"ევროკავშირი საქართველოს უსაფრთხოებას გააძლიერებს" - NDI-ს კვლევის მთავარი მიგნებები
NDI-ს კვლევის მთავარი მიგნებები
ეროვნულ-დემოკრატიულმა ინსტიტუტმა (NDI) გამოაქვეყნა ახალი სოციოლოგიური კვლევის შედეგები. კვლევის მიხედვით, უკრაინაში ომის დაწყების შემდეგ, რუსეთთან ეკონომიკური ურთიერთობების შეზღუდვას საქართველოს უფრო მეტი მოქალაქე უჭერს მხარს. ასევე, საქართველოს მოქალაქეების უმრავლესობა ეკონომიკის გაუარესებას, პრორუსული ძალების გააქტიურებას და რუსულ აგრესიას ელის. აღსანიშნავია ისიც, რომ უკრაინაში რუსეთის შემდეგ მეტი ადამიანი ფიქრობს, რომ ევროკავშირი საქართველოს ეკონომიკას და უსაფრთხოებას გააძლიერებს.
სოციოლოგიური გამოკითხვა NDI-ის დაკვეთით CRRC საქართველომ ჩაატარა.
საველე სამუშაოები სამ ნაწილად ჩატარდა – 3-15 თებერვალსა და 9-20 მარტს შემთხვევითი სატელეფონო გამოკითხვების, ხოლო 15-22 მარტს – ფოკუს ჯგუფების მეშვეობით.
3-15 თებერვალს 2 036 დასრულებული ინტერვიუ (18% გამოპასუხება, AAPOR სტანდარტების მიხედვით) ჩატარდა, საშუალო ცდომილების ზღვარი +/- 1.8%-ია.
9-20 მარტის ინტერვიუების რაოდენობა 2 024 იყო (18% გამოპასუხება, AAPOR სტანდარტების მიხედვით). ამ შემთხვევაში საშუალო ცდომილების ზღვარი +/-1.6%-ს შეადგენდა.
რაც შეეხება ფოკუსჯგუფებს, ონლაინ-დისკუსიები თბილისში, ბათუმში, თელავში, ზუგდიდში,
ახალქალაქსა და მარნეულში ჩატარდა. თითოეულ ქალაქში ორი ჯგუფი გამოკითხეს.
რა წერია NDI-ს ახალ კვლევაში:
მოლოდინი
კვლევის თანახმად, საქართველოს მოქალაქეების უმრავლესობა ეკონომიკის გაუარესებას, პრორუსული ძალების გააქტიურებას, რუსულ აგრესიას ელის.
აღსანიშნავია, რომ ახალგაზრდები ყველაზე პესიმისტურად არიან განწყობილები. კვლევის თანახმად, თბილისის მცხოვრებლები პრორუსული პოლიტიკური ძალების გააქტიურებაზე ყველაზე მეტად ღელავენ.
● გამოკითხულთა 80% ელის ეკონომიკური მდგომარეობის გაუარესებას;
● 57% – პრორუსული ძალების გააქტიურებას;
● 52% – რუსულ სამხედრო აგრესიას საქართველოს მიმართ;
● 32% მიიჩნევს, რომ ამჟამინდელი მდგომარეობის გათვალისწინებით ევროკავშირთან საქართველოს ურთიერთობები გაუარესდება.
მოსახლეობის 81% ფიქრობს, რომ რუსეთის უკრაინაში შეჭრის გამო მათი ოჯახების ეკონომიკური მდგომარეობა გაუარესდება.
NDI-ს კვლევის თანახმად, მოსახლეობის 52%-ის აზრით, მომავალი 1 წლის განმავლობაში მოსალოდნელია რუსეთის სამხედრო აგრესია საქართველოს წინააღმდეგ.
ომი
საქართველოში გამოკითხულთა 78 პროცენტი მიიჩნევს, რომ უკრაინაში ომის დაწყება რუსეთისა და პუტინის ბრალია.
