მზია ამაღლობელის გათავისუფლების შუამდგომლობით ადვოკატები სასამართლოს მიმართავენ. რა იქნება შემდეგ?
მზია ამაღლობელის პატიმრობა
პატიმარი მედია მენეჯერის მზია ამაღლობელის ადვოკატები, 13 თებერვალს, ბათუმის საქალაქო სასამართლოს აღკვეთი ღონისძიების გაუქმების შუამდგომლობით მიმართავენ. ადვოკატები ხაზგასმით ამბობენ, რომ შუამდგომლობას არ აყენებენ მისი შიმშილობის გამო. ისინი აცხადებენ, რომ შუამდგომლობა ეყრდნობა მხოლოდ სამართლებრივ არგუმენტებს და ასაბუთებს, რომ მზია ამაღლობელის პატიმრობა უსაფუძვლოა.
- პრესის საერთაშორისო ინსტიტუტი და 12 ორგანიზაცია მზია ამაღლობელის დაუყოვნებლივ გათავისუფლებას ითხოვს
- 300-ზე მეტი ჟურნალისტი მზია ამაღლობელის გათავისუფლებას ითხოვს
- “მზია ამაღლობელს ჰქონდა ჯანმრთელობის პრობლემები, შიმშილობის ფონზე არსებობს გართულების რისკი” – ომბუდსმენი
მზია ამაღლობელი, ონლაინგამოცემების, „ბათუმელებისა“ და “ნეტგაზეთის” დამფუძნებელი და მედიამენეჯერია. ის ერთი თვეა მეტია დაპატიმრებულია ბათუმის პოლიციის უფროსისთვის სილის გაწვნის გამო. ამ ფაქტს წინ უძღოდა ჭყლეტა და პროვოკაცია, რომელიც პოლიციამ მოაწყო.
დაპატიმრების დღიდან მზია ამაღლობელი შიმშილობს. 12 თებერვალი მისი შიმშილობის 32-ე დღეა. ბოლო ერთი კვირაა ის კლინიკაშია გადაყვანილი და როგორც მისი მკურნალი ექიმი ამბობს, “ყოველი მომდევნო დღე ორგანოების ფუნქციის მოშლის დიდი რისკია”.
მზია ამაღლობელი, წერილებში, რომელსაც ციხიდან კოლეგებს უგზავნის, წერს, რომ ის არ შიმშილობს შეღავათების მისაღებად. ის ამბობს, რომ ეს არის მისი პროტესტი უსამართლობის მიმართ.
ამ დეტალს ხაზი გაუსვეს მისმა ადვოკატებმაც სპეციალურ ბრიფინგზე, რომელიც დღეს, 12 თებერვალს გაიმართა.
“შეგნებულად, ამ შუამდგომლობაში არცერთი სიტყვა არ არის მის შიმშილობაზე. ჩვენ შუამდგომლობას არ ვაყენებთ ამ ფაქტის გამო. შუამდგომლობა ეყრდნობა მხოლოდ სამართლებრივ არგუმენტებს, რომ მისი პატიმრობა არის უსაფუძვლო”, – ამბობს მისი ერთ-ერთი ადვოკატი მაია მწარიაშვილი.
„ახალგაზრდა იურისტთა ასოციაციის“ თავმჯდომარე ნონა ქურდოვანიძე, რომელიც ასევე იცავს მზია ამაღლობელის უფლბებს, ამბობს, რომ ბრალდება უკანონოა და მის მიმართ უკანონოდ არის გამოყენებული აღკვეთის ღონისძიება, პატიმრობა.
„ეს საქმე აკმაყოფილებს ყველა იმ კრიტერიუმს, რომელიც ამ საქმეზე პოლიტიკური ნიშნით დევნას ადასტურებს“, – ამბობს იგი.
ადვოკატ მაია მწარიაშვილის შეფასებით კი, “მზია ამაღლობელი პოლიტიკური პატიმარია, ვინაიდან მისი დევნა თავსდება ევროპის საბჭოს საპარლამენტო ასამბლეის N1900(2012) რეზოლუციით განსაზღვრულ კრიტერიუმებში”.
