"ქართული ოცნების" შემომწირველებთან პანდემიის დროს მრავალმილიონიანი კონტრაქტები გაფორმდა - IDFI
“ინფორმაციის თავისუფლების განვითარების ინსტიტუტის” (IDFI) მიერ ჩატარებული კვლევით ირკვევა, რომ პანდემიის დროს, საჯარო უწყებებმა “ქართული ოცნების” შემომწირველ კომპანიებთან გამარტივებული შესყიდვის გზით მილიონობით ლარის ღირებულების კონტრაქტები გააფორმეს.
განსაკუთრებულ ყურადღებას იქცევს ორი კომპანია: შპს “მზიური” და შპს “ალფა”. ორივე კომპანიის დირექტორები “ქართული ოცნების” მსხვილი შემომწირველები არიან და ორივე მათგანი ბიუჯეტის ფულით რუსულ პროდუქციას ყიდულობს.
მუნიციპალიტეტები კი ხშირად ერთ მომწოდებელთან აფორმებენ ხელშეკრულებებს.
მმართველი პარტიის შემომწირველი კომპანიები საკვები პროდუქტის შესყიდვებში
სოფლისა და სოფლის მეურნეობის განვითარების სააგენტომ 3 აპრილს 4,5 მლნ-ზე მეტი ლარის ღირებულების ხელშეკრულება გააფორმა შპს მზიურთან – 1,500,000 ლიტრი მზესუმზირის ზეთის შესაძენად.
ხელშეკრულების დანართის თანახმად, შპს მზიური რუსული წარმოების ზეთს ყიდულობს.
შპს მზიურის დირექტორი შოთა ბასილაშვილია, ხოლო სამეთვალყურეო საბჭოს წევრი – დიმიტრი რამიშვილი. ორივე მათგანს, ერთსა და იმავე დღეს ქართული ოცნებისა და სალომე ზურაბიშვილისათვის 80-80 ათასი ლარი აქვთ შეწირული.
შპს მზიურის 100%იანი წილის მფლობელი აკაკი ახვლედიანია, რომელიც მრავალ კომპანიაში ფლობს წილს. ახვლედიანის ერთ-ერთი ბიზნეს პარტნიორია ნოდარ საბანაძე, რომელიც ქართული ოცნების შემომწირველია და ამასთან, დაკავშირებულია შსს მინისტრის მოადგილესთან, კახაბერ საბანაძესთან. მედიაში გავრცელებული ინფორმაციით, ნოდარ საბანაძე დგას ასევე ერთ-ერთი სამკერვალო კომპანიის უკან, რომელსაც ეკონომიკის სამინისტრომ პროექტის – „აწარმოე საქართველოში” ფარგლებში პირბადეების შეკერვა დაუკვეთა.
3 აპრილს გაფორმდა 8 მლნ 934 ათასი ლარის ღირებულების ხელშეკრულება შპს ალფასთანათ – 5 000 ტონა შაქრისა და 500 ტონა მაკარონის შესასყიდად.
ხელშეკრულების თანახმად, 500 ტონა მაკარონი, რომელშიც სახელმწიფომ 212,400$ გადაიხადა, რუსული წარმოების იქნება.
შპს ალფას 100% წილის მფლობელი კობა კურდღელაშვილია, რომელიც მე-7 მოწვევის პარლამენტის წევრი იყო ერთიანი ნაციონალური მოძრაობიდან. 2016 წელს მან ქართულ ოცნებას სწორედ შპს ალფას სახელით 120 000 ლარი შესწირა.
კურდღელაშვილის მონაწილეობა კიდევ 9 კომპანიაში ფიქსირდება. მისი ბიზნეს პარტნიორები სხვადასხვა კომპანიებში არიან როგორც ქართული ოცნების შემომწირველები, ასევე მმართველ პარტიასთან სხვა სახით დაახლოებული პირები. მაგალითად, კურდღელაშვილის ბიზნეს პარტნიორია ვაჟა ოქრიაშვილი, რომელიც პსპ ფარმას დირექტორი და ამავე კომპანიაში კახაბერ ოქრიაშვილის 95%-იანი წილის მმართველია. თავის მხრივ, კახაბერ ოქრიაშვილი საქართველოს პარლამენტის წევრია ქართული ოცნებიდან.
შპს “მადაგონი-2”
რუსთავის მუნიციპალიტეტმა 25 მარტიდან 11 მაისის ჩათვლით 17 გამარტივებული ხელშეკრულება დადო. ამ ხელშეკრულებების ჯამური ღირებულება 411 532 ლარია. ყველა ხელშეკრულება შპს „მადაგონი 2-თან” არის გაფორმებული.
შპს “მადაგონი-2-ის” დირექტორი იური ბედინეიშვილია. მან 2016 წელს ქართულ ოცნებას 60 000 ლარი შესწირა.
შპს “მადაგონი 2-თან” 5 ხელშეკრულება გააფორმა გარდაბნის მუნიციპალიტეტმაც. ამ ხელშეკრულებების ჯამური ღირებულება 243 741 ლარია.
ამ კომპანიამ covid-19-თან დაკავშირებული გამარტივებული შესყიდვებით ჯამში 655 000 ლარზე მეტი მიიღო.
