ახალი კრიმინალური ომი - ანტალიაში საქართველოში დაბადებული "კანონიერი ქურდი" მოკლეს

20 აგვისტოს, თურქეთში, საქართველოს მოქალაქეობის მქონე, აზერბაიჯანელი „კანონიერი ქურდი“, ნადირ სალიფოვი, იგივე “გული“ მოკლეს. ხმაურიანი მკვლელობის სავარაუდო მიზეზი მოსკოვის დიდ საბითუმო ბაზრებზე, რამდენიმე კრიმინალურ დაჯგუფებას შორის გავლენის სფეროების გადანაწილებაა. თუმცა განიხილება რევანშის ვერსიაც.

მკვლელობა გახდა ერთ-ერთი ყველაზე განხილვადი თემა სოციალურ ქსელებში, კონკრეტულად კი პოსტსაბჭოთა იმ ქვეყანებში, სადაც მაფიის გავლენა ჯერ კიდევ საკმაოდ ძლიერია.

• როგორ აქცია ვლადიმირ პუტინმა ქუჩის კრიმინალი მაფიოზურ სახელმწიფო მანქანად

• ნოემბერი, 2019 – სოხუმში ორი ე.წ. “კანონიერი ქურდი” მოკლეს

• გერმანული პოლიცია სომხური მაფიის საქმიანობას სწავლობს

თურქული გაზეთი „Daily Sabah“-ი წერს, რომ ხმელთაშუა ზღვის რეგიონში, ანტალიის პროვინციაში, სერიქში, სასტუმროს რესტორანში ვახშმობისას, სალიფოვს მისმა პირადმა მცველმა ოთხჯერ ესროლა. სალიფოვი საავადმყოფოში გადაიყვანეს, მაგრამ მიღებული ჭრილობებისგან გარდაიცვალა.

სხვა წყაროები კი ავრცელებენ ცნობას იმის შესახებ, რომ “გული” სასტუმროს ნომერში მოკლა მისმა უახლოესი გარემოცვის წევრმა, ხაგან ზეინალოვმა (“ხან აჰმედილნსკი”), რის შემდეგაც მიმალვა სცადა, თუმცა ის თურქმა სამართალდამცავებმა ანტალია-დენზილის ტრასაზე დააკავეს.

სისასტიკით გამორჩეული კრიმინალური ავტორიტეტი მეტსახელად „გული“ 

“ლოთი გული” – ეს მეტსახელია. ნებისმიერ რამეს შეიძლება უკავშირდებოდეს მის მეტსახელში სიტყვა „გული“, მაგრამ არანაირად – სალიფოვის “მგრძნობიარე ნატურას”.

უკვე 21 წლის ასაკში, “გულის” 15 წლით თავისუფლების აღკვეთა მიუსაჯეს ყაჩაღობისა და გამოსასყიდის მიღების მიზნით ადამიანის გატაცების ბრალდებით. მალე ამ ვადას კიდევ 10 წელი დაუმატეს სხვა დანაშაულებისთვის, მათ შორის, გაუპატიურების, რომელიც უკვე ციხეში ჩაიდინა.

ყოფილი საბჭოთა კავშირის ტერიტორიაზე, ერთ-ერთი ყველაზე ცნობილი აზერბაიჯანელი კანონიერი ქურდი, ნადირ სალიფოვი 1972 წლის 28 აგვისტოს, საქართველოში, დმანისის რაიონის სოფელ მამიშლოში დაიბადა.

იქ მიიღო მან თავისი პირველი პასპორტი და საბჭოთა კავშირის დანგრევის შემდეგ, ავტომატურად გახდა სუვერენული საქართველოს მოქალაქე.

1990-იანი წლების დასაწყისში, თავის მეგობარსა და თანამემამულესთან, ოთარ ბადალოვთან ერთად ის ბაქოში დასახლდა, სადაც ჩაიდინა კიდეც პირველი დანაშაულები (ბადალოვი მოგვიანებით მოსკოვში, სუში-ბარში ჩაცხრილეს ორ “კოლეგასთან” ერთად).

1996 წლის დეკემბერში, სალიფოვი სისხლის სამართლის მუხლების მთელი ჩამონათვალით გაასამართლეს, მათ შორის – ქურდობის, ბანდიტიზმისა და ადამიანების გატაცების მუხლებით. ის გამოძიებასთან გარიგებაზე არ წავიდა, თავის ბრალდებულად ცნობაზე უარი განაცხადა, რის გამოც სასჯელის სრული ვადა – 15 წლით თავისუფლების აღკვეთა შეეფარდა.