ადვოკატები მოითხოვენ:
- სასამართლომ დაუშვას დაცვის მხარის შუამდგომლობა, გააუქმოს მზია ამაღლობელის მიმართ შერჩეული აღკვეთის ღონისძიება და გაათავისუფლოს მზია ამაღლობელი უკანონო პატიმრობიდან;
- საქართველოს პროკურატურამ დაუყოვნებლივ შეწყვიტოს მზია ამაღლობელის უკანონო ბრალდების საქმე;
- სპეციალურმა საგამოძიებო სამსახურმა შეასრულოს მასზე დაკისრებული ვალდებულება და სათანადოდ გამოიძიოს მზია ამაღლობელის მიმართ ჩადენილი არასათანადო მოპყრობის ფაქტი;
- პროკურატურამ მიანიჭოს მზია ამაღლობელს დაზარალებულის სტატუსი;
- საქართველოს პროკურატურამ დაიწყოს სისხლისსამართლებრივი დევნა გრიგოლ ბესელიას და მისდამი დაქვემდებარებული პოლიციის შესაბამისი მოხელეების მიმართ, მზია ამაღლობელის უკანონო დაკავების და უკანონო ადმინისტრაციული სამართალწარმოების გამო;
- საქართველოს პროკურატურამ დაიწყოს სისხლისსამართლებრივი დევნა ირაკლი დგებუაძის მიმართ 2025 წლის 12 იანვარს დაკავებული მზია ამაღლობელის მიმართ ჩადენილი არასათანადო მოპყრობისა და 2025 წლის 11 იანვრის აქციაზე, ბათუმში, ციალა ქათამაძის უკანონო დაკავების გამო;
- საქართველოს პროკურატურამ დაიწყოს დევნა შინაგან საქმეთა სამინისტროს ყველა იმ მოხელის წინააღმდეგ, რომლებმაც მონაწილეობა მიიღეს ბათუმში 2025 წლის 11-12 იანვრის საპროტესტო აქციის მონაწილეთა უკანონო ადმინისტრაციულ დაკავებასა და უკანონო ადმინისტრაციულ სამართალწარმოებაში.
რას ნიშნავს ეს შუამგომლობა და რა უნდა მოჰყვეს მას?
გამოცემა “ბათუმელების” თანახმად, სასამართლო ვალდებულია შუამდგომლობის დარეგისტრირებიდან 24 საათში განიხილოს მისი დასაშვებობის საკითხი და შესაბამისი განჩინება გამოსცეს.
თუ სასამართლო მზია ამაღლობელის შუამდგომლობას დასაშვებად მიიჩნევს, მან პატიმრობაში მყოფი მზია ამაღლობელისთვის აღკვეთი ღონისძიების გაუქმების საკითხი შემდეგ 24 საათში არსებითად უნდა განიხილოს.
ზეპირი მოსმენის სხდომას ბრალდებულიც უნდა დაესწროს. ამ შემთხვევაში მზია ამაღლობელის ჯანმრთელობის მდგომარეობაზეა დამოკიდებული, იგი ფიზიკურად დაესწრება ამ პროცესს, თუ დისტანციურად.
მზია ამაღლობელის ერთ-ერთი ადვოკატის, გიორგი ხიმშიაშვილის თქმით, არ არსებობს სამართლებრივი გარემოება, რომლის საფუძველზეც შეიძლება მოსამართლემ შუამდგომლობის განხილვაზე უარი თქვას.
მისივე განმარტებით, ახალ სამართლებრივ გარემოებებს, რაზეც შუამდგომლობაშია საუბარი, ახლავს შესაბამისი მტკიცებულებები.
„ამ საქმეში არის სამართლებრივი სიახლეები, სამართლებრივი გარემოებები, რაც, ჩვენი მოსაზრებით, იძლევა შესაძლებლობას, რომ დასაშვებობის ეტაპი შუამდგომლობამ გადალახოს,“ – აცხადებს გიორგი ხიმშიაშვილი.
