"მთავრობა კარს ვუხსნით ყველა პოლიტიკურ მოთამაშეს" - საქართველოს პრემიერი ბრიუსელშია
საქართველოს პრემიერი ბრიუსელშია
მთავრობა კარს ვუხსნით ყველა პოლიტიკურ მოთამაშეს, ყველა ოპოზიციურ პარტიას – ამის შესახებ საქართველოს პრემიერმინისტრმა ირაკლი ღარიბაშვილმა ბრიუსელში, საქართველო-ევროკავშირის ასოცირების საბჭოს მე-7 სხდომის დასრულების შემდეგ, ერთობლივ პრესკონფერენციაზე განაცხადა, რომელსაც საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელი, ჯოზეფ ბორელი და ევროკომისარი გაფართოებისა და სამეზობლო საკითხებში, ოლივერ ვარჰეი ესწრებოდნენ.
“კიდევ ერთხელ მინდა გავუსვა ხაზი, გავიმეორო და დავადასტურო ჩვენი სრული მზაობა, რომ ყველა პოლიტიკურ პარტიასთან, ყველა ოპოზიციურ პარტიასთან ვითანამშრომლებთ, მათ შორის მათთან, ვინც პარლამენტში, ან პარლამენტს მიღმა არიან, ასევე სამოქალაქო საზოგადოებასთან. როგორც ბატონმა ჟოზეფ ბორელმა ბრძანა, არა მარტო მთავრობა, არამედ, მთელი პოლიტიკური სპექტრი უნდა იღებდეს ამ პროცესში მონაწილეობას. ამიტომ, ეს არის ჩვენი ნათელი განზრახვა და მოტივაცია. საქართველო არის მზად, მმართველი პარტია არის მზად, რომ 12-ვე პრიორიტეტი შესრულდეს”, – განაცხადა ღარიბაშვილმა.
როგორც პრესკონფერენციაზე ჯოზეფ ბორელმა აღნიშნა, ევროკავშირში გაწევრიანების პროცესი რთულია, მაგრამ ევროკავშირი მზადაა საქართველოს დაეხმაროს. როგორც ბორელმა განმარტა, ევროკავშირში გაწევრიანების გზა საზოგადოების ყველა ფენის მხარდაჭერას გულისხმობს, “მაგრამ რა თქმა უნდა, მმართველ ძალას აქვს ყველაზე დიდი პასუხისმგებლობა.”
“ჩვენ ვნახეთ, რომ პროცესში არის სრული ჩართულობა არა მხოლოდ საზოგადოების მხრიდან, არამედ პოლიტიკური პარტიებიდანაც. როდესაც საუბარი მაქვს პოლარიზაციაზე, ორ პოლუსზე მაქვს საუბარი. ვსაუბრობ მთავრობასთან, რომელსაც მთავარი პასუხისმგებლობა აკისრია, მაგრამ აქვე ვგულისხმობ მთელს პოლიტიკურ სპექტრს. ყველამ უნდა გააცნობიეროს, რომ ეს არის ინკლუზიური პროცესი. ყველამ უნდა მიიღოს მონაწილეობა, ყველა მოთამაშემ.” – განაცხადა უსაფრთხოების საკითხებში ევროკავშირის უმაღლესმა წარმომადგენელმა.
ოლივერ ვარჰეიმ აღნიშნა, რომ უნდა შესრულდეს 12-ვე პუნქტი, რადგან ევროკავშირი დამსახურების საფუძველზე ფართოვდება.
ევროკომისარმა, ამასთანავე, ისაუბრა თუ რატომ არის მნიშვნელოვანი ევროკავშირის 12 პუნქტის შესრულება. ეს, მისი თქმით, ქვეყნის საჭიროებებზეა მორგებული და გათვლილია საქართველოს პროგრესისთვის.
“რეფორმების იმის საფუძველზე იქმნება, თუ ადგილზე რა უნდა მუშაობდეს ქვეყნის, ეკონომიკის, საზოგადოების და ხალხის სასიკეთოდ. ამიტომ, რეალური ინტეგრაცია ადგილზე უნდა დაიწყოს. მეტი ევროპელი ინვესტორი ჩამოვა, მეტი ვაჭრობა დაიწყევა, მეტი სამუშაო ადგილი შეიქმნება, მეტი სოციალური ჩართულობა იქნება, – ეს ყველაფერი კი იმ წესების საფუძველზე, რომელიც აქ იქმნება, ეს არის ევროპული ინტეგრაცია.”
● “თუ ომით განისაზღვრება სტატუსის მინიჭება, ჩვენ ომი არ გვინდა”, – საქართველოს პრემიერის გზავნილები
● “ჩალის ფასი”, “ფეიკი”, “ომში ჩათრევა” – ხელისუფლება ევროპარლამენტის რეზოლუციაზე
13 ივლისს ცნობილი გახდა, რომ ევროკომისია საქართველოსთვის ევროკავშირის მიერ გაწერილი 12 პუნქტის შესრულების შესახებ შეფასებას 2022 წლის ნაცვლად, 2023 წლისთვის მოამზადებს. ამის შესახებ ევროპარლამენტში გამოსვლისას ევროკომისიის წარმომადგენელმა, მაიკლ რუპმა ისაუბრა.
ევროკომისიამ საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე 17 ივნისს დასკვნა მოამზადა. შედეგად, უკრაინა და მოლდოვა მიიღებენ ევროკავშირის კანდიდატობის სტატუსს და დაეკისრებათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალება, შემდეგ კი კანდიდატობის სტატუსის მიღების შანსი ექნება.
საქართველომ, უკრაინამ და მოლდოვამ ევროკავშირის წევრობის კანდიდატობაზე განაცხადა ერთად შეიტანა. ევროკავშირში გაწევრიანების განაცხადი საქართველომ 3 მარტს წარადგინა. 11 აპრილს კი ევროკავშირისგან თვითშეფასების კითხვარის პირველი ნაწილი მიიღო. კითხვარები მიიღეს უკრაინამ და მოლდოვამაც.
რეზოლუცია, საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ, ევროპარლამენტმა 9 ივნისს დაამტკიცა.
