მარია ზახაროვა: ქართველებს ხელებს უგრეხენ, რადგან ხალხმა საკუთარი კანონებით ცხოვრება გადაწყვიტა
მარია ზახაროვას განცხადება
რუსეთის საგარეო საქმეთა სამინისტროს პრესსპიკერი მარია ზახაროვა “ქართული ოცნების” მსგავსად ამტკიცებს, რომ ქართველებს ხელებს “დასავლეთი უგრეხს” უგრეხს, რადგან (ქართველმა) ხალხმა საკუთარი კანონებით ცხოვრება გადაწყვიტა. მისივე თქმით, საქართველოს მოვლენები მნიშვნელოვანი დასკვნის საშუალებას იძლევა: რაც უფრო მეტ დათმობას აკეთებს ქვეყანა დასავლეთის წინაშე, მით უფრო იზრდება დასავლეთის მადა. ამის შესახებ ზახაროვამ 20 ნოემბერს გამართულ ბრიფინგზე განაცხადა.
ამავე ბრიფინგზე ის ირწმუნებოდა, რომ დასავლეთს სამხრეთ კავკასიის “სახიფათო გეოპოლიტიკურ თამაშში ჩათრევა” სურს. ზახაროვამ ბრიფინგზე ასევე თქვა, რომ საქართველოსთვის 3+3 ფორმატის კარი “ღია რჩება”. მან აღნიშნა, რომ ამ პლატფორმის მორიგი შეხვედრა ბაქოში ან ერევანში გაიმართება.
რას ამბობს მარია ზახაროვა
“ევროკავშირის ქმედებები ემსახურება, კვლავ, რუსეთის წინააღმდეგ ჩანაფიქრს. რეგიონში ბრიუსელის მხრიდან მუქარა და ზეწოლა ჩვეულებრივ მოვლენად იქცა. საქმე მთელი ერების სანქციებამდე და შანტაჟამდე მივიდა.
საქართველო სავსებით ნათელი მაგალითია. ქართველებს, პირდაპირი მნიშვნელობით, “ხელებს უგრეხენ”, სურთ დასაჯონ საკუთარი სუვერენიტეტის დაცვის მცდელობისთვის. არც ვიღაცასთან კოალიციისთვის, არც ვიღაცის მხარდაჭერისთვის, არამედ მხოლოდ იმისთვის, რომ საკუთარი ქვეყნის შიგნით ამ სახელმწიფოს ხალხმა გადაწყვიტა იცხოვროს საკუთარი კანონებით. როგორც ჩანს, ეს სხვების საჩვენებლად კეთდება. ცხადია, რომ მოქალაქეთა ნების გამოვლინება ევროკავშირელებისთვის რაღაცას მხოლოდ მაშინ ნიშნავს, როცა შედეგად ქვეყანა “დიდ თამაშში” პაიკად იქცევა. ამასთან ერთად, პოლიტიკური ძალებისთვის, რომლებიც დასავლურ ინტერესებს ატარებენ, ყველაფერი ნებადართულია და, რა თქმა უნდა, ამისთვის აძლევენ ბევრ ფულს.
ყურადღება გავამახვილეთ ქართული მედიების მიერ ამ წლის 13 ნოემბრის 15:00 საათზე გამოქვეყნებულ “ევროკავშირის მაღალჩინოსნის” წერილის ანტისახელისუფლებო განცხადების ტექსტზე, რომელიც თითქოსდა საქართველოს ინტერესებისთვის მებრძოლ თავისუფლებისმოყვარე მოქალაქეებს უნდა გაეხმოვანებინათ მორიგ მიტინგზე. 10 წუთის შემდეგ ერთ-ერთმა ოპოზიციონერმა, პირდაპირი მნიშვნელობით, ბრიუსელიდან მიღებული ტექსტი ქართულად სიტყვა-სიტყვით წაიკითხა. ეს “მარიონეტების მმართველების” შეკითხვაზე პასუხად და იმაზე, თუ მესამე ქვეყნების მიერ “უცხოელ აგენტთა” კანონების მიღება რატომ იწვევს ევროკავშირელების განრისხებას. იმიტომ, რომ ეს გამოავლენს ევროკავშირელებისა და NATO-ელების სხვა ქვეყნებში მოქმედების მექანიკას, რისი უფლებაც არ გააჩნიათ.
მთლიანობაში, საქართველოს მოვლენები მნიშვნელოვანი დასკვნის საშუალებას გვაძლევს: რაც უფრო მეტ დათმობას აკეთებს ქვეყანა დასავლეთის წინაშე, მით უფრო იზრდება მისი (დასავლეთის) მადა.” – თქვა მარია ზახაროვამ ბრიფინგზე.