2000 წელს, ნადირ სალიფოვი „კანონიერი ქურდი“ გახდა. მისი „კორონაციის“ ორგანიზება კი პოსტსაბჭოთა მაფიის სამი გავლენიანი კანონიერი ქურდის – რაულ ქირიას („რაულ რუსთავსკის“), ჯეირან ასლანოვის („ჯეირან რუსთავსკის“) და თენგიზ ლუარსაბიშვილის (“თენგო რუსთავსკის”) სურვილით მოხდა.

“გული“ 2001 წელს უნდა გათავისუფლებულიყო, მაგრამ ციხეში ჩადენილი გაუპატიურების ბრალდებით, მას სასჯელის არცთუ ისე პატარა ვადა დაემატა.

გამოძიების მასალების მიხედვით, 2001 წლის მაისში, ერთ-ერთმა პატიმარმა სალიფოვთან კარტში წააგო და ვერ შეძლო 280 ათასი მანათის (დაახლოებით, 165 ათასი დოლარის) გადახდა. ამის შემდეგ, სალიფოვმა წაგებულის ცოლს დაურეკა, ქმრის მკვლელობით დაემუქრა და კოლონიაში მისვლა აიძულა.

უკანონო გზით მან ის შიგნით შეიყვანა და არაერთხელ გააუპატიურა.

ამას გარდა, დაადგინეს, რომ სალიფოვმა ნომერ მე-6 და მე-16 კოლონიებში, ასევე გობუსტანის დახურული ტიპის ციხეში ყოფნის დროს, ძმის დახმარებით შიგნით რვა ქალის შეყვანა მოახერხა, რომელთა სახელებიც გამოძიებისთვის ცნობილია.

სპეციალურ შენობებში, რომლებიც მას დაწესებულების პასუხისმგებელმა პირებმა უკანონოდ გამოუყვეს, სალიფოვი აუპატიურებდა ქალებს და ამ საქმეში სხვა პატიმრებიც ჩართო.

სალიფოვის ადვოკატებმა განაცხადეს, რომ ეს ყველაფერი ფალსიფიცირებული იყო მისი პატიმრობის ვადის გაგრძელების მიზნით და დაჟინებით მოითხოვდნენ მის საქართველოში ექსტრადირებას, მაგრამ უშედეგოდ. მაშინ, მოწმის სახით მიყვანილი გოგოები სასამართლო დარბაზში ხუმრობდნენ და ამბობდნენ, რომ “არანაირი ძალადობა არ ყოფილა და ჩვენ ამ მომსახურებაში 500 დოლარი გადაგვიხადესო”

„გულის“ პატიმრობის ვადა 2020 წელს სრულდებოდა, მაგრამ 2018 წელს, ის ქალაქ ბაქოს ყარადაღის რაიონის სასამართლოს გადაწყვეტილების საფუძველზე გაათავისუფლეს.

ციხიდან გამოსვლის შემდეგ, 2018 წლიდან, ნადირ სალიფოვი აკონტროლებდა მოსკოვში ერთ-ერთ უმსხვილეს საბითუმო ბაზარს – „ფუდ სიტის“, რომელიც მანამდე მისი დაუძინებელი მტრის, კიდევ ერთი გავლენიანი ახალგაზრდა აზერბაიჯანელი კანონიერი ქურდის, როვშან ჯანიევის (“როვშან ლენკორანსკი”) კონტროლქვეშ იყო. სწორედ ნადირ სალიფოვს ასახელებენ ჯანიევის მკვლელობის შემკვეთად. ჯანიევი ზუსტად ოთხი წლის წინ, სტამბოლში, მანქანაში ჩაცხრილეს.

როგორც მედია წერს, რუსეთის დედაქალაქში, კალუგის შოსეზე, 85 ჰექტარზე განთავსებული აგროკლასტერის სხვადასხვა ობიექტზე, 13 ათასზე მეტი ადამიანი მუშაობს და მათი უმეტესობა, სალიფოვის თანამემამულეები არიან.

გათავისუფლებისთანავე ნადირ სალიფოვი საქართველოს გავლით თურქეთში გადავიდა და იქ სტამბოლში, სასახლეში ცხოვრობდა. თუმცა, Daly Sabah-ი წერს, რომ შესვლისთანავე, თურქეთიდან სალიფოვის დეპორტირება მოხდა და ის იქ უკანონოდ დაბრუნდა.