მიხაილო პოდოლიაკი: საქართველოს ხელისუფლებასთან მოლაპარაკება შეუძლებელია. დღესაც არ ესმით, ვის მხარეს უნდა იყვნენ
გაზიარება
გაზიარება
მიხაილო პოდოლიაკი
უკრაინის პრეზიდენტის ადმინისტრაციის უფროსის მრჩევლის, მიხაილო პოდოლიაკის თქმით, საქართველოს ხელისუფლებასთან მოლაპარაკება შეუძლებელია, რადგან ისინი “სხვა რეალობაში არიან”. როგორც პოდოლიაკი აღნიშნავს, დღესაც კი, “ომის დაწყებიდან 10 თვის შემდეგ” მათ [საქართველოს ხელისუფლებას] არ ესმით, ვის მხარეს უნდა იყვნენ. ამის შესახებ უკრაინის ადმინისტრაციის მრჩეველმა ჟურნალისტ ვასილ გოლოვანოვთან ინტერვიუში ისაუბრა.
პოდოლიაკის თქმით, ქართველმა ხალხმა “ქართული ოცნების” არჩევისას უდიდესი შეცდომა დაუშვა.
“ხელისუფლება სახელად ბატონი ივანიშვილი, რომელიც რუსეთის ფედერაციას ფართოდ გახელილი ან ფართოდ დახუჭული თვალებით უყურებს, ელის მისგან ენერგეტიკასთან დაკავშირებული რაღაც პრობლემების გადაჭრას, 2008 წლის ომის არ გაგრძელებას, რაც საქართველოს ტერიტორიების ოკუპაციის გახანგრძლივებას გულისხმობს“ – განაცხადა პოდოლიაკმა.
უკრაინელმა ჩინოვნიკმა ასევე განაცხადა, რომ საქართველოში “უცნაური მდგომარეობაა”, რადგან მთავრობა პრორუსულ ღირებულებებს უჭერს მხარს და იმავდროულად მათ სურთ ევროპულ ბაზარსა და ფულზე ჰქონდეთ წვდომა. მისი თქმით, საქართველო უნგრეთს ჰგავს, რომელსაც საკუთარი წესებით სურს ცხოვრება – რუსეთის ავტორიტარულ ღირებულებებთან ახლოს და იმავდროულად თავისუფალი, დემოკრატიული სამყაროს სიკეთეებით ისარგებლოს.
ზელენსკის ადმინისტრაციის წარმომადგენელმა ისაუბრა უკრაინისთვის იარაღის მიწოდებაზეც და განმარტა, რომ არის უამრავი პატარა ქვეყანა, მათ შორის ბალტიის ქვეყნებიც, რომელიც მზადაა უკრაინას იარაღითაც დაეხმაროს და არის ისეთი ქვეყნები, როგორიც საქართველოა:
“ეს ძალიან საკვირველ ფაქტად ჩაიწერება ისტორიაში, რომ საქართველოს ხელისუფლებამ 2022-2023 წლებში, რომელსაც რუსული შოვინისტური ელიტა თავს 2008 წელს დაესხა განაგრძობს უკრაინისადმი უპატივცემულობის გამოხატვას, ევროპის რუსული ექსპანსიონიზმის პროცესისგან გათავისუფლებისას. დაე ქართველებმა მომავალში ამით იცხოვრონ.“
პოდოლიაკი ინტერვიუში საქართველოს მესამე პრეზიდენტს, მიხეილ სააკაშვილისაც შეეხო და აღნიშნა, რომ საქართველოს ხელისუფლება რეფორმატორ პრეზიდენტს ციხეში კლავს.
„ფენომენალურია. ქვეყანა, რომელიც 2000-იანი წლების შუაში მიიჩნეოდა დემოკრატიული ტრანსფორმაციის მაგალითად, გაატარა მძლავრი ეკონომიკური, ანტიკორუფციული რეფორმები (დიახ, არა უპრობლემოდ, მაგრამ გაატარა!), დღეს დაუბრუნდა რაღაც უცნაურ მდგომარეობას, როცა რეფორმატორი პრეზიდენტის ციხეში მოკვლა უნდათ. ალბათ გესმით, როგორ ჩაიწერება ეს ისტორიის წიგნებში“, – განაცხადა პოდოლიაკმა.
მისივე თქმით, კიევი თბილისს სააკაშვილის უკრაინაში ან სხვა ქვეყანაში მკურნალობის მიზნით გადაყვანისკენ მოუწოდებს. მისი თქმით, უკრაინა ამას არა პოლიტიკური არამედ ჰუმანისტური მიზნებით აკეთებს.
