ჩვენ არ ვასაჯაროებთ საუბრის დეტალებს - ოპოზიამ პომპეოს მოადგილესთან შეხვედრა დაასრულა

ოპოზიციის ლიდერებმა დაასრულეს შეხვედრა ამერიკის სახელმწიფო მდივნის მოადგილესთან, ფილიპ რიკერთან, რომელიც საქართველოში დაუგეგმავად დარჩა.

● მაიკ პომპეოს ვიზიტი დასრულდა. მთავარი, რაც გავიგეთ

● სახელმწიფო დეპარტამენტი: მოვუწოდებთ ოპოზიციას, შევიდნენ პარლამენტში

“შემოთავაზება იყო ის, რომ ხომ არ სჯობს ინსტიტუტების გამოყენებით სცადოთ ბრძოლის გაგრძელება, რაზეც ჩვენ ავუხსენით, რომ ამ ქვეყანაში ინსტიტუტები არ არსებობს”, – ამის შესახებ „გირჩის” ლიდერმა, ზურაბ ჯაფარიძემ შეხვედრის შემდეგ განაცხადა.

„შეხვედრის მიზანი იყო, მოესმინა უშუალოდ ოპოზიციური პარტიის წარმომადგენლებისგან, ჩვენ როგორ ვაფასებთ სიტუაციას, ჩატარებულ საპარლამენტო არჩევნებთან დაკავშირებით, თუმცა მან საკუთარი ხედვაც გაგვიზიარა. არანაირი პირდაპირი მოწოდება არ ყოფილა”, – თქვა ზურაბ ჯაფარიძემ.

„სტრატეგია აღმაშენებლის“ ლიდერმა გიორგი ვაშაძემ კი შეხვედრის შემდეგ მზადყოფნა გამოთქვა მესამე რაუნდში მონაწილეობაზე, ოღონდ მთავარია ადეკვატური პასუხი „ქართული ოცნების“ მხრიდან, “მთავარი გასაღები მათ ხელშია”.

„ჩვენი ამერიკელი პარტნიორების მხრიდან მოწოდება არის შეთანხმებისკენ. ჩვენ მივაწოდეთ ყველა ის საკითხი, რაც ხდება რეალურად. ოპოზიციამ დააფიქსირა საკუთარი პოზიცია მოთხოვნებთან დაკავშირებით და სრული მზაობა გამოვხატეთ, რომ მესამე რაუნდში მზად ვართ მივიდეთ, ოღონდ ველოდებით ადეკვატურ პასუხს „ქართული ოცნების“ მხრიდან. აქ არ არის იმაზე, მხოლოდ ჩვენ რას ვიზამთ, მთავრი გასაღები არის „ქართული ოცნების“ ხელში”.

ყველაზე მსხვილი ოპოზიციური პარტიის, “ნაციონალური მოძრაობის” თავმჯდომარემ, გრიგოლ ვაშაძემ შეხვედრა დადებითად შეაფასა და აღნიშნა, რომ ოპოზიციური პარტიების ლიდერების შეხვედრა იმის დასტურია, რომ აშშ-ს ესმის, რამდენად ღრმაა საქართველოში პოლიტიკური კრიზისი და როგორ სჭირდება ქვეყანას სტრატეგიული მოკავშირეების დახმარება. 

“ჩემი 45 – წლიანი გამოცდილებიდან გეუბნებით, ადამიანები, რომლებიც ამბობენ, რომ წამსვლელი ადმინისტრაციის, აშშ-ის სახელმწიფო მდივნის ვიზიტი არაფერს ნიშნავს, როგორც წესი, რუსეთის გავლენის აგენტები არიან. რეალურად, ძალიან ბევრს ნიშნავს. აშშ-ის პოლიტიკა საქართველოს მიმართ არის ორპარტიული. ის, რომ ელჩი რიკერი დარჩა საქართველოში და არ გაყვა სახელმწიფო მდივანს ისრაელში, იმის ინდიკაციაა, რომ ჩვენ სტრატეგიულ მოკავშირეს, ისევე როგორც ევროპის კავშირს შესანიშნავად ესმის, რაოდენ ღრმაა პოლიტიკური კრიზისი საქართველოში და როგორ გვჭირდება სტრატეგიული მოკავშირეების დახმარება, რომ გამოსავალი მოვნახოთ. ყურადღებით მოისმინეს ის, რაც ჩვენ ვუთხარით“, – განაცხადა ვაშაძემ.

რაც შეეხება პარტია “ლელოს” ერთ-ერთ ლიდერს, ბადრი ჯაფარიძეს, მისი თქმით, ოპოზიცია მზად არის გაგრძელდეს დიალოგის რეჟიმში ხელისუფლებასთან  ურთიერთობა, რომ მიღწეულ იქნეს ახალი არჩევნების დანიშვნა.

„შეხვედრა იყო იმასთან დაკავშირებით, რომ გაგვეცვალა მოსაზრებები ჩატარებულ არჩევნებთან დაკავშირებით და იმასთან მიმართებით, თუ რა გეგმები აქვს ოპოზიციას. ჩვენ გვქონდა ღია და კარგი საუბარი. გავაცანით ჩვენი პოზიცია თუ რატომ მივიჩნევთ ამ არჩევნებს გაყალბებულად, მოვისმინეთ ასევე სახელმწიფო მდივნის თანაშემწის შეხედულება იმასთან დაკავშირებით, თუ როგორ აპირებს აშშ ხელი შეუწყოს ამ კრიზისის განმუხტვას. ეს არის ძალიან მნიშვნელოვანი, რომ აშშ დარჩეს აქტიურად ჩართული ამ პროცესში, რომ ჩვენ მოვახერხოთ შეთანხმების მიღწევა, რომელიც სჭირდება ჩვენს ხალხს და ჩვენს ქვეყანას.

ჩვენ არ ვასაჯაროებთ საუბრის დეტალებს, არც წინა დიალოგის და არც ამ შეხვედრის დეტალებს”.

31 ოქტომბრის არჩევნებს ოპოზიცია არ ცნობს და აცხადებს, რომ ხელისუფლებამ არჩევნები გააყალბა, არ ცნობს შედეგებს და უარს ამბობს საპარლამენტო მანდატებზე.

ხელისუფლება არ აპირებს დათმობაზე წასვლას. პროცესებმა ქუჩაში გადაინაცვლა, დაძაბულობა მატულობს.

ოპოზიციას სამი ძირითადი მოთხოვნა აქვს:

1. ჩატარდეს ხელახალი საპარლამენტო არჩევნები;

2.გადადგეს ცენტრალური საარჩევნო კომისიის ხელმძღვანელი თამარ ჟვანია და საარჩევნო კომისიები სამართლიანი წესით დაკომპლექტდეს;

3. გათავისუფლდნენ პოლიტპატიმრები.