაში საქართველოში არსებულ პოლარიზაციაზე, რეფორმების შეფერხებაზე, სამოქალაქო ორგანიზაციების წარმომადგენლების მიმართ გახშირებულ თავდასხმებზე, დეოლიგარქიზაციის კანონპროექტსა და მიხეილ სააკაშვილის შესახებ საუბრობენ.
მომხსენებლებმა საქართველოს მმართველ პარტიასა და ყველა პოლიტიკურ ძალას, 12 პუნქტის შესასრულებლად, ერთობლივი მუშაობისკენ მოუწოდეს. კერნი და ესტრელა საქართველოში 27-29 მარტს იმყოფებოდნენ და განცხადება ვიზიტის შემდეგ გაავრცელეს.
თანამომხსენებლების თქმით, ისინი საქართველოს ყოველთვის უჭერდნენ მხარს და ეხმარებოდნენ ევროინტეგრაციის გზაზე. მათი განმარტებით, საქართველოს მოქალაქეები ამას იმსახურებენ და ევროპულ საბჭოში გაერთიანების შემდეგ ქვეყანაში განხორციელებულმა რეფორმებმა ხელი შეუწყო ქვეყნის დემოკრატიულ განვითარებასა და კანონის უზენაესობას.
იმავდროულად კერნი და ესტრელა გამოხატავენ შეშფოთება იმ ფაქტის გამო, რომ საქართველოს ევროინტეგრაციისთვის მნიშვნელოვან მომენტში რეფორმების პროცესი ფერხდება. კერძოდ:
● “ევროპული საბჭოს ასამბლეის მიერ მიღებულ რეზოლუციაში, ისევე როგორც ევროკომისიის 12 რეკომენდაციის მიხედვით მთავარი პრიორიტეტი ქართულ პოლიტიკურ გარემოში უკიდურესი პოლარიზაციის მოგვარებაა, რომელიც ეხება საზოგადოების ყველა სფეროს.”
● “პოლარიზაციის საკითხის მოგვარება როგორც მმართველი ძალის, ასევე ოპოზიციის ნებაზეა სრულად დამოკიდებული მათი ქცევისა და დამოკიდებულებების ცვლილების კუთხით.”
● “აქტიური და კრიტიკული სამოქალაქო საზოგადოება როგორიც საქართველოშია, აუცილებელია კარგად ფუნქციონირებადი დემოკრატიული საზოგადოებისთვის. შესაბამისად, ჩვენ მოვუწოდებთ ხელისუფლებას, რომ საბოლოოდ დაგმოს და სადაც საჭიროა გამოიძიოს ეს თავდასხმები, რომელთა მიზანი ამ ორგანიზაციების გაჩუმება და სტიგმატიზაციაა.”
● განცხადებაში ასევე ხაზგასმითაა აღნიშნული სასამართლო რეფორმის გაგრძელების აუცილებლობა, მისი როგორც დამოუკიდებელი და მიუკერძოებელი მსაჯის არსებობის ხედვით. თანამომხსენებლებმა ასევე ხაზი გაუსხეს იუსტიციის უმაღლესი საბჭოს რეფორმის აუცილებლობას რომელიც ამ სისტემაში გადაწყვეტილების მიღების პროცესში კორპორატიულობის, გამჭვირვალობის ნაკლებობის აღმოფხვრის მიზნით, რაც მათი თქმით, სასამართლოს დამოუკიდებლობას ძირს უთხრის.
● დეოლიგარქიის კანონპროექტში არსებული ე.წ პერსონალური მიდგომა არ შეესაბამება ადამიანის უფლებათა ევროპულ კონვენციას და მომხსენებლები ხელისუფლებას მოუწოდებენ კანონპროექტში ამ მიდგომაზე უარი თქვან:
„ეს განსაკუთრებით მნიშვნელოვანია ე.წ დეოლიგარქიზაციის შესახებ კანონის კონტექსტში. მაშინ როდესაც თანამომხსენებლებმა მაღალი შეფასება მისცეს ხელისუფლების მზაობას, ებრძოლონ გადაჭარბებულ გავლენას ეკონომიკურ, პოლიტიკურ და საზოგადოებრივ ცხოვრებაში, მათ გამოთქვეს შეშფოთება, რომ რთული იქნება ამ კანონში გაწერილი ე.წ პიროვნული მიდგომის ადამიანის უფლებათა ევროპული კონვენციასთან შესაბამისობაში მოყვანა. გარდა ამისა თანამომხსენებლების აზრით, პოლიტიკური გარემოს უკიდურესი პოლარიზაციის პირობებში და სასამართლო სისტემაზე იუსტიციის უმაღლესი საბჭოს კონტროლთან დაკავშირებული კითხვების კონტექსტში, პიროვნულმა მიდგომამ, შესაძლოა, კანონპროექტი დაუცველი გახადოს პოლიტიკური მიზნით ბოროტად გამოყენებისგან, რაც ეწინააღმდეგება ამ კანონის გაცხადებულ მიზნებს. თანამომხსენებლები რეკომენდაციით გამოდიან, რომ ამ კანონპროექტში ხელისუფლებამ უარი თქვას პიროვნულ მიდგომაზე და მხარი დაუჭიროს არსებული მექანიზმების გაძლიერების ე.წ სისტემურ მიდგომას რასაც აშკარად ანიჭებს უპირატესობას ვენეციის კომისია“ – წერია განცხადებაში.
