ფაშინიანი არჩევნების ჩატარებამდე თანამდებობიდან წასვლას არ აპირებს

უკვე საკმაოდ დიდი ხანია, სომხური მედიისა და სოციალური ქსელების უმთავრესი თემა პრემიერ-მინისტრ ნიკოლ ფაშინიანის გადადგომა გახდა. ფაქტობრივად ყოველდღიურად ჩნდება ინფორმაცია იმის შესახებ, რომ ის წასვლის შესახებ აპირებს განცხადების გაკეთებას. მოსახლეობისადმი მიმართვისას, პრემიერმა განაცხადა, რომ არ წავა თანამდებობიდან, სანამ არჩევნები არ ჩატარდება.

ასევე, ნიკოლ ფაშინიანმა ისაუბრა ყარაბაღში ვითარების გამწვავებისა და რუსული სამშვიდობო მისიის როლზე, აგრეთვე, სომხეთისა და აზერბაიჯანის საზღვარზე გამწვავებული სიტუაციის შესახებ. მან ხაზი გაუსვა, რომ სომხეთის საზღვრები ხელშეუხებელია და აზერბაიჯანულ მხარეს არ შეუძლია სადავო გახადოს. პრემიერმა ასევე განაცხადა, რომ მალე დაიწყება ტყვეების დაბრუნების პროცესი.

• ვითარების გამწვავება ყარაბაღში – აზერბაიჯანული და სომხური მხარეების ვერსიები
• მოსაზრება: რა ელის ყარაბაღსა და სომხეთს?

გადადგომის შესახებ

„ნათლად განვაცხადე, რომ ხალხის მიერ მონიჭებულ სტატუსზე უარის თქმა, მხოლოდ მოსახლეობის ნების გამომხატველ საიმედო შედეგებზე დაყრდნობით შემიძლია. ჯერჯერობით ასეთი ნება გამოხატული არ ყოფილა და ვაგრძელებ პრემიერის ფუნქციების შესრულებას“, – განაცხადა ნიკოლ ფაშინიანმა.

მან ხაზი გაუსვა, რომ დღეს მთავარი ამოცანა – ქვეყანასა და მის გარშემო სიტუაციის სტაბილიზაციაა – მისი მთავრობა აპირებს ამ საკითხების გადაჭრით დაკავდეს და არა თანამდებობიდან წავიდეს.

პრემიერი კიდევ ერთ აქტიურად გავრცელებულ ჭორსაც შეეხო:

„უკვე, დაახლოებით, ერთი თვეა ვრცელდება არასწორი ხმები იმის შესახებ, თითქოს, ჩემმა შვილებმა და ოჯახის წევრებმა სომხეთი დატოვეს. უკანასკნელი თვეების განმავლობაში, მით უფრო, ომის დაწყების პირველივე დღეებიდან, ჩემი ოჯახის არც ერთი წევრი არ გასულა სომხეთიდან და არც აპირებს ამის გაკეთებას“.

ფაშინიანმა ისაუბრა იმის შესახებაც, რომ ბოლო პერიოდში, საზღვრების უსაფრთხოების უზრუნველყოფასთან ერთად, ხელისუფლება საინფორმაციო უსაფრთხოების პრობლემასაც შეეჯახა – „სომხეთისა და სომეხი ხალხის წინააღმდეგ, ნამდვილი საინფორმაციო ტერორიზმის პროცესი დაიწყო“. მისი თქმით, ვრცელდება ყველანაირი ყალბი ცნობები, რომლის მიზანიც, პანიკის გამოწვევაა და „არ უნდა გამოვრიცხოთ მათი უცხოურ სპეცსამსახურებთან კავშირიც“.

ამის გამო, პრემიერმა მთავრობის წინაშე ოფიციალური ინფორმაციის ინტენსიური გავრცელებისა და მიმდინარე პროცესების სწრაფად გაშუქების ამოცანა დასვა.

ყარაბაღში ვითარების გამწვავების შესახებ

ნიკოლ ფაშინიანის თქმით, 11 დეკემბრიდან, ყარაბაღში, ჰადრუთის რაიონში ვითარების გამწვავება, რუსული მხარისთვის პირველი სერიოზული გამოცდა გახდა ანუ იმ სამშვიდობო კონტინგენტისთვის, რომელიც კონფლიქტის ზონაშია განლაგებული.

საუბარია ორ სოფელში მომხდარ ინციდენტზე, რომელიც ყარაბაღის მეორე ომის შემდეგ, სომხური მხარის კონტროლქვეშ აღმოჩნდა. ის ანკლავად გადაიქცა, რადგან ჰადრუთის რაიონი აზერბაიჯანის კონტროლქვეშ გადავიდა.

სომხეთის პრემიერ-მინისტრის შეფასებით, აზერბაიჯანული შეიარაღებული ძალების შეტევა და ბრძოლა სოფლებში, აშკარად ვითარების გამწვავების ხასიათს ატარებდა და ყარაბაღში მყოფი რუსი სამშვიდობოების როლის დისკრედიტაციის მცდელობა იყო.

