აზერბაიჯანელმა ოფიცერმა მეშალინის ტრაგედიაში მონაწილეობის ბრალდებით დაკავებულის ახლობლებს მიმართა

მეშალინის ტრაგედია და ვაგიფ ხაჩატრიანი

აზერბაიჯანის არმიის თადარიგის ოფიცერი, ყარაბაღის პირველი ომის მონაწილე აზაი ქერიმოვი საავადმყოფოში შეხვდა ვაგიფ ხაჩატრიანს, რომელიც ყარაბაღში დააკავეს 1991 წლის დეკემბერში, მეშალინის ტრაგედიაში მონაწილეობის ბრალდებით. ქრიმოვმა შეხვედრის შესახებ სოციალურ ქსელში პოსტი დაწერა.

29 ივლისს ვაგიფ ხაჩატრიანი აზერბაიჯანის სახელმწიფო სასაზღვრო სამსახურის თანამშრომლებმა აზერბაიჯან-სომხეთის სახელმწიფო საზღვრის ლაჩინის საგუშაგოზე დააკავეს, როდესაც წითელი ჯვრის საერთაშორისო კომიტეტის შუამავლობით სომხეთის რესპუბლიკაში სამკურნალოდ გამგზავრებას ცდილობდა.

სომხეთის საგარეო საქმეთა სამინისტრომ აზერბაიჯანელი სამართალდამცავების მიერ ვაგიფ ხაჩატრიანის დაკავება „გატაცებად“ გამოაცხადა და საერთაშორისო საზოგადოებას მოუწოდა ზემოქმედება მოეხდინა აზერბაიჯანზე მისი დაბრუნებისთვის.

მას ბრალად ედება მეშალინის ტრაგედიაში მონაწილეობა.

მეშალინის ტრაგედია მოხდა 1991 წლის 23 დეკემბერს. აზერბაიჯანული მხარის ოფიციალური ინფორმაციით, ამ დღეს სომეხი ბოევიკები თავს დაესხნენ აზერბაიჯანის ყოფილი ასკერანის, ახლანდელი ხოჯალის რაიონის სოფელ მეშალს.

აზერბაიჯანელი მოხალისეები სოფლის დაცვას ცდილობდნენ. სროლის შედეგად 28 ადამიანი დაიღუპა და 14 დაშავდა. დაღუპულთა შორის რვა ქალი და სამი ბავშვია. გაიძარცვა, განადგურდა და დაიწვა სახლები და ადმინისტრაციული შენობები. სოფლის ზარალმა დაახლოებით 5,5 მილიონი მანეთი [დაახლოებით 3,2 მილიონი დოლარი] შეადგინა.

ამ ფაქტებზე 1992 წლის 11 იანვარს ქალაქ შუშაში სისხლის სამართლის საქმე აღიძრა.

რას წერს ქერიმოვი

“მან მაშინვე მიცნო”, – წერს ქერიმოვი ფეისბუქის საკუთარ გვერდზე.

„მიუხედავად იმისა, რომ მისი ნამდვილი სახელი იყო ვაგიფი, იმ დროს მას ყველა იცნობდა მეტსახელით ვლადიკი.

ფაქტია, რომ 1991 წლის 15 მაისს ვაგიფი (ვლადიკი) კიდევ ოთხ ბოევიკთან ერთად დავაკავეთ. მე მას პირადად ვცემე. ჩვენი შეხვედრის დროს ვაგიფს გაახსენდა ის შემთხვევა.

მეშალინის ტრაგედიამდეც ვაგიფი აქტიური მონაწილე იყო ხანკენდიდან (სტეფანაკერტი) 30 ათასი აზერბაიჯანელის განდევნაში. ის იყო გარიკის რაზმში, რომელიც მანამდე ხანკენდის კრიმინალური გამოძიების განყოფილების უფროსად მუშაობდა.

მას შემდეგ, რაც ვაგიფი დავაკავეთ და შემდეგ შუშის ციხეში ჩასვეს, ღამით მან მარცხენა ხელი კბილებით გადაიჭრა, რომ სისხლდენისგან მომკვდარიყო. ეს შრამი მკლავზე დღემდე ეტყობა.

სამი თვის შემდეგ, ბაქოდან შუშაში გაგზავნილმა პროკურორებმა და გამომძიებლებმა ვაგიფი სომხებს დიდ თანხად მიჰყიდეს. ხოლო დეკემბერში მან მონაწილეობა მიიღო მეშალინის ტრაგედიაში. ის ასევე აქტიურად მონაწილეობდა 1992 წლის თებერვალში ხოჯალის ხოცვა-ჟლეტაში“, – წერს თადარიგის ოფიცერი.

მან ასევე აღნიშნა, რომ ვაგიფ ხაჩატრიანი, გარდა სომხურისა, თავისუფლად ფლობს რუსულ და აზერბაიჯანულ ენებს. მისი თქმით, ხაჩატრიანმა მიუთითა მეშალის სამი მცხოვრებლის ფოტოებზე, რომლებიც იმ დროს სომხებთან თანამშრომლობდნენ.

სტატუსის დასასრულს აზაი ქერიმოვმა ხაჩატრიანის ახლობლებს მიმართა.

„მივმართავ ვერას, ვაგიფის ქალიშვილს, რომელიც იმ წლებში მუშაობდა ლაჩინის სკოლის დირექტორად და მივმართავ მის მეუღლეს, ხანკენდში პოლიციის თანამშრომელს.

ვაგიფს აქ კარგად ექცევიან, კვებაც ნორმალურია და ექიმების მუდმივი მეთვალყურეობის ქვეშ იმყოფება. თავად ვაგიფმა თქვა რაღაც, მაგრამ არა ზუსტად. სათქმელი თქვენც ზუსტად უნდა თქვათ: მიუთითეთ ხოჯალის 150 მცხოვრებლის, მალიბეილი-გუშჩულარის 21 მკვიდრის, შუშის მახლობლად დაკარგული 147 ადამიანის მასობრივი საფლავის ადგილების შესახებ. თუ ამ ინფორმაციას მიაწვდით აზერბაიჯანულ მხარეს, ვაგიფის სასჯელი ბევრად შემსუბუქდებ“, – წერს ის.

ხაჩატრიანის უმცროსმა ქალიშვილმა, ვერამ, თავის მხრივ, უარყო ყველა ბრალდება მამის წინააღმდეგ.

„მე უარვყოფ ყველა გავრცელებულ ჭორს. მამაჩემი არ იყო სამველ ბაბაიანის მძღოლი, მამაჩემს არ შეეძლო ასეთი ქმედებების ჩადენა – თუნდაც აზერბაიჯანელებთან მიმართებაში. თქვენ უნდა დამეხმაროთ მამაჩემის სამშობლოში ჯანმრთელად და უვნებლად დაბრუნებაში. მის ადგილას შეიძლება იყოს თითოეული თქვენგანის მამა. არავის აქვს იმუნიტეტი“, – აღნიშნა მან.