საქართველოში ვიზიტისას თანამომხსენებლები ასევე გაეცნენ მიხეილ სააკაშვილის გარშემო არსებულ სიტუაციას. ისინი გამოთქვამენ შეშფოთებას მისი ჯანმრთელობის გარშემო ურთიერთსაპირისპირო ინფორმაციის არსებობის გამო.
მათი თქმით, სააკაშვილის ჯანმრთელობის დეპოლიტიზება უნდა მოხდეს და არსებობდეს ნეიტრალური, სანდო ინფორმაცია – ამ კუთხით კი სააკაშვილის მკურნალობაში უცხოელი ექიმების ჩართვის აუცილებლობაზე საუბრობენ.
● “რატომ არ გესმით ხალხის მოთხოვნა? მათ უნდათ ევროპა და არა რუსეთი” – საქართველოს პრეზიდენტის გამოსვლა პარლამენტში
● თბილისის ანტირუსულმა აქციებმა სოხუმსა და ცხინვალში „მეორე ფრონტის“ შიში გააჩინა. ხელისუფლების რეაქცია
● ევროკავშირის საგარეო მინისტრები საქართველო-მოლდოვაში პრორუსი ოლიგარქების სანქცირებას ითხოვენ – POLITICO
ევროკომისიამ საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე 2022 წლის 17 ივნისს დასკვნა მოამზადა. შედეგად, უკრაინა და მოლდოვა მიიღებენ ევროკავშირის კანდიდატობის სტატუსს და დაეკისრებათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალება, შემდეგ კი კანდიდატობის სტატუსის მიღების შანსი ექნება.
ევროპის საბჭოს საპარლამენტო ასამბლეამ (PACE) კი 2022 წლის 13 ოქტომბერს რუსეთის რეჟიმი ტერორისტულად გამოაცხადა და გახდა პირველი საერთაშორისო ორგანიზაცია, რომელმაც მსგავსი აქტი მიიღო. საქართველოს მმართველი პარტია აცხადებს, რომ იზიარებს PACE-ის რეზოლუციის ზოგად სულისკვეთებას, თუმცა დოკუმენტს მხარი არ დაუჭირა, რადგან არ ეთანხმება ჩანაწერს ექსპრეზიდენტ მიხეილ სააკაშვილის პოლიტპატიმრობის შესახებ.
რეზოლუციაში შესწორების სახით დამატება მოგვიანებით შევიდა, სადაც ასამბლეა ითხოვს რუსეთის ფედერაციასა და სხვა ქვეყნებში “პრეზიდენტ პუტინის მოწინააღმდეგე პოლიტპატიმრების, მათ შორის უკრაინის მოქალაქისა და საქართველოს ყოფილი პრეზიდენტის, მიხეილ სააკაშვილის საქმეების განხილვასა და მათ გათავისუფლებას.”
აღსანიშნავია, რომ 2022 წლის 8 ნოემბერს ევროპარლამენტარებმა ბრიუსელში, საგარეო კომიტეტის სხდომაზე, საქართველოს ევროკავშირთან ასოცირების შეთანხმების დანერგვის ყოველწლიური ანგარიში განიხილეს. მიღებული კომპრომისული დოკუმენტის მიხედვით, ბიძინა ივანიშვილი აღარ არის ნახსენები როგორც ოლიგარქი, თუმცა დეოლიგარქიზაციის პუნქტის თავშივე მოცემულია მისი სახელი და გვარი და წერია, რომ აუცილებელია ივანიშვილის ჭარბ გავლენებთან დაკავშირებით მიღებული იყოს, მათ შორის, საკანონმდებლო გადაწყვეტილებები.
მიმდინარე წლის 3 თებერვალს ევროკომისიამ საქართველოს, უკრაინისა და მოლდოვის ევროკავშირის კანონთა კრებულთან (EU acquis) შესაბამისობის შესახებ ანგარიში გამოაქვეყნა და საქართველოს თანხვედრას ევროკავშირის საგარეო პოლიტიკასთან “საშუალოდ მომზადებულად” შეაფასა.