რუსეთის უკრაინაში შეჭრის შემდეგ, საქართველოსა და მის სტრატეგიულ პარტნიორს, უკრაინას შორის ვითარება გამწვავდა. ჯერ კიდევ თებერვალში საქართველო არ შეუერთდა უკრაინის მხარდამჭერ სანქციებს, რომლებიც დასავლეთმა დააწესა რუსეთის წინააღმდეგ. პრემიერ-მინისტრმა ირაკლი ღარიბაშვილმა განაცხადა, რომ საქართველო არ შეუერთდება დასავლეთის სანქციებს რუსეთის წინააღმდეგ, რადგან ეს ეწინააღმდეგება ქვეყნის ეროვნულ ინტერესებს და სანქციებს არ შეუძლია შეაჩეროს საომარი მოქმედებები უკრაინაში.
უკრაინის პრეზიდენტმა ვოლოდიმირ ზელენსკიმ საქართველოდან ელჩი კონსულტაციებისთვის გაიწვია, ამ გადაწყვეტილების ერთ-ერთ მიზეზად კი სანქციებთან დაკავშირებით საქართველოს მთავრობის პოზიცია დასახელდა. საქართველოში უკრაინას დღემდე არ ჰყავს მუდმივი წარმომდაგენელი – ელჩის მოვალეობას დროებით ანდრეი კასიანოვი ასრულებს.
გასული წლის 6 დეკემბერს “ქართული ოცნების” აღმასრულებელმა მდივანმა მამუკა მდინარაძემ განაცხადა, რომ “ომის პარტიის” წევრები [იგულისხმება “ნაციონალური მოძრაობა”] სოფელ-სოფელ დადიან და ეძებენ ადამიანებს, ვინ წაიყვანონ უკრაინაში და “რომანტიზება როგორ მოახდინონ ამ ამბების.”
საქართველოს პრემიერმინისტრმა ირაკლი ღარიბაშვილმა 5 დეკემბრის მთავრობის სხდომაზე ბახმუტში დაღუპული ქართველი მეომრების ოჯახებს მიუსამძიმრა და კვლავ “ომის პარტიაზე” [“ნაციონალურ მოძრაობაზე”} ისაუბრა. მისი თქმით, ქართველი მებრძოლები უკრაინაში “ომის პარტიას” მიჰყავს.
პრემიერის ამ განცხადებას საზოგადოებაში მწვავე რეაქცია მოჰყვა. მის სიტყვებს გამოეხმაურნენ როგორც პოლიტიკოსები და მწერლები, ასევე უკრაინაში მებრძოლი ქართველები და ბახმუტში დაღუპული ჯამბულატ ხოფერიას მამა.
18 ნოემბერს, პარლამენტში გამოსვლისას პრემიერმა კვლავ გაიმეორა, რომ მას სთხოვდნენ [ოპოზიცია], რომ საქართველოს მიეღო ჩარტერული თვითმფრინავები და აქედან გაეგზავნათ მოხალისეები საბრძოლველად. ღარიბაშვილის თქმით, ეს იყო პირდაპირ ომში ჩართვის მცდელობა და “გათვლილი იყო იმაზე, რომ რუსეთს შესაბამისი რეაქცია ექნებოდა და გაიხსნებოდა მეორე ფრონტი, როგორც ეს მათ უკრაინელ პარტნიორებთან ერთად დააანონსეს.”
“ეს ადამიანები [ნაციონალური მოძრაობა] რომ დღეს ხელისუფლებაში ყოფილიყვნენ… პოლიგონად გადააქცევდნენ ჩვენს ქვეყანას.” – თქვა ღარიბაშვილმა.
კიდევ ერთი საკითხი, რომელზეც თბილისსა და კიევს შორის დაძაბულობაა საქართველოს მესამე პრეზიდენტი, მიხეილ სააკაშვილია.
მიხაილო პოდოლიაკმა 9 იანვარს განაცხადა, რომ უკრაინამ და პრეზიდენტმა ვოლოდიმირ ზელენსკიმ კონკრეტული პოზიცია დააფიქსირეს სააკაშვილთან მიმართებაში, თუმცა ისინი არ ერევიან უცხო ქვეყნის სუვერენულ უფლებებში, “რუსეთის ფედერაციისგან განსხვავებით.” ამიტომ უკრაინა ოფიციალურად სთავაზობს საქართველოს მთავრობას, გადასცენ მათ მიხეილ სააკაშვილი.
მისივე განმარტებით, ამას არავითარი ცუდი შედეგი საქართველოსთვის – “ვგულისხმობ რუსეთის მხრიდან აგრესიულ ქმედებებს” – ნამდვილად არ მოჰყვება. პოდოლიაკის თქმით, თუ არ უნდათ უკრაინისთვის გადაცემა, მაშინ გადასცენ ნებისმიერ მესამე ქვეყანას ევროპაში, რათა მან მიიღოს ისეთი სახის დახმარება, “როგორის მიწოდებაც თავად საქართველოს, სამწუხაროდ”, არ შეუძლია.