კითხვაზე, თუ ვისი ბრალია უკრაინაში ომი, გამოკითხულთა 67% უშუალოდ რუსეთს ასახელებს, 11% – პუტინს, 9% – აშშ-ს, უკრაინას – 5%, ნატოს – 3%, ხოლო ევროკავშირს – 2%.
ევროკავშირი
კვლევის მიხედვით, უკრაინაში რუსეთის სრულმასშტაბიანი შეჭრის შემდეგ, საქართველოში მეტი ადამიანი ფიქრობს, რომ საქართველო ევროკავშირს დაშორდა.
● 36%-ის აზრით, უკრაინაში ომის დაწყების შემდეგ, საქართველო ევროკავშირს უფრო დაშორდა;
● 24% თვლის, რომ საქართველოს ურთიერთობა ევროკავშირთან არ შეცვლილა;
● 26%-ის აზრით საქართველო უფრო დაუახლოვდა ევროკავშირს.
კვლევის თანახმად, ომის დაწყების შემდეგ, უფრო მეტი ადამიანი ფიქრობს, რომ ევროკავშირი საქართველოს ეკონომიკასა და უსაფრთხოებას გააძლიერებს.
ამავე კვლევით გამყარდა მოსაზრება, რომ საქართველოს ევროკავშირთან მჭიდრო ურთიერთობა უნდა ჰქონდეს, ხოლო რუსეთთან პარტნიორობის მხარდაჭერამ იკლო.
“საქართველო ჩემი სახლია”
NDI-ის კვლევიდან ვიგებთ, რომ გამოკითხულთა 97% არ აპირებს ქვეყნის დატოვებას და ეთანხმება მოსაზრებას, რომ საქართველო მისი სახლია.
ასევე, 87% მიიჩნევს, რომ საზოგადოებაში სოციალური სოლიდარობის მაღალი დონეა. 62%-ს სჯერა, რომ კრიზისის დროს მთავრობა სწორ გადაწყვეტილებას მიიღებს, 28%-ს არ სჯერა, ხოლო 9%-მა არ იცის.
კვლევის ავტორები აღნიშნავენ, რომ ახალგაზრდები, თბილისის
მცხოვრებლები და ოპოზიციის მხარდამჭერები მთავრობის მიერ კრიზისის დროს სწორი გადაწყვეტილებას უფრო ნაკლებად ელოდებიან.
სავიზო რეჟიმი რუსეთის მოქალაქეებს
კითხვაზე, “თქვენი აზრით, უნდა შემოიღოს თუ არა საქართველოს მთავრობამ სავიზო რეჟიმი რუსეთის მოქალაქეებისთვის?”, 66% პასუხობს, რომ უნდა შემოიღოს, 23% წინააღმდეგია, 11%-მა არ იცის, ხოლო კითხვაზე პასუხს არ სცემს გამოკითხულთა 1%.
NDI ხაზს უსვამს, რომ რუსეთის მოქალაქეებისთვის სავიზო რეჟიმის დაწესებას ყველაზე მეტად “ქართული ოცნების” მხარდამჭერები, კაცები და 55+ ასაკის მოქალაქეები არ ეთანხმებიან.
პოლიტიკური პარტიები
NDI-ის კვლევის მიხედვით, გამოკითხულთა უმრავლესობამ არ იცის ან არ ასახელებს იმ პარტიას, რომელიც მის შეხედულებებთან ყველაზე ახლოს დგას.
კონკრეტული პარტია მოსახლეობის მხოლოდ 35%-მა დაასახელა:
● ქართული ოცნება – 22%
● ნაციონალური მოძრაობა – 7%
● სხვა პარტიები 6%
როგორ ვითარდება ქვეყანა
საზოგადოების უმეტესობის აზრით, საქართველო არასწორი მიმართულებით ვითარდება:
● “ქვეყანა არასწორი მიმართულებით ვითარდება” – 44%
● “საქართველო საერთოდ არ იცვლება” – 17%
● “სწორი მიმართულებით ვითარდება” – 28%