იურისტის თქმით, ერთი თვე გავიდა მას შემდეგ, რაც მზია ამაღლობელს პატიმრობა შეუფარდეს და ძირითადი საგამოძიებო მოქმედებები უკვე ჩატარდა.
თუ მოსამართლემ მზია ამაღლობელის შუამდგომლობა აღკვეთი ღონისძიების გაუქმებაზე დაუშვებლად მიიჩნია, ამ განჩინების გასაჩივრება შესაძლებელია სააპელაციო წესით.
რა ვიცით მზია ამაღლობელის ჯანმრთელობის მდგომარეობაზე
4 თებერვლიდან მზია ამაღლობელი კლინიკა “ვივამედშია” გადაყვანილი. ის მშრალ შიმშილობაზეა, მხოლოდ წყალს იღებს.
დღეს “ვივამედის” კლინიკურმა დირექტორმა, ზურაბ ჩხაიძემ თქვა, რომ მზია ამაღლობელის ჯანმრთელობის მონიტორინგი კლინიკის პირობებში გაგრძელდება.
ვიცით, რომ მზია ამაღლობელი ითხოვდა ციხეში დაებრუნებინათ, მაგრამ, ექიმებმა ის დააარწმუნეს, რომ კლინიკაში დარჩეს.
ექიმმა დღეს თქვა, რომ პატიმარი ჟურნალისტისთვის შიმშილობის ამ ვადაზე გადაადგილება მარტივი არაა, თუმცა ცდილობს იმოძრაოს. მისივე განცხადებით, ამ დრომდე პაციენტს გონების კარგვის შემთხვევა არ ჰქონია:
„ხანგრძლივ შიმშილობის პროცესი არის ძალიან რთული ფიზიოლოგიური პროცესი. შიმშილობის ყოველი დღე არის დაკავშირებული გართულებასთან – ეს არის ნახშირწყლოვანი წვა, ცხიმების წვა, ცილების წვა და შინაგანი რესურსების გამოყენება, რაც იწვევს პირველ რიგში, კარდიოვასკულარულ გართულებებს, სხვადასხვა ორგანოების ფუნქციების მოშლას და ა.შ”.
ექიმის განცხადებით, კლინიკა მზადაა, ა ყოველდღიურად ახორციელებს მონიტორინგს და სთავაზობს მზია ამაღლობელს შესაბამის სერვისს.
მაგრამ, ხაზი გაუსვა, რომ “ყოველი შემდგომი დღე, განსაკუთრებით 30 დღის შემდგომ, ეს არის ძალიან დიდი რისკი სხვადასხვა ორგანოების ფუნქციის მოშლის და გართულებების“.
დამოუკიდებელი ონლაინ გამოცემების, “ბათუმელებისა” და “ნეტგაზეთის” დამფუძნებელი და მედიამენეჯერი მზია ამაღლობელი 11-12 იანვრის ღამეს, ბათუმში, პოლიციის სამმართველოსთან მიმდინარე აქციაზე ორჯერ დააკავეს.
თავდაპირველად იგი დააკავეს პოლიციის შენობაზე სტიკერის გაკვრისთვის, რომელზეც ეწერა – “იფიცება საქართველო”. რამდენიმე საათში იგი გაათავისუფლეს ხელწერილის საფუძველზე. მაგრამ, მალევე მზია ამაღლობელი კვლავ დააკავეს პოლიციის უფროს ირაკლი დგებუაძისთვის სილის გაწვნის ფაქტზე. ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.
მზია ამაღლობელს სისხლის სამართლის დანაშაულს, პოლიციელზე თავდასხმას ედავებიან. მას 4-დან 7 წლამდე პატიმრობა ემუქრება. აღკვეთის ღონისძიების სახით მზია ამაღლობელს წინასწარი პატიმრობა აქვს შეფარდებული.
მზია ამაღლობელის პატიმრობა
