აფხაზეთში პოლიციის სისასტიკით დაზარალებული მოზარდის დედამ სისტემასთან ბრძოლა მარტომ დაიწყო.
ყველაფერი 17 აპრილს დაიწყო: სოხუმში მცხოვრებმა ირინა აჟბამ საკუთარ ფეისბუქზე დაწერა, რომ პოლიციის თანამშრომლები მის თექვსმეტი წლის ვაჟს, გიორგი გამგიას თავს დაესხნენ.
კრიმინალური პოლიციის თანამშრომლები, სამოქალაქო ტანსაცმელში გამოეკიდნენ მას ეზოში, შემდეგ კი სახლში შეიჭრნენ.
„შვილი დეიდას სტუმრობდა. ბავშვები კომპიუტერულ თამაშებს თამაშობდნენ და შუქის ჩაქრობამდე ისხდნენ. შემდეგ მან დატოვა ჩემი დის სახლი, რომელიც იქვე ცხოვრობს და სახლისკენ გაემართა.
გზად შეამჩნია, რომ შავი მარკ X მანქანა 088 სანომრე ნიშნით, დაბურული შუშებით, მიჰყვებოდა. მანქანა რომ მიუახლოვდა და გაჩერდა, ბავშვს შეეშინდა და სახლისკენ გაიქცა.
გასაღებებით ჭიშკარი ვერ გავაღე, ამიტომ გადავწყვიტე ღობეზე ასვლა. ამ დროს ორმა სამოქალაქო ტანსაცმელში გამოწყობილმა უცნობმა მამაკაცმა თმებში მოკიდა ხელი და აიტაცა.
ბავშვის მამა გამოვიდა და ჭიშკარი გააღო. არაფერი აუხსნეს, ეზოში შევარდნენ, მეორე სართულზე ავიდნენ და ბავშვი ხელში აიტაცეს. ბავშვმა შიშისგან ყვირილი და ტირილი დაიწყო და პოლიციას უთხრა, რომ სტკიოდა.
პასუხად სახლიდან ძალით გაიყვანეს. თავში, სახეში მუშტები ჩაარტყეს, მანქანაში ჩასვეს და ტელეფონი დაუმტვრიეს. მამამ მისი შეჩერება სცადა, საპასუხოდ კი მასაც სცემეს“.
ასე აღწერა მოზარდის დედამ, ირინა აჟბამ იმ ღამის მოვლენები. მისი თქმით, ბიჭს განვითარების შეფერხება აქვს და ამ შემთხვევამ მისი მდგომარეობა გააუარესა.
ამ პოსტის გამოქვეყნებიდან რამდენიმე დღეში, როდესაც ჟურნალისტები მომხდარით დაინტერესდნენ, სოხუმის პროკურატურამ გამოძიება დაიწყო. პროკურატურის პრესსამსახურმა სოციალურ ქსელში გაავრცელა ინფორმაცია, რომ „გიორგი გამგია დააკავეს უცნობმა პირებმა, რომლებმაც თავი პოლიციელად წარმოადგინეს“.
პროკურატურის განცხადებაში ნათქვამია, რომ შემოწმების შედეგებიდან გამომდინარე, გადაწყვეტილება კანონის შესაბამისად იქნება მიღებული. მაგრამ ერთ კვირაზე მეტი გავიდა, მოზარდის მიმართ ძალადობის ფაქტს კი სამართლებრივი შეფასება არ მიუღია.
ამავდროულად, კრიმინალური გამოძიების დეპარტამენტის უფროსი ალფრედ ნარმანია დაუკავშირდა ირინა აჟბას და ეცადა სიტუაციის “მოგვარებას” – მან დაარწმუნა მშობელი, რომ დაევიწყებინა ეს ყველაფერი. ტელეფონზე საუბრისას მან უთხრა აჟბას, რომ სახალხოდ “არ იყო საჭირო” ამაზე ლაპარაკი.
თუმცა დედამ ნარმანიასთან საუბარი ჩაიწერა და ჩანაწერი ჟურნალისტებს გადასცა.
ბავშვთა უფლებების კომისარმა მაქტინა ჯინჯოლიამ მოზარდის დაკავების გარემოებების გარკვევის მიზნით მიმართა შსს-სა და პროკურატურას.
მოზარდის დაკავების მიზეზებთან დაკავშირებით შსს-ს მხოლოდ ერთი განმარტება აქვს: „მას თავზე კაპიუშონი ჰქონდა მოხურული და ამან გამოიწვია ოპერატიული ინტერესი“. შინაგან საქმეთა სამინისტროს პრესსამსახურში სხვა მიზეზებს არ ასახელებენ.
ასევე, შსს არ ასახელებს მოზარდზე თავდასხმის პოლიციელების ვინაობას და არც გიორგი გამგიას მიმართ განხორციელებულ ძალადობაზე საუბრობს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