ჯანდაცვის სამინისტროს განახლებული შესყიდვები
საქართველოს ჯანდაცვის სამინისტრომ 2020 წლის 24 აპრილს გამარტივებული შესყიდვის მორიგი ხელშეკრულება გააფორმა, რომლის ფარგლებშიც ამჯერად კორონავირუსის გამოსავლენად 30 000 სწრაფი ტესტი შეიძინა. ამ შესყიდვის ჯამური ღირებულება 930 000 ლარია.
პროდუქტის მწარმოებელ ქვეყნად ნიდერლანდებია მითითებული, კომპანია კი, რომელმაც ჯანდაცვის სამინისტროს აღნიშნული ტესტები ჩამოუტანა, შპს „სოლემარტია”. მისი 100%-იანი წილის მფლობელიც და დირექტორიც ზურაბ ტუკვაძეა. უშუალოდ მასთან მიმართებით არანაირი საეჭვო კავშირი არ იძებნება, თუმცა მისი ბიზნეს პარტნიორები სხვა კომპანიებში, მმართველი პარტიის შემომწირველები არიან და “ქართული ოცნებისთვის” ჯამში 63 000 ლარი აქვთ შეწირული.
მედიაში გავრცელებული ინფორმაციით, აღნიშნული სწრაფი ტესტები სინამდვილეში ჩინური წარმოებისაა და ის ნიდერლანდურმა კომპანიამ საკუთარი ეტიკეტით გადაფუთა. არსებობს კითხვები ტესტების ხარისხთან დაკავშირებითაც. აღნიშნული ინფორმაციის გავრცელების შემდეგ, 12 მაისს, სოლემარტის დამფუძნებელმა, ზურაბ ტუკვაძემ განაცხადა, რომ ჯანდაცვის სამინისტრომ მასთან ხელშეკრულება შეწყვიტა 8 მაისს, რადგან მას ტესტები ხელშეკრულებაში მითითებულ დროისთვის ვერ ჩამოჰქონდა. თუმცა, მსგავსი შეთანხმება სახელმწიფო შესყიდვების ელექტრონულ სისტემაში ატვირთული არ არის.
“გამარტივებული შესყიდვები არის კორუფციული რისკების შემცველი – ჩვენ ამ დროს ნაკლებად გვაქვს კონტროლის მექანიზმი, რადგან სახელმწიფო სტრუქტურებს ასეთ დროს შეუძლიათ პირდაპირ გაუფორმონ ხელშეკრულებები შესაბამის კომპანიებს. შესაბამისად, არ არის კონკურენცია, ფასზე ვაჭრობა არ ხდება და მეტი სივრცე რჩება, რომ ეს თანხები ისეთ კომპანიებთან აკუმულირდეს, რომლებსაც გარკვეული კავშირები აქვთ მმართველ პარტიასთან,” – ამბობს IDFI-ის ანალიტიკოსი, მარიამ გოგიაშვილი.
საქართველოს ტურიზმის ეროვნული ადმინისტრაციის განახლებული ხარჯები
ტურიზმის ადმინისტრაციამ 15 აპრილის შემდეგ სასტუმროების საკარანტინე სივრცედ გამოყენებისათვის 690 ათასი ლარის ღირებულების 8 ხელშეკრულება გააფორმა. ადმინისტრაციას მომსახურებას ის სასტუმროები უწევენ, რომლებთანაც კონტრაქტი 15 აპრილამდეც ჰქონდა გაფორმებული, თუმცა ამ ეტაპზე ფასი განსხვავებულია.
მაგალითად, წყალტუბო რეზორტი სპა 31 დღით, 1 მაისიდან 31 მაისამდე, 120 ოთახის გაქირავებაში სახელმწიფოსგან 214 ათას ლარს აიღებს, რაც წინა ხელშეკრულებასთან შედარებით 1,1 მილიონი ლარით იაფია: ამავე სასტუმრომ, 31 მარტიდან 30 აპრილამდე, 118 ოთახის გაქირავებაში სახელმწიფოსგან 1 მილიონ 330 ლარი მიიღო.
IDFI მიიჩნევს, რომ სასტუმროებისთვის გადახდილი თანხის შემცირება შესაძლოა, უკავშირდებოდეს საქართველოს მთავრობის 4 მაისის დადგენილებას, რომლის თანახმადაც, ერთ ბენეფიციარზე გადახდილი დღიური თანხა 100 ლარს არ უნდა აღემატებოდეს.
“4 მაისს მთავრობის მიერ მიღებული დადგენილება, რომლითაც ერთ პერსონაზე სასტუმროში კარანტინში განთავსების მაქსიმალურ დღიურ ფასად 100 ლარი განისაზღვრა, დაგვიანებითაა მიღებული და სასტუმროებთან დადებული ხელშეკრულებების ანალიზი გვიჩვენებს, რომ მსგავსი რეგულაციის დროულად მიღებით, სახელმწიფოს სასტუმროების დაქირავებისას მილიონობით ლარის დაზოგვა შეეძლო,”- აღნიშნულია IDFI-ის კვლევაში.
