24 იანვარს ჩატარებული ტესტებით საქართველოში კორონავირუსით ინფიცირების 15 ათას 762 ახალი შემთხვევა გამოვლინდა. გარდაიცვალა 42 ადამიანი.
როგორც დაავადებათა კონტროლის ცენტრის ხელმძღვანელი, ამირან გამყრელიძე ამბობს, რეალურად, კორონა-დადებითი შემთხვევების რიცხვი სამი-ოთხჯერ მეტია. ანუ შეიძლება ქვეყანაში ახლა ერთდროულად 45-60 ათას ადამიანს სჭირდეს კორონავირუსი.
მიუხედავად ამისა, საქართველოს ხელისუფლება ფაქტობრივად აუქმებს “მწვანე პასპორტს”, რომელსაც ორჯერადად აცრილ ან კორონაგადატანილ პირებზე გასცემდა.
ეს და სხვა კორონა-სიახლეები ერთად თავმოყრილი:
შემთხვევების უმრავლესობა “ომიკრონია”
● კორონადადებითი შემთხვევის 90 პროცენტი ომიკრონის შტამია. დანარჩენი ათი პროცენტის შემთხვევაში კი კვლავ დელტა ცირკულირებს.
● „ომიკრონით“ დაინფიცირების საშუალო ასაკი 33.7 წელია.
● ბავშვების ხვედრითი წილი საერთო ინფიცირების არ არის გაზრდილი. 19 წლამდე ბავშვების წილი 18-19 პროცენტის ფარგლებშია.
● საქართველოში “ომიკრონის” ორივე ქვეშტამი მოძრაობს – BA1 და BA2. როგორც საერთაშორისო ლიტერატურა ამბობს, BA2 ქვეშტამს კიდევ უფრო სწრაფი გადადების უნარი, თუმცა უფრო მსუბუქია, ვიდრე დიდი ალბათობით, რადგან ვიდრე BA1.
● ამირან გამყრელიძე ამბობს, რომ „ომიკრონის“ ცირკულაცია მომავალი ორი კვირის განმავლობაში ქვეყანაში კიდევ უფრო გაიზრდება.
● გამყრელიძის თქმით, “ომიკრონის” დადასტურებული შემთხვევებიდან დაახლოებით 1 პროცენტს დასჭირდა ჰოსპიტალიზაცია. „დაახლოებით 1600 ლაბორატორიულად დადასტურებული შემთხვევა გვაქვს გამოკვლეული და მათგან ჰოსპიტალიზაცია 16-მდე ადამიანს დასჭირდა. იქიდან 13 ადამიანი სწრაფადვე გაეწერა, სამი რჩება, არცერთს არ დასჭირვებია ინტენსიური თერაპია და ხელოვნური ვენტილაცია,” – განაცხადა მან.
● გამყრელიძის თქმით, “ომიკრონი” ისეა მოდებული, რომ ტესტირება აუცილებელი არ არის. მინიმალური სიმპტომების შემთხვევაში მოქალაქე უნდა დარჩეს სახლში და ჩათვალოს, რომ “ომიკრონი” აქვს.
“დღეს მივმართავ მოსახლეობას და ვთხოვ, უსიმპტომო ადამიანების ამ ეტაპზე ტესტირებას და კონტაქტებს არავითარი მნიშვნელობა არ აქვს. ნუ გადავტვირთავთ ლაბორატორიებს… სიმპტომებიანი ადამიანები სასურველია, რომ გაიტესტონ”.
მზად არიან თუ არა ექიმები და ჰოსპიტალური სექტორი
● ჯანდაცვის მინისტრის მოადგილის, თამარ გაბუნიას თქმით, კოვიდ-შემთხვევების მკვეთრ მატებასთან ერთად, არ მომხდარა ჰოსპიტალურ სექტორში პაციენტების აქტიური ზრდა. გაბუნია ამბობს, რომ ქვეყანას არა აქვს საწოლფონდის პრობლემა – საწოლების დაახლოებით 45 პროცენტი თავისუფალია. იგივე ეხება ბავშვების საწოლფონდსაც.
