პოლიციამ ღამით ისევ დაშალა აქცია თბილისის ცენტრში. ამჯერად არ ყოფილა დაკავებები. ფოტო/ვიდეო
ოპოზიციის აქცია. მესამე ღამე
20 ნოემბრის ღამეს, პოლიციამ ისევ დაშალა თბილისის ცენტრში, ჭავჭავაძის გამზირზე მიმდინარე საპროტესტო აქცია ახალი საპარლამენტო არჩევნების მოთხოვნით. წინა ღამისგან განსხვავებით, ამჯერად არ ყოფილა დარბევა და დაკავებები. პოლიციასა და დემონსტრანტებს შორის ფიზიკური შეხება არ მომხდარა.
რა მოხდა 19-20 ნოემბრის ღამეს. ქრონოლოგია
- პოლიციამ ძალის გამოყენებით დაშალა თბილისის ცენტრში მიმდინარე აქცია. დააკავეს 16 ადამიანი
- “არ დავიხევთ უკან” – ოპოზიცია აგრძელებს უწყვეტ პროტესტს. აქცია ისევ თბილისის ცენტრში დაბრუნდა
- ოპოზიცია განაგრძობს თბილისის ცენტრის პარალიზებას. გეგმა აქვს პრეზიდენტსაც. რა ვიცით ამ დროისთვის?
აქციის მონაწილეებმა ჭავჭავაძის გამზირის დაკავება მას შემდეგ შეძლეს, რაც წინა ღამის დარბევის შემდეგ, ათასობით პოლიციელმა ეს ტერიტორია დატოვა.
ჭავჭავაძის გამზირზე ათასობით ადამიანი შეიკრიბა. ისევ გაშალეს კარვები. აქცია ისევ ღამისთევით გაგრძელდა.
წინა დღისგან განსხვავებით, ამჯერად აქციაზე ყველა ოპოზიციური პოლიტიკური პარტიის ლიდერი და წარმომადგენელი ჩანდა.
ღამით, 23:45 საათზე, აქციის მონაწილეებმა ერთად უყურეს საქართველოს ნაკრების საფეხბურთო მატჩს.
გამთენიისას, 06:00 საათზე, აქციის მიმდებარედ ისევ გამოჩნდა ათასობით პოლიციელი.
შინაგან საქმეთა სამინისტროს წარმომადგენლებმა აქციის ორგანიზატორებს 15 წუთი მისცეს დაკავებული ტერიტორიის გასათავისუფლებლად.
19-20 ნოემბრის ღამის ქრონიკა. ვიდეო: იულია კალაბანი/JAMnews
“შეკრება- მანიფესტაციის კანონის თანახმად განგიმარტავთ, რომ გზის სავალ ნაწილში შეკრება-მანიფესტაცია დასაშვებია, როდესაც მანიფესტანტთა რაოდენობა მოითხოვს ამას. ახლა მნიშვნელოვნად არის შემცირებული, ამიტომ გზის სავალი ნაწილი უნდა გაათავისუფლოთ“, – მიმართა შინაგან საქმეთა სამინისტროს წარმომადგენელმა გიორგი ვაშაძეს, კოალიცია “ერთიანობა – ნაციონალური მოძრაობის” ერთ-ერთ ლიდერს.
გიორგი ვაშაძემ 40 წუთი მოითხოვა. პოლიცია არ დათანხმდა.
15 წუთის გასვლის შემდეგ ტერიტორიის დაკავება პოლიციამ დაიწყო. აქციის მონაწილეებმა კი უკუსვლით მელიქიშვილის გამზირისკენ დაიწყეს გადანაცვლება – “რუსებო”, “მონებო” – სკანდირებდნენ ისინი.
მელიქიშვილის გამზირზე აქცია ორ საათს გაგრძელდა. ერთ მხარეს აქციის მონაწილეები იდგნენ, მათ წინ, ჭავჭავაძის გამზირის მხარეს, ათასობით პოლიციელი.
დილის 08:00 საათზე აქციის ორგანიზატორებმა, ოპოზიციური პარტიების ლიდერებმა დროებითი შესვენების გადაწყვეტილება მიიღეს.
„კოალიცია ცვლილებისთვის” ერთ-ერთმა ლიდერმა ზურაბ ჯაფარიძემ აქციის მონაწილეებს უთხრა, რომ “უნდა გადაიგეგმონ და რამე განსხვავებული მოიფიქრონ”.
