Russia Today-ს ხელმძღვანელმა სომხეთის ხელისუფლება ანტირუსულ პოზიციებში დაადანაშაულა
მარგარიტა სიმონიანი, ტელეკომპანია Russia Today-ის ხელმძღვანელი, რომელსაც ბევრი რუსული პროპაგანდის რუპორად მოიხსენიებს, 18 ივლისს სომხეთის ხელისუფლების მიმართ ბრალდებებით გამოვიდა. მან მათ „იანიჩარების დანები“ შეახსენა და რუსეთისადმი მადლიერების გამოხატვა მოითხოვა.
სომხეთში, ამ პოსტმა მწვავე დისკუსია გამოიწვია, დიდწილად – აღშფოთება და უკმაყოფილება.
საკუთარ ტელეგრამარხზე მან დაწერა, რომ პასუხობს მრავალრიცხოვან მიმართვებს, „გაერკვეს პოზიციებში“ სომხეთ-აზერბაიჯანის საზღვარზე მიმდინარე მოვლენებთან დაკავშირებით.
სიმონიანს არც ერთი სახელი არ დაუსახელებია.
სავარაუდოდ, მას ასეთი მოთხოვნით სომხეთის მცხოვრებლები მიმართავდნენ, რადგან მარგარიტა სიმონიანი ეთნიკურად სომეხია.
თუმცა, სიმონიანს სომხეთში არასოდეს უცხოვრია. ის რუსეთში, ქალაქ კრასნოდარში დაიბადა, სოჭში ცხოვრობდა და ამერიკაში სწავლობდა. შემდეგ, მოსკოვში გადავიდა, სადაც რუსეთის სახელმწიფო ტელევიზიაში გაიკეთა კარიერა.
სიმონიანი რეგულარულად ხდება სხვადასხვა სკანდალის გმირი.
ცოტა ხნის წინ, რუსული ოპოზიციის ლიდერმა, ალექსეი ნავალნიმ გამოაქვეყნა გამოძიება სახელწოდებით „პარაზიტები“, რომელშიც საბიუჯეტო სახსრების მასშტაბურ ქურდობაზე იყო საუბარი, რითაც დაკავებული არიან მარგარიტა სიმონიანი და მისი ნათესავები, ამისათვის კი, მათ შორის, ტელეკომპანია Russia Today-ში საკუთარ ხელმძღვანელ პოზიციებს იყენებენ.
თანმიმდევრულად:
1. მარგარიტა სიმონიანის ბრალდებები და არგუმენტები;
2. სომხური საზოგადოების რეაქცია.
Russia Today-ის ხელმძღვანელი: „ყველაფრის შემდეგ, რაც თქვენ გააკეთეთ, რუსეთს ყველანაირი მორალური უფლება აქვს, გაფურთხოთ და მიწასთან გაგასწოროთ
„მე მივმართავ სომხეთის ხელისუფლებას. სწორედ ხელისუფლებას და არა ხალხს, რომლის ნაწილი მეც ვარ.
მივმართავ მხოლოდ იმიტომ, რომ თქვენმა ინტერნეტჯარებმა გამოტენეს ჩემი სოციალური ქსელები მოთხოვნით (აგრესიული ფორმით) „გამოვხატო ჩემი პოზიცია“.
მთხოვეს – გამოვხატავ.
საკუთარ თავს გვერდიდან შეხედეთ. შეხედეთ, რას აკეთებთ. როგორ იქცევით? როგორი სომხები ხართ? (…)
მრავალწლიანი სიკეთისა და დაცვის საპასუხოდ, რომელსაც რუსეთიდან იღებდით, თქვენ არ აღიარეთ ყირიმი. იმიტომ, რომ ეს სომხეთის შიდა საქმეა.
მხოლოდ პოლიტიკური შურისძიების გამო, თქვენ დააპატიმრეთ რობერტ კოჩარიანი (სომხეთის ექსპრეზიდენტი) – რუსეთის მუდმივი მოკავშირე. დააპატიმრეთ სპეციალურად, დემონსტრაციულად, სახეში შეაფურთხეთ თქვენს „რუს მეგობრებს“. იმიტომ, რომ ეს სომხეთის შიდა საქმეა.
თქვენ გამოტენეთ ქვეყანა ანტირუსული არასამთავრობო ორგანიზაციებით, რომლებიც თქვენს ტერიტორიაზე ასწავლიან ახალგაზრდებს, როგორ ჩამოაგდონ ხელისუფლება რუსეთში. თქვენ გახდით ანტირუსული ძალების პლაცდარმი კავკასიაში. იმიტომ, რომ ეს შიდა სომხური საქმეა.
