"ქართული ოცნების" ახალ მინისტრთა კაბინეტში ყველა ძველი სახეა. იცვლება მხოლოდ იუსტიციის მინისტრი

ახალი პარლამენტი, რომელიც მხოლოდ “ქართული ოცნების” დეპუტატებისგან შედგება, ახალი მთავრობას დაამტკიცებს.

დეპუტატები მინისტრობის კანდიდატებს უსმენენ, რომლებიც პრემიერ-მინისტრობის კანდიდატმა გიორგი გახარიამ წარადგინა.

ასევე, დღეს პარლამენტის კომიტეტების იწყებენ გახარიას 2021-2024 წლების პროგრამის – „ევროპული საქართველოს მშენებლობისთვის“ განხილვას.

მთავრობა თითქმის არ იცვლება – ყველა მინისტრი ინარჩუნებს პოსტს.

შეიცვლება მხოლოდ იუსტიციის მინისტრი, რადგან თეა წულუკიანი, რომელსაც ეს პოსტი რვა წლის განმავლობაში ეკავა, პარლამენტის წევრი გახდა.

მთავრობას ნდობის მისაღებად სჭირდება სულ მცირე 76 ხმა. მეათე მოწვევის პარლამენტში „ქართულ ოცნებას“ 90 დეპუტატი ჰყავს. მმართველი პარტია პარლამენტში მარტო საქმიანობს, რადგან ოპოზიციამ, რომელიც 31 ოქტომბრის არჩევნებს გაყალბებულად მიიჩნევს და ხელახალ არჩევნებს მოითხოვს, პარლამენტს ბოიკოტი გამოუცხადა. 8 ოპოზიციური საარჩევნო სუბიექტიდან მეათე მოწვევის პარლამენტში 60 დეპუტატია. 50-ზე მეტმა პარლამენტს უკვე მიმართა უფლებამოსილების შესაწყვეტად.

_________________________

● „ქართულმა ოცნებამ“ პარლამენტს პრემიერობის კანდიდატად გიორგი გახარია წარუდგინა

_________________________

ახალი ძველი მინისტრები

თუ პარლამენტმა გახარიას მიერ წარდგენილი მთავრობა დაამტკიცა, გოჩა ლორთქიფანიძე ერთადერთი ახალი მინისტრი იქნება “ქართული ოცნების” მთავრობაში.

თუმცა, არც ეს ცვლილებაა დრამატული, რადგან არც ლორთქიფანიძეა ახალი სახე – ის წულუკიანის მოადგილე იყო წლების განმავლობაში – 2013 წლიდან.

მინისტრად წარდგენის პარალელურად, 19 დეკემბერს ცნობილი გახდა, რომ ლორთქიფანიძე ჰააგაში სისხლის სამართლის საერთაშორისო სასამართლოს მოსამართლედ აირჩიეს. ეს პირველი შემთხვევაა, როცა საქართველოს მიერ წარდგენილი კანდიდატი ჰააგის სასამართლოს მოსამართლე გახდა.

კანონის თანახმად, ჰააგის მოსამართლე იმავდროულად საქართველოს იუსტიციის მინისტრი ვერ იქნება, ამიტომ ლორთქიფანიძეს არჩევანის გაკეთება მოუწევს თებერვალში, როდესაც ჰააგაში მისი მოსამართლეობის უფლებამოსილება უნდა დაიწყოს.

რაც შეეხება მინისტრთა კაბინეტის სხვა კანდიდატებს – ყველა მათგანი მოქმედი მინისტრია:

• განათლების, მეცნიერების, კულტურისა და სპორტის სამინისტრო – მიხეილ ჩხენკელი;
• გარემოს დაცვისა და სოფლის მეურნეობის სამინისტრო – ლევან დავითაშვილი;
• ეკონომიკისა და მდგრადი განვითარების სამინისტრო – ნათია თურნავა;
• თავდაცვის სამინისტრო – ირაკლი ღარიბაშვილი;
• იუსტიციის სამინისტრო – გოჩა ლორთქიფანიძე;
• ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო – ეკატერინე ტიკარაძე;
• რეგიონული განვითარებისა და ინფრასტრუქტურის სამინისტრო – მაია ცქიტიშვილი;
• საგარეო საქმეთა სამინისტრო – დავით ზალკალიანი;
• ფინანსთა სამინისტრო – ივანე მაჭავარიანი;
• შინაგან საქმეთა სამინისტრო – ვახტანგ გომელაური;
• შერიგებისა და სამოქალაქო თანასწორობის საკითხებში სახელმწიფო მინისტრის აპარატი – თეა ახვლედიანი.