PACE ოპოზიციონერების წინააღმდეგ აღძრული საქმეების შეწყვეტას და რეპრესიული კანონების გაუქმებას ითხოვს
PACE-ს განცხადება
ევროპის საბჭოს საპარლამენტო ასამბლეის (PACE) დელეგაცია ოპოზიციონერი პოლიტიკოსების წინააღმდეგ აღძრული საქმეების შეწყვეტას ითხოვს. ამასთან, საქართველოს მონიტორინგის თანამომხსენებლებმა, ედიტ ესტრელამ (პორტუგალია, SOC) და საბინა ცუდიჩმა (ბოსნია და ჰერცეგოვინა, ALDE) “ქართულ ოცნებას” ვენეციის კომისიის რეკომენდაციების სრულად შესრულებისკენ მოუწოდეს როგორც ე.წ. უცხოური აგენტების კანონმდებლობის, ასევე ადმინისტრაციული სამართალდარღვევების კოდექსის ნაწილში.
PACE-ის წარმომადგენლები საქართველოში 10–12 ნოემბერს იმყოფებოდნენ. ვიზიტის ფარგლებში თანამომხსენებლები შეხვდნენ შალვა პაპუაშვილს, ‘ქართული ოცნების“ საპარლამენტო გუნდის წევრებს, ასევე საპარლამენტო და არასაპარლამენტო ოპოზიციის წარმომადგენლებს.
“ვიმეორებთ იმას, რაც ასამბლეამ უკვე აღნიშნა საქართველოს შესახებ მიღებულ რეზოლუციაში: “უცხოური გავლენის გამჭვირვალობის შესახებ” კანონი, “უცხოური აგენტების რეგისტრაციის აქტი”, გრანტების შესახებ კანონი და მოქმედი ადმინისტრაციული სამართალდარღვევების კოდექსი ევროკონვენციის სტანდარტებსა და ნორმებს არ შეესაბამება და, როგორც ვენეციის კომისიამ აღნიშნა, ისინი უნდა გაუქმდეს,” — აცხადებენ თანამომხსენებლები.
მომხსენებლები ღრმა შეშფოთებას გამოთქვამენ ოპოზიციური პარტიების ლიდერების წინააღმდეგ წაყენებული ბოლოდროინდელი სისხლის სამართლის საქმეების გამო, რომლებსაც შესაძლოა სახელმწიფოს წინააღმდეგ ჩადენილი დანაშაულების გამო ხანგრძლივი პატიმრობა დაეკისროთ.
“ეს ბრალდებები აშკარად პოლიტიკურად მოტივირებულია და უნდა განვიხილოთ საკონსტიტუციო სასამართლოში ბოლოდროინდელ სარჩელებთან დაკავშირებით. ასეთ ქმედებებს ადგილი არ აქვს დემოკრატიულ საზოგადოებაში. ჩვენ მოვუწოდებთ ხელისუფლებას, შეწყვიტოს ეს ქმედებები, რაც ფაქტობრივად დაამყარებს დიქტატურას საქართველოში“- წერია განცხადებაში.
განცხადებით ირკვევა, რომ ევროსაბჭოს დელეგაციას “ქართული ოცნებისგან” მზია ამაღლობელთან ციხეში შესვლაზე უარი ეთქვა.
PACE-ს თანამომხსენებლების თქმით, ისინი მზად არიან, ხელისუფლებასთან კონსტრუქციული თანამშრომლობით განიხილონ ასამბლეის მოთხოვნები და შეშფოთებები.
15 ოქტომბერს ვენეციის კომისიამ გამოაქვეყნა მოსაზრება უცხოურ დაფინანსებასთან დაკავშირებით “ქართული ოცნების“ მიერ მიღებულ რეპრესიულ კანონებზე და მოუწოდა ხელისუფლებას, გააუქმოს: “უცხოური აგენტების რეგისტრაციის შესახებ კანონი” (ქართული FARA), ასევე “გრანტების შესახებ კანონსა” და “მაუწყებლობის შესახებ კანონში” შესული ცვლილებები, რომელიც უცხოური დაფინანსების მიღებას ზღუდავს.
დასკვნაში, ანტიკორუფციული ბიურო მიჩნეულია როგორც არადამოუკიდებელი ორგანო, რომელსაც არ შეიძლება ქონდეს ჩაბარებული ეს უფლებამოსილებები.
დოკუმენტში ასევე ვკითხულობთ, რომ პარტია “ქართული ოცნება”, რაჟდენ კუპრაშვილი და თამარ ზოდელავა არ შეხვდნენ ვენეციის კომისიას დასკვნის მომზადების პროცესში.
ვენეციის კომისიის განცხადებით, მათ მოსაზრების მომზადება ევროპის საბჭოს საპარლამენტო ასამბლეის მონიტორინგის კომიტეტმა სთხოვა.
