ნიკა მელიას დაკავება. ყველა სიახლე ერთად

საქართველოში აკრედიტებული დიპლომატიური კორპუსის წარმომადგენლებს ოპოზიციური პარტიების ლიდერები ხვდებიან.

შეხვედრა ევროკავშირის ელჩის კარლ ჰარცელის რეზიდენციაში იმართება.

მთავრობის ადმინისტრაციის მიმდებარე ტერიტორიიდან წამოსული აქციის მონაწილეები პარლამენტთან მივიდნენ და კარავი გაშალეს.

მალე ხალხის რაოდენობამ მოიმატა და გადაიკეტა რუსთაველის გამზირიც. გზის გადაკეტვას აქციის მონაწილეები ტაშითა და ოვაციებით შეხვდნენ.

„ერთიანი ნაციონალური მოძრაობის“ ერთ-ერთი წევრის, ხატია დეკანოიძის განცხადებით, პარლამენტთან კარვები დარჩება და კიდევ მოემატება.

„აბა მოგვერიონ, ვერაფერს ვერ გვიზამენ. ეს კარავი სიმბოლურია, ჩვენ ისეთ წყობაში ვცხოვრობთ – ოლიგარქიულში, სადაც აქტივისტებს, ჩემს მეგობრებს – პოლიტიკურ ლიდერებს აპატიმრებენ”,– განაცხადა დეკანოიძემ.

ოპოზიციას ორი მთავარი მოთხოვნა აქვს – ნიკა მელიას გათავისუფლება და ვადამდელი საპარლამენტო არჩევნები.

ამ მიზნის მიღწევა ოპოზიცია პერმანენტული აქციებით აპირებს.

26 თებერვალს მასშტაბური აქცია დაანონსდა, რომელსაც რეგიონებიდან ჩამოსული ადამიანებიც უნდა შემოუერთდნენ. აქციას არა რომელიმე კონკრეტული პარტია, არამედ მთლიანად ოპოზიცია ატარებს – თითქმის ყველა პარტია, რომელიც ხელისუფლებას ოპონირებას უწევს, დღეს ერთად დგას.

“ჩვენ განმათავისუფლებელ მოძრაობას ვიწყებთ, რომელიც გპირდებით, რომ აუცილებლად მივა ბოლომდე. ნიკა მელიას დაჭერა ერთი ადამიანის გამოკეტვას სცდება. ძალიან გთხოვთ, არანაირი შიში, შემართება და ბრძოლა გამარჯვებამდე“, – მიმართა დამოუკიდებელმა ოპოზიციონერმა პოლიტიკოსმა ელენე ხოშტარიამ აქციის მონაწილეებს.

„მოგიწოდებთ ყველას განურჩევლად პარტიული კუთვნილებისა, დღეს ჩვენ, მთელი საქართველო უნდა გავერთიანდეთ დემოკრატიის და თავისუფლების გადასარჩენად,”– მიმართა „ლელოს” ლიდერმა, მამუკა ხაზარაძემ მომიტინგეებს.

მთავრობის ადმინისტრაციასთან ოპოზიციური პარტიების ორგანიზებით მიმდინარე საპროტესტო აქცია პარლამენტის შენობისკენ დაიძრა.

აქციის მონაწილეთა განცხადებით, “მთავარი ბოროტება ერთპარტიული პარლამენტია”, ამიტომ აქცია პარლამენტთან გაგრძელდება.

აქცია საქართველოს ჰიმნით გაიხსნა.

აქციის მონაწილეებს უჭირავთ ტრანსფარანტები სადაც წერია, რომ საქართველო აღარ დაბრუნდება საბჭოთა კავშირში.

ოპოზიციონერი ლიდერების განცხადებით, მათ ხელისუფლებასთან ორი მთავარი მოთხოვნა აქვთ – ნიკა მელიას გათავისუფლება და რიგგარეშე არჩევნების დანიშვნა.

აქციას შეუერთდნენ სამოქალაქო აქტივისტებიც. ადგილზე მობილიზებული არიან სამართალდამცველები.

ნიკა მელია მოინახულა სახალხო დამცველის წარმომადგენელმა.

ნინო ლომჯარიას ინფორმაციით, “ნაციონალური მოძრაობის” თავმჯდომარის ნიკა მელიას ჯანმრთელობის მდგომარეობა დამაკმაყოფილებელია და ამ წუთის მდგომარეობით მოპყრობასთან დაკავშირებით მას პრეტენზიები არ გააჩნია.

