ოკუპირებული სამხრეთ ოსეთის ე.წ. პრეზიდენტმა მთავრობა დაითხოვა. მიზეზი სავარაუდოდ მილიარდობით რუბლის გაფლანგვა
სამხრეთ ოსეთის მინისტრთა კაბინეტის გადადგომა
სამხრეთ ოსეთის ე.წ. პრეზიდენტმა ალან გაგლოევმა მთელი კაბინეტი დაითხოვა, მათ შორის თავმჯდომარე კონსტანტინ ჯუსოევი. ბევრი მიიჩნევს, რომ ამის მიზეზი სოციალურ-ეკონომიკური განვითარების პროგრამის ჩავარდნა და მილიარდობით რუბლის გაფლანგვაა.
“მაგრამ ნუთუ პრეზიდენტმა ნამდვილად არ იცოდა, რა ხდებოდა?” – წერენ კრიტიკოსები.
ალან გაგლოევმა თავის გადაწყვეტილებას “ნორმალური სიტუაცია“ უწოდა და მისმა პრესსამსახურმაც კი განაცხადა, რომ ჯუსოევი ნებაყოფლობით გადადგა.
“მთავრობის გადადგომის საკითხი კონსტანტინ ჯუსოევთან ახალ წლამდე განიხილეს; ეს სტანდარტული პროცედურაა. მინდა მადლობა გადავუხადო კონსტანტინ ხასანოვიჩს დადებითი ცვლილებებისთვის. ამავდროულად, არის საკითხები, რომლებიც განსხვავებულ მიდგომას მოითხოვს. ასევე იქნება საკადრო ცვლილებები. ყველას ვთხოვ, სრულად შეასრულონ თავიანთი მოვალეობები ახალი მთავრობის ფორმირებამდე“, – განაცხადა ალან გაგლოევმა.
ე.წ. ვიცე-პრემიერი ძამბოლატ ტადტაევი კაბინეტის უფროსის მოვალეობის შემსრულებლად დაინიშნა.
კონსტანტინ ჯუსოევი ჩრდილოეთ ოსეთში მსხვილი სამშენებლო კომპანიის მფლობელია და ის გაგლოევმა პირადად მიიწვია კაბინეტის ხელმძღვანელად.
“მას შემდეგ, რაც ის მთავრობის მეთაურად დაინიშნა, სამხრეთ ოსეთში ყველა მსხვილი სამშენებლო კონტრაქტი, არაოფიციალური ინფორმაციით, მის კომპანიებს შვილობილი ორგანიზაციების მეშვეობით გადაეცათ. პრეზიდენტმა გაგლოევმა არა მხოლოდ ამის შესახებ იცოდა, არამედ ასეთი კორუფციული სქემების მთავარი ბენეფიციარიც იყო“, – ამტკიცებს ცხინვალში JAMnews-ის წყარო.
მსგავსმა ინფორმაციამ სამხრეთ ოსეთის Telegram არხებშიც გაჟონა. კერძოდ, ეს შეიძლება ეხებოდეს კორუფციულ სქემებს, რომლებიც რუსეთის მიერ სამხრეთ ოსეთის მხარდასაჭერად გამოყოფილი სამი მილიარდი რუბლის [დაახლოებით 39 მილიონი დოლარი] მითვისებას უკავშირდება.
მაგალითად, ერთ-ერთი ყველაზე მსხვილი Telegram არხი წერს, რომ კომპანიები, რომელთა მეშვეობითაც ეს ფული “გაირეცხა“ სახელმწიფო გარანტიებით გათვალისწინებული შეღავათიანი სესხების გამოყენებით, სავარაუდოდ, გაგლოევსა და ჯუსოევს ეკუთვნით, მაგრამ რეგისტრირებულია მათი ნათესავებისა და თანამოაზრეების ფიქტიურ დირექტორებზე.
ცოტა ხნის წინ, ვიცე-სპიკერმა და კომუნისტური პარტიის წევრმა ტაიმურაზ ტადტაევმა კონსტანტინ ჯუსოევის მიმართ კრიტიკა გააჟღერა.
ტადტაევმა მინისტრთა კაბინეტი და პირადად ჯუსოევი 2022–2025 წლების განვითარების პროგრამის ჩავარდნის გამო გააკრიტიკა და განაცხადა, რომ მათ მიერ დახარჯული 3 მილიარდი რუბლი სრულიად ფუჭად იყო გაფლანგული: ოთხი დაგეგმილი საწარმო არ ფუნქციონირებს, რის შედეგადაც ბიუჯეტმა მოსალოდნელი გადასახადების სახით რამდენიმე ასეული მილიონი რუბლი დაკარგა.
კომუნისტურმა ფრაქციამ ამ საკითხის გარკვევა მოითხოვა. აღმოჩნდა, რომ საწარმოები, რომლებშიც უზარმაზარი თანხები იყო ინვესტირებული, კერძო საკუთრებაში იყო.
“ჩვენ, ფრაქციაში, კატეგორიულად უკმაყოფილოები ვართ ამით. მე მჯერა, რომ ჩვენს პატარა რესპუბლიკაში ყველა მშენებარე საწარმო სახელმწიფო საკუთრებაში უნდა იყოს. ჩვენ არ გვაქვს რესურსების ფლანგვის შესაძლებლობა.
სახელმწიფოს, რომელსაც პრეზიდენტი, მთავრობა და პარლამენტი წარმოადგენს, ამ პროექტებზე გავლენის ბერკეტები უნდა ჰქონდეს. ყველაფერი სახელმწიფოს მონოპოლიზებული უნდა იყოს“, – ჩიოდა ტადტაევი.
JAMnews-ის ერთ-ერთმა წყარომ რუსეთთან შეთანხმებული სოციალურ-ეკონომიკური განვითარების პროგრამის შეუსრულებლობა ასევე მოიხსენია, როგორც კაბინეტის გადადგომის “ყველაზე რეალური მიზეზი“, რაც არსებითად ადასტურებს თეორიას, რომ მილიარდები ფუჭად დაიხარჯა.
ერთ-ერთ მიზეზად ასევე 2027 წელს დაგეგმილი ე.წ. საპრეზიდენტო არჩევნები სახელდება. ეს ნიშნავს, რომ გაგლოევის საპრეზიდენტო ვადის დასრულებამდე ერთ წელზე ოდნავ მეტი რჩება.
“არჩევნები კარს მოგვადგა; ჩვენ გვჭირდება პერსონალის განახლება, რათა დავაკმაყოფილოთ მოთხოვნები.“ – ხაზგასმით აღნიშნა წყარომ.
