მოსამართლეთა კონფერენციაზე ე.წ. ვეტინგის სისტემა დაგმეს და იუსტიციის საბჭოს 2 მოსამართლე წევრი აირჩიეს
მოსამართლეები და ვეტინგის სისტემა
საქართველოში მოსამართლეთა 32-ე კონფერენციაზე ვეტინგის სისტემა დაგმეს და იუსტიციის საბჭოს 2 მოსამართლე წევრი და მდივანი აირჩიეს. იუსტიციის საბჭოს მოსამართლე წევრები ვასილ მშვენიერაძე და ლევან თევზაძე იქნებიან, მდივანი კი ნიკოლოზ მარსაგიშვილი. ამის შესახებ აშშ-ის მიერ სანქცირებულმა მოსამართლემ, ლევან მურუსიძემ განაცხადა.
“იუსტიციის უმაღლეს სკოლაში გამართულ კონფერენციაზე განიხილეს უზენაესი სასამართლოს მიერ რამდენიმე დღის წინ გავრცელებული განცხადება, სადაც ნათქვამია, რომ ე.წ. “ვეტინგი” ერთმნიშვნელოვნად, არსებითად და პრინციპულად ლახავს სასამართლოსა და ინდივიდუალური მოსამართლის დამოუკიდებლობას.
აღნიშნულ განცხადებას მოსამართლეებმა ერთხმად დაუჭირეს მხარი. საქართველოს მოსამართლეთა XXXII კონფერენციას 295 მოსამართლე ესწრებოდა”. – წერია კონფერენციის დასრულების შემდეგ გავრცელებულ განცხადებაში.
“მე ვარ კეთილსინდისიერი მოსამართლე. წლების განმავლობაში მიდის სასამართლო სისტემის დისკრედიტაცია, მიდის პირდაპირ მოსამართლეების დევნა, დემონიზაცია, ქმნიან ნოყიერ ნიადაგს იმისთვის, რომ მოხდეს სასამართლო სისტემიდან მოსამართლეების გაყრა.” – ამბობს ლევან მურუსიძე.
“ქართული ოცნების” თავმჯდომარე და ყოფილი პრემიერმინისტრი, ირაკლი ღარიბაშვილი ე.წ. ვეტინგის სისტემის შესახებ დასმულ კითხვაზე პასუხობს, რომ დღეს ქართული სასამართლო გამართულად მუშაობს და ხელისუფლება არ დაუშვებს არავის ჩარევას ქართულ მართლმსაჯულებასა და სასამართლო სისტემაში.
ღარიბაშვილმა ასევე განაცხადა, რომ საქართველო, კანონის უზენაესობის მიხედვით, ლიდერია აღმოსავლეთ ევროპის ქვეყნებს შორის, ამიტომ “გარედან მოწვეული უცხოელი მოქალაქეების” მიერ მოსამართლეთა კეთილსინდისიერების პროცესს ეწინააღმდეგება.
“საერთაშორისო ორგანიზაციების რეიტინგების მიხედვით, ჩვენი ქვეყანა არამარტო რეგიონში, არამედ აღმოსავლეთ ევროპის ქვეყნებს შორის პირველ ადგილზე არის კანონის უზენაესობის მიხედვით. ჩვენ გვაქვს პრეტენზია და ამბიცია, რომ ვიყოთ სუვერენული სახელმწიფო. ამ დროს ჩვენ გვეუბნებიან, რომ მოვიწვიოთ უცხოელი მოქალაქეები. ჯერ ერთი, ვინ დასვა, ვინ შეამოწმა მათი კეთილსინდისიერება. საერთოდ თავმოყვარეობა არ გვაქვს დამოუკიდებელს ერს, რომ გარედან არ მოვიწვიოთ უცხო ქვეყნის მოქალაქეები და მათ არ შეგვიმოწმონ ჩვენი მოსამართლეების კეთილსინდისიერება?!“, – თქვა ღარიბაშვილმა ჟურნალისტებთან საუბრისას.
მისივე თქმით, დღეს ქართული მართლმსაჯულება და სასამართლო სისტემა ყოველგვარი უცხოური ჩარევისგან დამოუკიდებელია.
“დღეს ჩვენ გვყავს საამაყო, ქართული სასამართლო.” – ამბობს ირაკლი ღარიბაშვილი.
