"ვიმედოვნებ, საქართველოს მთავრობას ეყოფა პრაგმატიზმი, აღიაროს ოსეთი და აფხაზეთი" - მედვედევის ინტერვიუ TASS-თან

მედვედევის ინტერვიუ

რუსეთის ფედერაციის უშიშროების საბჭოს თავმჯდომარის მოადგილემ და ყოფილმა პრეზიდენტმა, დმიტრი მედვედევმა 26 აგვისტოს სამთავრობო-პროპაგანდისტული მედიის, TASS-ის მიერ გამოქვეყნებულ ინტერვიუში იმედი გამოთქვა, რომ საქართველოს მთავრობას ეყოფა პრაგმატიზმი, აღიაროს სამხრეთ ოსეთი და აფხაზეთი. მისივე თქმით, საქართველოსა და რუსეთს შორის ურთიერთობები მალე გაუმჯობესდება.

კიდევ რა თქვა დმიტრი მედვედევმა:

ოკუპირებული ტერიტორიების შესახებ

“ვიმედოვნებ, საქართველოს ხელისუფლებას ეყოფა პრაგმატიზმი, რომ რეალობა აღიაროს, მათ შორის სამხრეთ ოსეთისა და აფხაზეთის საერთაშორისო სამართლის დამოუკიდებელ სუბიექტებად არსებობა და დაამყაროს მათთან ურთიერთობა, რადგან ისტორიულად მაინც ახლო ხალხია.”

საქართველოს ხელისუფლების შესახებ

“პოლიტიკაში ყველაფერი ხდება. ამიტომ პრაგმატიზმი ძალიან მნიშვნელოვანია. ყველას აქვს ემოციები, მაგრამ გადაწყვეტილებების მიღების დროს ემოციები გვერდზე უნდა გადაიდოს. აი, დღევანდელი საქართველოს მთავრობა პრაგმატიზმით გამოირჩევა. ეს არ შეიძლება არ აღინიშნოს. ამიტომ მათთან ვითარდება ურთიერთობები. ამიტომაც დავრთეთ ნება უვიზო მიმოსვლაზე. ამიტომ დაიწყეს თვითმფრინავებმა ფრენა.

თავგასული, შეშლილი, უცნაური ადამიანები ჯერ კიდევ არიან, მაგრამ მათი გავლენა პოლიტიკაზე მინიმალურია. ახლა ასეთი პოლიტიკოსები პირველ როლს ვერ თამაშობენ. დღევანდელი პრეზიდენტის როლი იმის გათვალისწინებით, რომ საქართველო საპარლამენტო რესპუბლიკაა, მინიმალურია. ვიმედოვნებ, რომ საქართველოს ხელისუფლებას ეყოფა პრაგმატიზმი, აღიაროს რეალობა, მათ შორის სამხრეთ ოსეთის არსებობა და დაალაგონ ურთიერთობები მათთან.”

კულტურის შესახებ

“რა თქმა უნდა, მაქსიმალურად დადებითად ვუყურებ [ქართულ კულტურას]. ეს ძველი ერია, ძველი კულტურა, ჩვენთან ძალიან ახლო, რადგან მრავალი წელია მეზობლად ვცხოვრობთ, ჩვენს ქვეყანაში დიდი დიასპორაა.

და ყველაფერი, რაც კავშირშია ქართულ კულტურასთან, როგორც ცნობილია, მთლიანობაში ჩვენი კულტურის ნაწილად აღიქმება… აი, ინტერნეტში რომ შეხვიდეთ და მოძებნოთ, მწვადი, მაგალითად, ან რამე მსგავსი, ბევრ ქვეყანაში ეს მიიღება არა როგორც კავკასიური სამზარეულოს ნაწილად, არამედ როგორც საერთო რუსული სამზარეულოს ნაწილად. ეს ერთ-ერთი მაგალითია.

ეს ეხება მუსიკასაც, ელიტის, კულტურისა და პოლიტიკის წარმომადგენლებს. ამიტომ, რაც უფრო მალე მოხდება ურთიერთობების სრული ნორმალიზება, მით უკეთესი.”

● ვინ არის დამნაშავე: მედვედევი თუ აფხაზეთის ხელისუფლება? მოსაზრება
● სამხრეთ ოსეთი რუსეთის შემადგენლობაში: ისევ აქტუალურია ეს თემა?
● ცხინვალი რუსეთისკენ მიისწრაფვის, მაგრამ მას იქ არ ელიან. რატომ და რას უნდა ველოდოთ?

23 აგვისტოს, დმიტრი მედვედევმა გამოაქვეყნა სტატია, რომელშიც საქართველოს ოკუპირებული ტერიტორიების რუსეთთან შეერთებით იმუქრება და ამბობს, რომ აფხაზეთსა და სამხრეთ ოსეთში რუსეთთან შეერთების იდეა ძველებურად პოპულარულია.

მისივე მტკიცებით, საქართველო მრავალი წლის განმავლობაში “ახდენდა ოსი ერის შეუფარავ გენოციდს”, ხოლო 2008 წლის მოვლენებში მედვედევი ქართულ მხარეს ადანაშაულებს აგრესიაში და ამბობს, რომ ამ “აგრესიის” მიზანი “დაუმორჩილებელი სამხრეთ ოსეთის მტრულ სახელმწიფოს საზღვრებში დაბრუნება” იყო.

აფხაზეთის უშიშროების საბჭოს მდივანმა სერგეი შამბამ მედვედევის საპასუხოდ განაცხადა, რომ “აფხაზეთში არ არსებობს პოლიტიკური ძალა, რომელიც რუსეთთან შეერთებას ითხოვს.”

აღსანიშნავია ისიც, რომ 2022 წლის პირველ ივნისს ცნობილი გახდა, რომ რუსეთთან შეერთების შესახებ რეფერენდუმი, რომელიც ე.წ. სამხრეთ ოსეთის უკვე ყოფილმა პრეზიდენტმა ანატოლი ბიბილოვმა 17 ივლისისთვის ჩანიშნა, აღარ ჩატარდება.

ეს ცხინვალის უკვე მეხუთე მცდელობა იყო შესულიყო რუსეთის შემადგენლობაში საბჭოთა კავშირის დაშლისა და 1990-იანი წლების დასაწყისში შეიარაღებული კონფლიქტის დაწყების შემდეგ.