ლომჯარია მოუწოდებს ხელისუფლებას გაათავისუფლონ მელია

“არაერთი განცხადება გავაკეთე და მიმაჩნია, რომ აღკვეთი ღონისძიების სახით პატიმრობის გამოყენება არ იყო სათანადოთ დასაბუთებული. წინასწარი პატიმრობის გამოყენება ეს არ არის დასჯის ფორმა, ის უნდა გამოვიყენოთ მაშინ, თუ არსებობს დასაბუთებული ეჭვი, რომ ბრალდებული მიიმალება ან გაანადგურებს მტკიცებულებებს. ასეთი მტკიცებულებები სახალხო დამცველმა ვერ დაინახა. სახალხო დამცველის ჩათვლით და საერთაშორისო პარტნიორებიც, ყველა აფრთხილებდა ხელისუფლებას, რომ მსგავსი მოვლენების განვითარება დაგვაშორებდა დასავლეთ პარტნიორებთან.

მოვლენების ასეთ განვითარებას მივყავართ ჩიხისკენ. მმართველი პარტიის და ოპოზიციის მომხრეებს არავის არ სურს ქვეყანაში იყოს ასეთი პოლარიზაცია და რადიკალიზაცია. მოვუწოდებ ხელისუფლებას, რომ დაუყოვნებლივ გადადგას ნაბიჯები სიტუაციის დეესკალაციისკენ. ჩემთვის ერთ-ერთი ასეთი ნაბიჯი იქნება ნიკა მელიას გათავისუფლება”, – განაცხადა ნინო ლომჯარიამ.

იმ მოცემულობაში, რომელიც ქვეყანაში შეიქმნა, ხელისუფლებას აქვს რთული არჩევანი, მაქსიმალურად მოკლე დროში გამონახოს იურიდიული ინსტრუმენტები და პატიმრობიდან გაათავისუფლოს ნიკა მელია, შემდეგ გადადგას ქმედითი ნაბიჯები და მოძებნოს ის გამოსავალი, რომელიც ქვეყანას თავიდან ააცილებს ურთულეს კონფრონტაციულ სპირალში შესვლას, –  წერს საქართველოს ყოფილი პრემიერ-მინისტრის გიორგი კვირიკაშვილი.

ევროკავშირის ელჩი საქართველოში კარლ ჰარცელი აცხადებს, რომ ესკალაციის ლოგიკა იმარჯვებს და პოლიტიკური კრიზისი ღრმავდება.

საქართველოში დღეს განვითარებული მოვლენების გამო, ელჩი ჰარცელი აღნიშნავს, რომ „ყველა მხარემ პასუხისმგებლობა უნდა გამოიჩინოს და ქვეყნისა და საქართველოს ხალხის საუკეთესო ინტერესების შესაბამისად იმოქმედოს. საერთო ენის გამონახვის მცდელობებზე უარი არ უნდა ითქვას“.

• ნინო ლომჯარიამ თქვა, რომ წიწაკის სპრეის გამოყენება დახურულ სივრცეში მთელი რიგი კონვენციებით აკრძალულია და უტოლდება არაადამიანურ მოპყრობას.

მანამდე ნინო ლომჯარიამ ფეისბუკზე დაწერა: “არაფერი იმაზე სამარცხვინო არ შეიძლება მომხდარიყო 23 თებერვალს, საქართველოს დამოუკიდებლობის დაკარგვისა და გასაბჭოებოდან 100 წლის თავზე, როგორც ოპოზიციური პარტიის ოფისის დარბევა და ოპოზიციის ლიდერის დაპატიმდება, რასაც აუცილებლად მოყვება საბჭოთა საქართველოს მსგავსად დასავლური სამყაროსგან საქართველოს გაუცხოება და დაშორება.. ალბათ, ესეც არის მიზანი… საკუთარი მოქალაქეების მიმართ სიძულვილით დაბრმავებულ ხელისუფალს ძალის დემონსტრირება ჰგონია წარმატება, ამ დროს კი 1 ვაქცინაც არაა შემოტანილი ქვეყანაში, ფასები ძვირდება და ხალხი შიმშილის ზღვარზეა”

“დღეს საქართველომ უკან დაიხია ევროატლანტიკურ სახელმწიფოთა ოჯახში უფრო ძლიერი დემოკრატიისკენ მიმავალ გზაზე” – წერია აშშ-ის საელჩოს ფეისბუკ-გვერდზე გამოქვეყნებულ განცხადებაში.

პირველი საერთაშორისო გამოხმაურებები მელიას დაკავებაზე