წინაისტორია
უზენაესმა სასამართლომ 11 მარტს გამოაქვეყნა განცხადება, რომლის მიხედვითაც, ის კატეგორიულად ეწინააღმდეგება საქართველოში მოსამართლეთა კეთილსინდისიერების შემოწმების საგანგებო პროცედურის, ე.წ. ვეტინგის დანერგვას.
ევროკომისიის გაფართოების ანგარიშში, რომელშიც საქართველოსთვის კანდიდატის სტატუსის მინიჭებაზეა საუბარი, ნახსენებია მართლმსაჯულების სისტემაში დანიშნული პირების კეთილსინდისიერების შემოწმება – ე.წ ვეტინგი.
ვეტინგის სისტემა არის მოდელი, რომლის ფარგლებშიც მოწმდება მოსამართლეთა კეთილსინდისიერება და პროფესიონალიზმი, კომისია კი უცხოელი და ქართველი ექსპერტებით უნდა დაკომპლექტდეს. ამას ითხოვს ვენეციის კომისიაც.
“ქართული ოცნება” ამბობს, რომ პროცესში უცხოელი პარტნიორების მონაწილეობით ქვეყნის სუვერენიტეტს საფრთხე შეექმნება. მმართველი გუნდის განმარტებით, ე.წ. ვეტინგის სისტემა ოპოზიციის ინიციატივაა და მიზნად “საქართველოს სუვერენიტეტისთვის ძირის გამოთხრას” ისახავს.
● როგორ მივიდა საქართველოს სასამართლო სისტემა დასავლურ სანქციებამდე
● “ქართულმა ოცნებამ” კვლავ შეუშალა ხელი მოსამართლეების კორუფციის საკითხზე საგამოძიებო კომისიის შექმნას
“ოცნებისა და სასამართლო კლანის გზავნილები ევროპულ არჩევანზე ღიად უარის თქმაა” – პარტია “ახალი”
პარტია “ახალის” განცხადებით, მოსამართლეთა კეთილსინდისიერების შემოწმებაზე “ქართული ოცნებისა” და სასამართლო კლანის გზავნილები ქართველი ხალხის ევროპულ არჩევანზე ღიად უარის თქმას ნიშნავს.
მათი განმარტებით, “ქართული ოცნება” საკუთარი გადაწყვეტილებებით ქართველი ხალხის ისტორიული მისწრაფების აღსრულებას შეუძლებელს ხდის.
ნაცვლად იმისა, რომ ხელისუფლებას შემხვედრი ნაბიჯი გადაედგა, საქართველოს პრემიერმინისტრმა კვლავ განაცხადა, რომ ქართული ოცნებისთვის საკითხი დახურულია და მმართველი პარტია არ აპირებს ევროკავშირის გაწევრიანების გზაზე აუცილებელი რეფორმების გატარებას.
ასევე, დღესვე, მოსამართლეთა კონფერენციაზე დასანქცირებულმა სასამართლო კლანმა ერთი-ერთში გაიმეორა მმართველი პარტიის დეზინფორმაციული გზავნილები ევროკომისიის მიერ განსაზღვრული რეფორმების დისკრედიტაციის მიზნით. ეს კი ქართველი ხალხის ევროპულ არჩევანზე ღიად უარის თქმას ნიშნავს.
ევროკავშირი არის ღირებულებებზე, პასუხისმგებლობებსა და ვალდებულებებზე დაფუძნებული ცივილიზაციური ერთობა. რუსეთისგან განსხვავებით, ის სხვა სახელმწიფოებს აღიქვამს თანასწორ პარტნიორებად და პატივს სცემს ხალხის არჩევანს. ჩვენი არჩევანია საქართველოს ევროკავშირში გაწევრიანება, რასაც წინ მმართველი პარტია ეღობება და საკუთარი გადაწყვეტილებებით ქართველი ხალხის ამ ისტორიული მისწრაფების აღსრულებას შეუძლებელს ხდის.” – ვკითხულობთ განცხადებაში.
● მოსაზრება: გვარამიას შეუძლია სერიოზული ინტელექტუალური წვლილი შეიტანოს ალიანსში – მაგრამ ის არ არის ხალხოსანი
● “ჩვენი პარტია არის ახალი, ჩვენ ვართ ერთად” – ნიკა მელია და ნიკა გვარამია საარჩევნოდ ერთიანდებიან