● მისი თქმით, მთავარი დატვირთვა ონლაინ კონსულტაციებზე, ოჯახის ექიმებზე და ლაბორატორიებზე მოდის.
● 24 იანვარს ცხელ ხაზზე 5600 ზარი დაფიქსირდა, რაც რეკორდული რაოდენობაა.
● საქართველოში 102 ონლაინ კლინიკა ფუნქციონირებს, სადაც ქვეყნის მასშტაბით განაწილებულია 2 500 ექიმი.
როგორ მიდის ვაქცინაციის პროცესი
“ვაქცინაციის პროგრამა გრძელდება, თუმცა ჯერჯერობით ისევ საჭიროა გააქტიურება”, – ამბობს ჯანდაცვის მინისტრის მოადგილე თამარ გაბუნია.
● 25 იანვრის მონაცემებით სულ ჩატარებულია 2 667 808 აცრა. მინიმუმ ერთი დოზით ვაქცინირებულია 1 322 175 ადამიანი, რაც 18 წელს ზემოთ ასაკის მოსახლეობის 46 პროცენტია. სრულად ვაქცინირებულია 1 210 361 ადამიანი – 42.1%
● ბუსტერ დოზით აცრილია 133 109 ადამიანი.
● საქართველოში ვაქცინაცია 12 წლიდან არის დასაშვები. 12-15 წლის მოზარდებში მინიმუმ ერთი დოზით აცრილია 3 797 ბავშვი (2.14%). 16-17 წლის მოზარდებში კი მინიმუმ ერთი დოზით აცრილია 12 364 (15.25%).
● 24 იანვარს ჩატარდა 8 634 აცრა.
● ვაქცინაციის პროცესის წასახალისებლად, 50 წელს ზემოთ ადამიანებს 100-ლარი ეძლევათ „ბუსტერ“ დოზის გაკეთების სანაცვლოდ. ჯანდაცვის მინისტრის მოადგილე ამბობობს, რომ ფინანსურმა წახალისებამ ყველაზე უკეთ იმუშავა 65 წელს ზემოთ პირებში.
მწვანე პასპორტის აღება გამარტივდა. სხვა ახალი ცვლილებები
● საკოორდინაციო საბჭოზე გადაწყდა, რომ კოვიდ-პასპორტის ასაღებად სულაც არ არის აუცილებელი აცრის გაკეთება ან PCR ტესტის დადებითი პასუხი.
“პირები, რომლებსაც სიმპტომების მიუხედავად ტესტი არ გაუკეთებიათ, მაგრამ ოჯახის ექიმის მეთვალყურეობის ქვეშ იმყოფებოდნენ, კორონავირუსგადატანილებად ჩაითვლებიან და „მწვანე პასპორტი“ მიეცემათ,” – განაცხადა ამირან გამყრელიძემ.
ანუ “მწვანე პასპორტის” მიღება ამიერიდან შეეძლება ფაქტობრივად ყველას, ვისაც ექნება სურდო და დაუკავშირდება ოჯახის ექიმს.
● კიდევ ერთი ცვლილება ის არის, რომ 1-ელი თებერვლიდან საქართველოში შეჩერდება უსიმპტომო პირების ე.წ. სისტემური ტესტირება (ეს არ ეხება სამედიცინო პერსონალს). ანუ, მაგალითად, თუ აქამდე მასწავლებლები ორ კვირაში ერთხელ იტესტებოდნენ, 1-ლი თებერვლიდან აღარ გაივლიან გეგმურ ტესტირებას. ეს იმიტომ კეთდება, რომ ყველაზე დიდი დატვირთვა “ომიკრონის” პირობებში სწორედ ლაბორატორიებზე მოდის.
