მარია ზახაროვა: რუსეთი საქართველოსგან ძალის გამოუყენებლობის შესახებ სავალდებულო შეთანხმებას მოითხოვს

მარია ზახაროვა ოკუპირებულ ტერიტორიებზე

რუსეთის საგარეო საქმეთა სამინისტროს პრესსპიკერის, მარია ზახაროვას თქმით, რუსეთი ოკუპირებულ ცხინვალთან და აფხაზეთთან ურთიერთობების გამყარებით არის დაინტერესებული და შესაბამისად, რუსეთი საქართველოსგან ძალის გამოუყენებლობის შესახებ სავალდებულო შეთანხმებას მოითხოვს.

“15 წლის წინ აფხაზეთისა და სამხრეთ ოსეთის დამოუკიდებლობის აღიარებით რუსეთის ფედერაციამ უზრუნველყო მათი საიმედო დაცვა და პროგრესული განვითარება. აფხაზეთსა და სამხრეთ ოსეთში მოსახლეობის უმრავლესობას აქვს რუსეთის მოქალაქეობა და ისინი მხარს უჭერენ რუსეთთან ალიანსის გაძლიერებას […] ჩვენ მიზნად ვისახავთ ამიერკავკასიის რესპუბლიკებთან ურთიერთობები გავაღრმაოთ.” – ამბობს ზახაროვა.

როგორც პრესსპიკერი განმარტავს, აფხაზეთისა და ოკუპირებული ცხინვალის მხარდაჭერა უკრაინაში მიმდინარე სპეციალურ სამხედრო ოპერაციაში “ჭეშმარიტი მოკავშირეობის მაგალითია” და ისინი განსაკუთრებულ მნიშვნელობას ანიჭებენ აფხაზეთისა და სამხრეთ ოსეთის უსაფრთხოების უზრუნველყოფას. მისივე შეფასებით, ამ ტერიტორიებზე ფუნქციონირებს რუსული სამხედრო ბაზები, ხორციელდება სახელმწიფო საზღვრების ერთობლივი დაცვა შესაძლო პროვოკაციების აღკვეთის მიზნით, რაც აქტუალურია ახალ გეოპოლიტიკურ რეალობაში:

“ჩვენ ვითხოვთ საქართველოსგან სავალდებულო შეთანხმებას ამ ქვეყნების წინააღმდეგ ძალის გამოუყენებლობის შესახებ. ჩვენ მიგვაჩნია, რომ ეს რეგიონში სტაბილურობის გარანტია იქნება.”

რუსეთის საგარეო საქმეთა სამინისტროს სპიკერის თქმით, ქვეყანა სამხრეთ ოსეთის და აფხაზეთის მთავარ სავაჭრო პარტნიორად რჩება და მათ ურთიერთობებში მნიშვნელოვანი როლი სოციალურ-ეკონომიკური განვითარების ხელშეწყობას ენიჭება. ასევე, ყველა საკითხი შესაბამისი სამთავრობათაშორისო კომისიების ფარგლებში განიხილება.

● „თუ კორუფციის წინააღმდეგი ვარ, ანტირუსული ელემენტი ვარ? – აფხაზეთში ხელისუფლების ბრალდებებს უპირისპირდებიან
● “საფრთხე ხალხისთვის და სტალინიზმის პროპაგანდა“ – მოსაზრება აფხაზეთის საგარეო უწყებაზე
● “ჩინოვნიკებს კანონები არ ეხებათ”- აფხაზი ბლოგერი იმაზე, თუ როგორ არის მოწყობილი ხელისუფლება აფხაზეთში

ზახაროვა ხაზს უსვამს, რომ თითოეული ამ რესპუბლიკისთვის საინვესტიციო პროგრამები ხორციელდება, რომლებიც ახალი საწარმოებისა და სამუშაო ადგილების შექმნას ისახავს მიზნად, ამ ღონისძიებების ერთობლიობა კი მშპ-ს პროგრესულ ზრდას, “მოქალაქეთა კეთილდღეობასა და ინვესტიციების მიმზიდველობის” გაუმჯობესებას უწყობს ხელს.

“ერთობლივი საქმიანობა განათლების, კულტურის, მეცნიერებისა და სპორტის სფეროში ჩვენი ქვეყნების [რუსეთი, აფხაზეთი, ოკუპირებული ცხინვალი] ხალხების კონსოლიდაციას ემსახურება. საჯარო მოხელეები და მასწავლებლები გადიან კვალიფიკაციის ამაღლების კურსებს რუსული ინსტიტუტების ბაზაზე.” – ამბობს მარია ზახაროვა.

მისივე მტკიცებით, სხვადასხვა გრანტის წყალობით, “ნიჭიერი ახალგაზრდები მონაწილეობენ რუსეთის ეგიდით” გამართულ საერთაშორისო ფორუმებსა და კონკურსებში. ასევე, განსაკუთრებული ყურადღება ეთმობა “პატრიოტულ ქმედებებს”, რომლებიც დაკავშირებულია “საერთო ისტორიის სამახსოვრო თარიღებთან”, მეცნიერებისა და კულტურის გამოჩენილ მოღვაწეებთან.

● ცხოვრება ქართულ-ოსური კონფლიქტის ზონის სოფლებში. Crisis Group-ის ფოტო რეპორტაჟი
● ჰააგის სასამართლომ 2008 წლის ომის საქმეზე გამოძიება დაასრულა. რას ნიშნავს ეს? შეფასებები

8 თებერვალს აფხაზეთის საგარეო საქმეთა მინისტრმა ინალ არძინბამ და სახელმწიფო უსაფრთხოების სამსახურის ხელმძღვანელმა განაცხადეს, რომ აფხაზურ საზოგადოებაში არის მცდელობა გაღვივდეს ანტირუსული განწყობები და “ამას მხარს უჭერენ გარედან. შესაბამისად, ასეთი პირების მიმართ მკაცრი ზომები იქნება მიღებული.“

ხელისუფლების განზრახვებმა და თავად განცხადებამ აფხაზურ საზოგადოებაში უკმაყოფილება გამოიწვია. საზოგადოებრივი ორგანიზაციების ერთობლივ განცხადებაში ნათქვამია, რომ ასეთი “განცხადებები, კონკრეტული სახელებისა და ფაქტების გარეშე, მიუღებელია.” მათი თქმით, პრესაში ასეთი ინფორმაციის ხელმისაწვდომობა უფრო ჰგავს პროპაგანდას, საზოგადოებრივი აზრით მანიპულირებას და მოქალაქეების დაშინებას. ასევე, “სპეკულაციას რუსეთის ფედერაციასთან ჩვენს ურთიერთობებში.”

„თუ თქვენ ეძებთ ადამიანებს, რომლებიც ავითარებენ ანტირუსულ განწყობებს, მაშინ ამისთვის შორს წასვლა არ გჭირდებათ – ეს არის აფხაზეთის პრეზიდენტი ასლან ბჟანია. გასული 30 წლის განმავლობაში არავის მიუყენებია ისეთი ზიანი აფხაზეთ-რუსეთის ურთიერთობებისთვის, როგორიც მოქმედმა პრეზიდენტმა სამ წელზე ნაკლებ დროში მოახერხა“. – ამბობს ოპოზიციონერი ადგურ არძინბა.