მან განმარტა, რომ ხელისუფლებამ სტრატეგია შეცვალა და მელიქიშვილის გამზირის გადაკეტვას ხელს არავის უშლის, რაც არაფერს შეცვლის.
ორგანიზატორებმა აქციის მონაწილეებს, რომლებმაც სამი ღამე გაათენეს თბილისის ცენტრში, გაუძლეს დარბევას, სიცივეს, გამოძინების საშულება მისცეს.
ოპოზიციის ახალი გეგმის შესახებ დღეს საღამოს გახდება ცნობილი.
პერმანენტული საპროტესტო აქციები საქართველოში 26 ოქტომბრის საპარლამენტო არჩევნების შემდეგ იმართება. აქციების ორგანიზატორი სხვადასხვა ჯგუფია – ოპოზიცია, სამოქალაქო სექტორი, ჯგუფი “დაიტოვე”, რომელიც მარტის აქციების დროს შეიქმნა და ასი ათასობით ადამიანს აერთიანებს.
აქციის მონაწილეებს ერთადერთი და უცვლელი მოთხოვნა აქვთ – ჩატარდეს ახალი არჩევნები.
26 ოქტომბერს ჩატარებულ არჩევნებს, რომელზეც, ცესკოს მონაცემებით მმართველმა პარტია “ქართულმა ოცნებამ” ხმების 54% მიიღო, საართველოს პრეზიდენტმა არალეგიტიმური უწოდა. მან თქვა, რომ ეს იყო რუსული სპეცოპერაცია. სალომე ზურაბიშვილმა არჩევნების შედეგების გასაბათილებლად საკონსტიტუციო სასამართლოს მიმართა.
“ქართული ოცნების” ეს მონაცემი 12%-ით მეტია იმ ეგზიტპოლის შედეგებზე, როემლიც სულ ტარდებოდა ქვეყანაში ბოლო წლებში და არსოდეს ყოფილა ამხელა აცდენა.
გარდა ამისა, ადგილობრივმა და საერთაშორისო დამკვირვებლებმა გამოავლინეს ასობით დარღვევა ამ არჩევნებზე, მათ შორის, ხმების ფარულობის დარღვევა, სხვისი პირადობების გამოყენება, “კარუსელი”, ამომრჩევლებზე ზეწოლა, მათი დაშინება.
გამომძიებელმა ჟურნალისტებმა გამოიძიეს, რომ მმართველ პარტიას შექმნილი ჰქონდა ე.წ. ქოლცენტრები, საარჩევნო უბნებთან ახლოს და ყველა ამომრჩეველს აღრიცხავდა. ადამიანებს ურეკავდნენ და აიძულებდნენ უბნებზე მისვლას, ხმის მიცემას მმართველი პარტიისთვის. ამ კოორდინირებულ ქსელში, რომელსაც ჰყავდა თავისი “კაპიტნები”, ათასობით ადამიანი იყო ჩართული, მეტწილად, საჯარო სამსახურებში დასაქმებული ადამიანები. ამ სქემაში ჩართულ ადამიანებს, ხელისუფლებამ, ნაღდი ანგარიშსწორებით, ხელზე, გადაუხადა რამდენიმე მილიონი.
ამ სისტემურმა სქემამ და დარღვევების ფაქტებმა არჩევნების შედეგები კითხვის ნიშნის ქვეშ დააყენა როგორც ქვეყნის შიგნით, ასევე მის ფარგლებს გარეთ. არჩევნებიდან უკვე თითქმის ერთი თვე გავიდა და ამ დრომდე მისი შედეგები საერთაშორისო თანამეგობრობას არ უღიარებია. ერთადერთი ევროპელი ლიდერი, რომელმაც საპარლამენტო არჩევნები აღიარა, ვიქტორ ორბანია.
18 ნოემბერს, ევროპარლამენტის საგარეო საქმეთა კომიტეტზე, სხვა საკითხებთან ერთად საქართველოში ჩატარებულ არჩევნებზეც იმსჯელეს. ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში ჯოზეფ ბორელმა თქვა, რომ საქართველოში ჩატარებული არჩევნების გამოძიება უნდა ჩატარდეს.
ოპოზიციის აქცია. მესამე ღამე
