მარტა კოსი: "ქართული ოცნების" პოლიტიკით საქართველო EU-ს წევრი ვერც 2030 წელს გახდება
მარტა კოსის ინტერვიუ
ევროკომისარმა გაფართოების საკითხებში მარტა კოსმა “პირველებთან” ინტერვიუში განაცხადა, რომ “ქართული ოცნების” პოლიტიკით საქართველო ევროკავშირის წევრი ვერც 2030 წელს გახდება.
მისივე თქმით, არ აინტერესებს მის შესახებ ივანიშვილის პარტიაში რას საუბრობენ, თუმცა ნამდვილად დაინტერესებულია იმ პროპაგანდით, რომელსაც “ქართული ოცნება” ქვეყნის ევროკავშირში გაწევრიანების შესახებ საუბრობს.
მარტა კოსი: “ჟურნალისტების, პოლიტიკური ოპონენტების ან სამოქალაქო საზოგადოების წარმომადგენლების დაპატიმრება არ შეესაბამება იმ მოლოდინებს, რაც გვაქვს კანდიდატი ქვეყნისგან. სწორედ ამიტომ, მე მოვუწოდებ საქართველოს ხელისუფლებას, შეწყვიტოს ეს ანტიდემოკრატიული ნაბიჯები, რომლებიც საქართველოს შორს სწევს ევროპის კავშირისგან.
ვიცით, თქვენი ხელისუფლება აცხადებს, რომ საქართველო 2030 წლისთვის გახდება ევროკავშირის წევრი, მაგრამ ეს შეუძლებელი იქნება თუ ქვეყანა ამ გზით გააგრძელებს სვლა – ამ პოლიტიკით ეს ვერ მოხდება.
ჩვენ ვმუშაობთ ახალი ვიზების შეჩერების მექანიზმზე, რომელიც ნოემბერში დამტკიცდება, ამის შემდეგ ყველა შესაძლებლობა განიხილება, ყველა ვარიანტი ღიაა. მათ უბრალოდ, უნდა მოუსმინონ და ნახონ, რას ვაკეთებთ ჩვენ ევროპაში.
კიდევ ერთხელ უნდა ვთქვა, საქართველო არის კანდიდატი ქვეყანა. როცა ქვეყანამ მიიღო ეს სტატუსი, ეს ნიშნავს პასუხისმგებლობასა და ვალდებულებას და თუ ქვეყანა ამ ვალდებულებებს ვერ ასრულებს, არ შეიძლება იმაზე საუბარი, თითქოს საქართველო ევროპული გზით მიდის. ეს არ არის საქართველოს გზა ევროპისკენ, ეს უნდა იყოს ევროპის გზა, რომელსაც საქართველო უერთდება.
პირველ რიგში, თუ ისინი ჩემზე ავრცელებენ სიცრუეს, ეს მე არ მადარდებს, მაგრამ თუ თქვენს ხალხს სვამენ ციხეში, ეს ნამდვილად მანაღვლებს. მე პოლიტიკოსი ვარ და ვიცი, რომ ასეთი რამ თან სდევს ამ პროფესიას, ამიტომ პირადად ჩემს შესახებ რას იტყვიან, არ მაინტერესებს, მაგრამ როცა ისინი ავრცელებენ სიცრუეს ევროკავშირის შესახებ, როცა ამტკიცებენ, თითქოს თავად შეიყვანენ ქვეყანას ევროკავშირში, სწორედ ეს არის ის, რაც ნამდვილად მადარდებს.
პერსპექტივაში ჩვენ ყოველთვის მზად ვიქნებით, ვისაუბროთ იმ ადამიანებთან, რომლებიც იცავენ ევროპულ ღირებულებებს, იცავენ დემოკრატიას, იცავენ თავისუფალ და დამოუკიდებელ მედიას. ჩვენ ყოველთვის ვესაუბრებით მათ, ვინც უსმენს საკუთარ ხალხს.”
20 ოქტომბერს ევროკავშირის უმაღლესმა წარმომადგენელმა კაია კალასმა საგარეო საქმეთა მინისტრების საბჭოს სხდომის შემდეგ განაცხადა, რომ საქართველოში მდგომარეობა კანონის უზენაესობის და ადამიანის უფლებების დაცვის მხრივ, გაუარესებულია.
მისივე თქმით, ვიზალიბერალიზაციის გაუქმების გამარტივებული მექანიზმი, ევროპულ საბჭოს საშუალებას მიცემს, “უვიზო რეჟიმი ზოგიერთი ჯგუფისთვის” გააუქმოს. კალასმა ასევე განმარტა, რომ მიუღებელია პერსონალური თავდასხმები ევროკავშირის წევრი ქვეყნების ელჩებზე.
