ჯანდაცვის სამინისტრო: აფთიაქები რიგ მედიკამენტებს 32-ჯერ ძვირად ყიდიან
მედიკამენტების ფასები საქართველოში
საქართველოს ჯანდაცვის სამინისტრო აცხადებს, რომ ფარმაცევტული სექტორი რიგ მედიკამენტებს 32-ჯერ ძვირად ყიდის, რაც ზოგ შემთხვევაში 1000%, 2000% და 3000%-იან ფასნამატს აღწევს.
თვალსაჩინოებისთვის, ამ ინფორმაციას სამინისტრო კონკრეტული მედიკამენტების ჩამონათვალს ურთავს და აღნიშნავს იმასაც, რომ სექტორი მაქსიმალური მოგების უზრუნველყოფის მიზნით, აზარალებს მოქალაქეებს.
ჯანდაცვის სამინისტროს განცხადება
ჯანდაცვის სამინისტროს განცხადებით, მედიკამენტებს, დიდ ფარმაცევტულ ქსელებში, თითქმის, იდენტური ფასი აქვს. მათივე განმარტებით, ჭარბი ფასნამატი და ფასების ერთმანეთთან თანხვედრა, “აჩენს საფუძვლიან ეჭვს”, რომ ადგილი აქვს ფარმაცევტულ კომპანიებს შორის არაკეთილსინდისიერ შეთანხმებას და დომინირებული მდგომარეობის არასათანადოდ გამოყენებას.
“ჯანდაცვის სამინისტროსთვის მიუღებელია წამლების ფასის ხელოვნური ზრდა. არსებული არასამართლიანი ფასებითა და არაჯანსაღი კონკურენციით, სექტორი მაქსიმალური მოგების უზრუნველყოფის მიზნით, აზარალებს მოქალაქეებს. ნათელია, რომ მედიკამენტებზე არ ხდება თავისუფალი ფასწარმოქმნა, ბაზარზე მოქმედ დიდ ეკონომიკურ აგენტებს შორის, შეთანხმების საფუძველზე კი – იზღუდება ჯანსაღი კონკურენცია.” – ვკითხულობთ განცხადებაში.
როგორც უწყება აღნიშნავს, მსხვილი ფარმაცევტული კომპანიების მიერ წარმოებული საფასო პოლიტიკა კარტელური გარიგების ნიშნებს შეიცავს და შესაბამისად, საკითხის შესწავლის მიზნით, “ჯანდაცვის სამინისტრო კონკურენციის ეროვნულ სააგენტოს მიმართავს”, რომელსაც ყველა საჭირო დოკუმენტს გადასცემს.
“საზოგადოების ინფორმირებისთვის განვმარტავთ, რომ აღნიშნულ მედიკამენტებზე, უახლოეს მომავალში, სახელმწიფო სამართლიან, რეფერენტულ ფასებს (ფასის ზედა ზღვარს) დააწესებს, რომელზე მაღალ ფასადაც მათი გაყიდვა აიკრძალება”, – წერს სამინისტრო განცხადებაში.
● “დედა თითქოს პატარა გოგო იყო, ასე გრძნობდა თავს”. როგორ ცხოვრობენ საქართველოში ადამიანები დემენციით
● შიმშილობენ თუ არა ბავშვები საქართველოში და სჭირდებათ თუ არა მათ უფასო კვება სკოლაში
● რეფერენტული ფასები განისაზღვრა: რომელ მედიკამენტებს შეეხო ღირებულების ზედა ზღვარი
საქართველოში რეფერენტული ფასების სისტემა მუშაობს
2023 წლის 15 იანვარს საქართველოში მედიკამენტებზე რეფერენტული ფასები განისაზღვრა, რაც სახელმწიფოს მიერ განსაზღვრული მაქსიმალური ფასის დაწესებას გულისხმობს, 15 თებერვლიდან კი, ყველა კომპანია – იმპორტიორი, დისტრიბუტორი თუ საცალო მოვაჭრე – ვალდებულია, მაქსიმალური ზედა ზღვარი ამ ფასების მიხედვით დაადგინოს.
გამოქვეყნდა მთავრობის დადგენილება, თუ რომელ კონკრეტულ მედიკამენტის ფასს დაარეგულირებს მთავრობა პირველ ეტაპზე. შესაბამისად, მთავრობამ განსაზღვრა ღირებულების ზედა ზღვარი, რაზე მაღალ ფასადაც კონკრეტული მედიკამენტი ვეღარ გაიყიდება.
ჯანდაცვის სამინისტრომ 23 მარტს განაცხადა, რომ მედიკამენტზე რეფერენტული ფასების ამოქმედების შემდეგ, ცალკეულმა ფარმაცევტულმა კომპანიებმა მედიკამენტებზე ფასი ხელოვნურად გაზარდეს. უწყების ცნობით, ამჯერად საქმე ეხება ონკოლოგიური დანიშნულების ძვირადღირებულ მედიკამენტებს, რომლებზეც რეფერენტული ფასი არ არის დაწესებული და რომლებიც სახელმწიფოს მიერ საყოველთაო ჯანდაცვის პროგრამის ფარგლებში ფინანსდება.
როგორც სამინისტროში განმარტავენ, ჯანმრთელობის ეროვნული სააგენტოს მონაცემებით, ძვირადღირებული ონკოლოგიური მედიკამენტების რეალიზატორ კომპანიებს, ერთი და იმავე დასახელების მედიკამენტებზე, იდენტური ფასები აქვთ განსაზღვრული.
სამინისტროს ცნობით, საყოველთაო ჯანდაცვის პროგრამის ფარგლებში, ქიმიო-სხივური ჰორმონოთერაპიისთვის ერთ ბენეფიციარზე, ყოველწლიურად, 25 000 ლარი გამოიყოფა, ხელოვნურად გაძვირებული წამლების შედეგად კი, ონკოლოგიურ პაციენტებს, მედიკამენტებზე ხელმისაწვდომობა ეზღუდებათ.
