ომბუდსმენი "ქალებისა და არასრულწლოვანების მიმართ სიძულვილის ენის გახშირებულ შემთხვევებთან დაკავშირებით“ განცხადებას ავრცელებს
ომბუდსმენის განცხადება
საქართველოს სახალხო დამცველი ლევან იოსელიანი მოუწოდებს ყველა შესაბამის სუბიექტს, განსაკუთრებით, პოლიტიკური პარტიების წარმომადგენლებს, საჯარო პირებს, მედიაპლატფორმებსა და ჟურნალისტებს, გამოიჩინონ მაღალი სტანდარტის პოლიტიკური და სოციალური პასუხისმგებლობა, თავი შეიკავონ სიძულვილის ენის შემცველი, არაეთიკური განცხადებებისგან, – ამის შესახებ განცხადებას სახალხო დამცველი, ლევან იოსელიანი ავრცელებს.
როგორც ომბუდსმენი განმარტავს, მიუღებელია სიძულვილის ენის გამოყენება, რომელიც ავრცელებს, ახალისებს, ხელს უწყობს ან ამართლებს განსხვავებულ მოსაზრებასა თუ სოციალურ სტატუსზე დაფუძნებულ სიძულვილს. განსაკუთრებით მაშინ, როდესაც აღნიშნული რიტორიკა პირდაპირ ან ირიბად ეხება ბავშვებს.
“არასრულწლოვანების ან მათი ოჯახის წევრების პოლიტიკურ დისკუსიებში მონაწილეობა, მათ შორის, საჯარო სივრცესა თუ სოციალურ ქსელში, არ უნდა იქცეს ბავშვებისადმი დამამცირებელი, სტიგმატიზაციის ან სიძულვილის შემცველი შინაარსის გამავრცელებელი. საზოგადოების თითოეული წევრის მხრიდან, მნიშვნელოვანია, ბავშვების უფლებების განუხრელი პატივისცემა და განსაკუთრებული სიფრთხილე საჯარო გამოსვლებით არასრულწლოვანთა შესაძლო ზიანის თავის არიდების მიზნით.
გარდა ამისა, საგულისხმოა, რომ ადამიანის უფლებათა ევროპული სასამართლოს სტანდარტებით, მართალია, საჯარო ფიგურების მიმართ კრიტიკის ზღვარი უფრო ფართოა, თუმცა ეს არ მოიცავს, მათი პირადი ცხოვრების დეტალებით მანიპულირებას ან სექსისტურ შეფასებებს.
პოლიტიკოსის ოჯახური მდგომარეობა შეიძლება საზოგადოების ინტერესის საგანი გახდეს მხოლოდ იმ შემთხვევაში, თუ იგი უშუალოდ უკავშირდება მის საჯარო საქმიანობას – მაგალითად, ინტერესთა კონფლიქტის ან უფლებამოსილების ბოროტად გამოყენების შემთხვევას.
დემოკრატიულ საზოგადოებაში ყურადღება უნდა გამახვილდეს პოლიტიკური გადაწყვეტილებების შინაარსსა და მოქალაქეებზე მის გავლენასა და შედეგებზე.
სახალხო დამცველი კიდევ ერთხელ მოუწოდებს ყველა შესაბამის სუბიექტს, განსაკუთრებით, პოლიტიკური პარტიების წარმომადგენლებს, საჯარო პირებს, მედიაპლატფორმებსა და ჟურნალისტებს, გამოიჩინონ მაღალი სტანდარტის პოლიტიკური და სოციალური პასუხისმგებლობა, თავი შეიკავონ სიძულვილის ენის შემცველი, არაეთიკური განცხადებებისგან და ხელი შეუწყონ ღირსეულ, თანასწორობის პრინციპებზე დაფუძნებულ საზოგადოებრივ დიალოგს.“ – ნათქვამია ლევან იოსელიანის განცხადებაში, რომელსაც ომბუდსმენის აპარატი ავრცელებს.
რა მოხდა
ენმ-ს ლიდრმა, თინა ბოკუჩავამ 8 პარტიას თამარ ჩერგოლეიშვილთან თანამშრომლობის დასრულებაზე მიმართა. მიზეზად ბოკუჩავა კომენტარებს ასახელებს, რომლებიც “ფედერალისტების” ლიდერმა ერთ-ერთი მედიის FB-გვერდზე დაწერა. ჩერგოლეიშვილმა Facebook-ზე მის მიმართ შეურაცხმყოფელ კომენტარებს, ამ კომენტარების ავტორების პროფილიდან ამოღებული ბავშვების სურათების გამოყენებით უპასუხა.
მოგვიანებით, ჩერგოლეიშვილმა ბოდიში მოიხადა.
“უხამსი არარაობების პროფილზე (პროფილად ეყენათ არასრულწლოვანთა ფოტოები) ბავშვების საკითხზე:
აშკარაა, რომ თუ აზრის გამოხატვა მინდოდა, მეტი დრო უნდა დამეხარჯა იმის სათქმელად, რომ სანამ ადამიანს პირად ცხოვრებაში ჩაუძვრებიან მიზოგინური შხამით, ძვირფასი ადამიანები წარმოიდგინონ მათ ნაცვლად. აზრი ეს იყო – სანამ ადამიანს რაღაცას დააბრალებ, წარმოიდგინე, რომ შენთვის ძვირფას ადამიანს აბრალებენ იგივეს.
ახსნის ნაცვლად ავდექი და მოკლეზე წავედი, პირდაპირ მათივე პროფილის ფოტოები მივუბრუნე უხეშ ილუსტრაციად იმისა, რისი თქმაც მინდოდა და ამისთვის ბოდიში. ასე აღარ მოვიქცევი – სხვანაირად ვიტყვი.” – დაწერა ჩერგოლეიშვილმა.
