მოსამართლე თამარ მჭედლიშვილმა ნიკა კაცია სასამართლო დარბაზიდან გაათავისუფლა
ნიკა კაცია თავისუფალია
პროევროპული აქციების დროს, ნარკოდანაშაულის ბრალდებით დაკავებული ნიკა კაცია მოსამართლე თამარ მჭედლიშვილმა უდანაშაულოდ ცნო და დარბაზიდან გაათავისუფლა.
მოსამართლის გადაწყვეტილებით, ბრალდება — სისხლის სამართლის კოდექსის 260-ე მუხლის მე-6 ნაწილის “ა“ პუნქტით (განსაკუთრებით დიდი ოდენობით ნარკოტიკული საშუალების შეძენა-შენახვა) — დაუსაბუთებლად ჩაითვალა და კაცია სრულად გათავისუფლდა პასუხისმგებლობისგან.
ნიკა კაცია 2024 წლის 8 დეკემბერს დააკავეს. ადვოკატის თქმით, მას სამართალდამცავები სახლთან დახვდნენ და ქუჩაში გაჩხრიკეს. დაცვის მხარე დაკავებას პოლიტიკურად მოტივირებულად აფასებს და აცხადებს, რომ ბრალდება მტკიცებულებებზე არ არის დამყარებული.
პროკურატურა თავიდანვე ითხოვდა პატიმრობას, რადგან მათი თქმით, არსებობდა დანაშაულის განმეორებით ჩადენის, მიმალვის ან მტკიცებულებების განადგურების საფრთხე.
ადვოკატი აღკვეთის ღონისძიებად გირაოს გამოყენებას ითხოვდა, თუმცა მოსამართლემ ეს არ გაითვალისწინა და კაციას წინასასამართლო სხდომამდე ორთვიანი პატიმრობა შეუფარდა.
ეს უკვე მესამე შემთხვევაა ბოლო პერიოდში, როდესაც სასამართლომ ნარკოდანაშაულში ბრალდებული აქტივისტი გაამართლა. მანამდე მოსამართლე რომეო ტყეშელაშვილმა გაათავისუფლა გიორგი ახობაძე, რომელსაც ასევე ნარკოდანაშაულის ბრალდება ჰქონდა, ხოლო მოსამართლე თამარ ტყეშელაშვილმა სასამართლო დარბაზიდან თედო აბრამოვი გაათავისუფლა.
დღეს, მოსამართლე ნინო გალუსტაშვილმა სინდისის 11 პატიმარს პატიმრობა მიუსაჯა. მან ბრალი 226-ე მუხლით (ჯგუფური მოქმედების ორგანიზება და მასში აქტიურად მონაწილეობა) გადააკვალიფიცირა და ყველა ბრალდებულს 2-2 წლით პატიმრობა მიუსაჯა.
დღესვე პროევროპული აქციების დროს დაკავებულ საბა სხვიტარიძეს მოსამართლე ჯვებე ნაჭყებიამ 2 წლით პატიმრობა მიუსაჯა. საბა სხვიტარიძეს თბილისის პოლიციის დეპარტამენტის დეტექტივების მთავარი სამმართველოს უფროსის, მირიან ქავთარაძის ჯანმრთელობის განზრახ მსუბუქ დაზიანებას ედავებოდნენ.
