მიტჩ მაკკონელი: ოცნება მზადაა, მოაშთოს ქართველთა ევროატლანტიკური მისწრაფებები
მიტჩ მაკკონელი რუსულ კანონზე
რესპუბლიკელი სენატორი და აშშ-ის სენატში უმცირესობის ლიდერი, მიტჩ მაკკონელი საქართველოში არსებულ ვითარებაზე საუბრობს და ამბობს, რომ “ქართული ოცნება” მოსკოვის რჩეული პარტიაა, რომელიც მზადაა, “მოაშთოს” ქართველთა ევროატლანტიკური მისწრაფებები. განცხადების თარგმანს ამერიკის ხმა ავრცელებს.
მაკკონელმა ქართველი ხალხისადმი გზავნილში, რეგიონულ კონტექსტზეც ისაუბრა და აღნიშნა, რომ დღეს საქართველო სომხეთთან ერთად, სასურველი სახმელეთო ხიდი გახდა, რომელიც ავტორიტარ პარტნიორებს – მოსკოვსა და თეირანს აკავშირებს.
რას ამბობს სენატორი
● “საქართველოში საპარლამენტო უმრავლესობის ძალაუფლების მისია მხუთავ საფრთხეს უქმნის ქვეყნის სამოქალაქო საზოგადოებას და არღვევს მისი დემოკრატიის საყრდენს. პარტია “ქართული ოცნება” მზად არის, მოაშთოს ქართველი ხალხის ევროატლანტიკური მისწრაფებები.
● “და მაშინ, როცა პოლიტიკური ოპოზიცია დიდია, ის საკუთარი თავის წინააღმდეგაა დაყოფილი. პარტიების უსუსური ლიდერების მიუხედავად, ათასობით ქართველი ქუჩაში გასაპროტესტებლად გამოვიდა. მათი სურვილი, რომ რუსეთის იძულებისგან თვითგამორკვევა და თავისუფლება უნდათ, ცხადია. ხუთიდან ოთხი ქართველი გამოკითხვაში ამბობს, რომ მათ ცალსახად ევროპული მომავალი სურთ. მათ სწამთ, რომ თავის მტკიცედ დამკვიდრება დასავლეთში, დემოკრატიულ ქვეყნებს შორის, სადაც კანონის უზენაესობა სუფევს, მათ საუკეთესო ინტერესებში შედის.”
შეერთებული შტატებისთვის მნიშვნელოვანია, საით გაიხედება საქართველო, აღმოსავლეთით, თუ დასავლეთით. თავისუფალი ხალხის გვერდზე დგომა, რომლებიც წინააღმდეგობას უწევენ პუტინისა და სის მსგავსი ტირანების აგრესიას, ჩვენს ინტერესებში შედის. ეს ასეა ტაივანისთვის, უკრაინისთვის, ესტონეთისთვისა და იაპონიისთვის. და ეს ასეა საქართველოსთვისაც. ქართველი ხალხი იმსახურებს, რომ საკუთარი მომავალი თავად დაწერონ და არა მოსკოვის რჩეული პარტიის ბელადებმა გადაუწყვიტონ.
● “და რატომ არის რუსეთი საქართველოს მომავლის კონტროლით შეპყრობილი? ეს პუტინის ნეოიმპერიალისტურ ფანტაზიებს სცდება. გეოგრაფია მნიშვნელოვანია – ათასწლეულების განმავლობაში საქართველო და მისი შავი ზღვის სანაპირო ცივილიზებული სამყაროს გზაგასაყარზე იდგა. ეს კრიტიკული რესურსებისთვის უმნიშვნელოვანესი სატრანსპორტო წერტილია. და დღეს, სომხეთთან ერთად, ის წარმოადგენს სასურველ სახმელეთო ხიდს მოსკოვისა და თეირანის ავტორიტარ პარტნიორებს შორის.”
● “ქართველ ხალხს კონფლიქტისა და დაპყრობების გაძლების დიდი ისტორია აქვს. მათ სიმტკიცის დიდი ტრადიცია და საამაყო მდიდარი კულტურა. და მათ იციან, რომ არსებობს სხვაობა რუსეთის წინაშე ქედის მოხრასა და პირის დასავლეთისკენ შებრუნებას შორის. ასე რომ, როგორც ქართველი ხალხის მეგობრებს მთელი დასავლეთის მასშტაბით, მე იმედი მაქვს, რომ ეს იქნება ის მომენტი, რომლითაც ისინი იამაყებენ – მომენტი, როცა რუსეთის ჩარევის მიმართ წინააღმდეგობა, მათ წვრილმან უთანხმოებებს გვერდზე გადაადებინებს და გააერთიანებს.”
● “რა თქმა უნდა, ეს უნდა იყოს მომენტი საქართველოს მმართველი პარტიისთვისაც, რომ აღიარონ პუტინის ახირებებისთვის საკუთარი ხალხის ნების უარყოფის საზღაური და შეაჩეროს დასავლეთთან ნგრევის პროცესში მყოფი ურთიერთობა. ვიმედოვნებ, თბილისში ძალაუფლებაში მყოფნი აირჩევენ სუვერენიტეტს და არა მორჩილებას და გაიწვევენ ახირებულ რუსულ კანონს პარლამენტიდან.”