თქვენ გამოყარეთ რუსი-სომეხი ბიზნესმენები. თქვენ არ გინდათ არაფერი, რაც დაკავშირებულია რუსეთთან. იმიტომ, რომ ეს შიდა სომხური საქმეა.
თქვენი მედია და სოციალური ქსელები მუდმივად ტალახს ასხამენ რუსეთს, პუტინს, ყველას, ვინც პუტინს უჭერს მხარს – განსაკუთრებით რუს სომხებს (მაგალითად, მე).
თქვენ გაყავით საწყალი და ამის გარეშეც გაქრობის პირას მყოფი სომეხი ხალხი – რუს სომხებად და „ნამდვილებად“ – ვინც მხარს უჭერს თქვენს ამჟამინდელ ხელისუფლებას. იმიტომ, რომ ეს შიდა სომხური საქმეა.
ახლა კი, როდესაც თქვენს საზღვარზე ომია, როდესაც თქვენი რეჟიმის არსებობაც კი საფრთხის ქვეშაა, როდესაც მთელი მსოფლიოს სომხები უკვე ხედავენ გამოცოცხლებულ, მოხრილდანიანი იანიჩარის მოჩვენებას, რომლითაც კუწავდნენ ჩვენს წინაპრებს, თქვენ გაგახსენდათ, რომ რუსეთი ვალდებულია ისევ გიშველოთ.
ეს სომხეთის შიდა საქმე აღარ არის?
მთელი იმ ბოროტებისა და შეურაცხყოფის შემდეგ, რომელსაც თქვენ ბოლო წლებში რუსეთის მიმართ ავლენდით, თქვენს საინფორმაციო ჯარებსა და თქვენ მიგაჩნიათ, რომ უფლება გაქვთ რუსეთისგან დახმარებას ელოდოთ?
სინამდვილეში, ყველაფრის შემდეგ, რაც თქვენ გააკეთეთ, რუსეთს სრული მორალური უფლება აქვს, გაფურთხოთ და მიწასთან გაგასწოროთ.
მაგრამ ის ასე არ მოიქცევა. დარწმუნებული ვარ. ამჯერადაც დაგეხმარებათ.
იმიტომ, რომ რუსეთი ასეთია. დიდსულოვანი და კეთილშობილი. ჩემი სამშობლო, საყვარელი.
თქვენ კი – ერთი მუჭა მოღრიალე პოლიტიკანები, რომლებმაც დიადი სომეხი ხალხის ინტერესებს წუთიერი ძალაუფლებისა და წვრილმანი პირადი შურისძიების გამო უღალატეთ“.
სომხური საზოგადოების რეაქცია
სოციალურ ქსელებში დისკუსია დაიწყო და გრძელდება. Russia Today-ს ხელმძღვანელმა მოგვიანებით საკუთარ პოსტს დაამატა განცხადება, რომ „სომხეთში ბევრი გავლენიანი ადამიანი“ მზად არის ხელი მოაწეროს მის სიტყვებს. თუმცა, სოციალურ ქსელებში, დიდწილად კრიტიკული კომენტარებია.
ორი სახასიათო ციტატა:
ლაურა ბაღდასარიანი, კვლევითი ცენტრი „რეგიონის“ დირექტორი:
„კითხვა 1. უნდა ჩავთვალოთ თუ არა, სომხეთსა და მის მოქმედ ხელისუფლებაზე თავდასხმები და მუქარა, რომელსაც ტელეკომპანია RT-ისა და საინფორმაციო სააგენტო „სპუტნიკის“ ხელმძღვანელი, მარგარიტა სიმონიანი ახმოვანებს, ზემოაღნიშნული რუსული საინფორმაციო რესურსების ოფიციალურ მოსაზრებად?
კითხვა 2. აუცილებელია თუ არა, „სპუტნიკ-სომხეთს“ შეუჩერდეს სომხეთის ტერიტორიაზე მუშაობის უფლება, რომლის რედაქტორსაც მიაჩნია, რომ საერთოდაც, კარგი იქნებოდა სომხეთისა და მისი ხელისუფლების გასრესა“.
არმენ დარბინიანი, სომხურ-რუსული უნივერსიტეტის რექტორი:
„სომხეთის ხელისუფლებისადმი მიმართვით, თქვენ ღიად გამოხატავთ საკუთარ ზიზღს მის მიმართ. მინდა აღვნიშნო: კარგია ის თუ ცუდი – ეს ჩვენი ხელისუფლებაა, სომეხი ხალხის მიერ არჩეული და სომეხი ხალხი პატივისცემას მოითხოვს თავისი ხელისუფლებისადმი. (…) ხელისუფლების შეურაცხყოფით, ამ შემთხვევაში, შეურაცხყოფთ ხალხსაც, რომელსაც შეცდომით საკუთარ თავსაც ათვლით“.