სომხეთის საგარეო საქმეთა სამინისტრომ ასევე განაცხადა, „აზერბაიჯანმა დაარღვია ცეცხლის შეწყვეტის რეჟიმი (…), ისარგებლა იმით, რომ არცახის რესპუბლიკის ამ ნაწილში, არ არიან განთავსებული სამშვიდობო ძალები“.

„რა თქმა უნდა, საკითხავია, რატომ არ განათავსეს ამ დრომდე აღნიშნულ სოფლებში სამშვიდობოებმა თავისი სადამკვირვებლო პუნქტები, ამას ცალკე განხილვა სჭირდება. მაგრამ ახლა მთავარი ისაა, რომ ისინი უკვე იქ არიან“, – თქვა ფაშინიანმა.

სომხეთის სახელმწიფო საზღვრების შესახებ

პრემიერმა ასევე კომენტარი გააკეთა სომხეთის, სიუნიქის პროვინციის სოფელ აგარაკის ირგვლივ შექმნილ სიტუაციასთან დაკავშირებითაც, რადგან, გასულ შაბათ-კვირას, ქვეყანაში აქტიურად განიხილებოდა აზერბაიჯანთან საზღვრის ამ მონაკვეთზე ვითარების გამწვავების საკითხი. 

სომხურ მედიაში გავრცელდა ინფორმაცია, რომ აზერბაიჯანელმა სამხედრო მოსამსახურეებმა ცეცხლი გახსნეს აგარაკის მახლობლად მდებარე სომხური პოსტების მიმართულებით და ამ პოზიციების დატოვება მოითხოვეს. სიუნიქის გუბერნატორმა, მელიკსეტ პოღოსიანმა მაშინვე განაცხადა, რომ არანაირი სროლები არ ყოფილა, მაგრამ სანგრებში მყოფი აზერბაიჯანელები, ხმის გამაძლიერებლის დახმარებით, მართლაც მოუწოდებდნენ უკანდახევისკენ.

პრემიერმა განმარტა, რომ პრობლემა დაკავშირებულია ყარაბაღში, კოვსაკანისა (აზერბაიჯანული სახელწოდება ზანგელანი) და სანასარის (აზერბაიჯანული სახელწოდება გუბადლი) რაიონებთან, რომლებიც სომხეთის სიუნიქის პროვინციას ესაზღვრებიან. ყარაბაღში საბრძოლო მოქმედებების შედეგად, ისინი აზერბაიჯანის შეიარაღებული ძალების კონტროლქვეშ გადავიდა. ახლა, ამ მონაკვეთზე აუცილებელია საზღვრის დელიმიტაცია-დემარკაციის სამუშაოების ჩატარება.

პრემიერის თქმით, სწორედ ამასთან არის დაკავშირებული აზერბაიჯანული შეიარაღებული ძალების აქტივობა. ამ თემაზე აქტიური მოლაპარაკებები მიმდინარეობს, რადგან, როგორც ფაშინიანმა განმარტა, ყარაბაღის საკითხზე, 9 ნოემბერს გაკეთებულ სამმხრივ განცხადებაში, კოვსაკანისა და სანასარის შესახებ არაფერი წერია:

„მაგრამ მსურს კიდევ ერთხელ გავუსვა ხაზი, რომ ყარაბაღის შესახებ შეთანხმების არც ერთ ეტაპზე, სომხეთის საზღვრები არ დაირღვევა. საზღვრების ურღვევობის პრინციპი არასოდეს დამდგარა და არც დადგება ეჭვქვეშ“.

ტყვეების დაბრუნების შესახებ

პრემიერ-მინისტრმა განაცხადა, რომ მალე მოსალოდნელია ტყვეების ჯგუფების დაბრუნება, „რომელთა ტყვეობაც ოფიციალურად არის დადასტურებული აზერბაიჯანისა და წითელი ჯვრის მიერ“.

პრემიერი პირობას დებს, რომ ამის შემდეგ, კონცენტრირებას მოახდენს უგზოუკვლოდ დაკარგულთა მოძიებაზე, რომლებიც, შეიძლება, ასევე ტყვედ ჩავარდნენ.

ამასთან, გრძელდება დაღუპულთა ძებნა და უკვე აღმოჩენილი ცხედრების იდენტიფიკაციის პროცესი. ფაშინიანის თქმით, ამ პროცესის წლის ბოლომდე დასრულება ვერ მოხერხდება.

19 დეკემბერს, ომის დასრულებიდან მე-40 დღეს, სომხეთში, სამდღიანი გლოვა გამოცხადდება ომში დაღუპულთა ხსოვნისადმი პატივსაცემად. ერევანში, რესპუბლიკის მოედნიდან ერაბლურის პანთეონის მიმართულებით, სამგლოვიარო მსვლელობა გაიმართება.