სლოვაკეთის აკრძალვის მიუხედავად, "ქართული ლეგიონის" მეთაური ქვეყანაში ჩავიდა
მამუკა მამულაშვილი სლოვაკეთში
უკრაინაში მებრძოლი “ქართული ლეგიონის” ხელმძღვანელი, მამუკა მამულაშვილი სლოვაკეთში ჩავიდა, თუმცა წლის დასაწყისში სლოვაკეთის ხელისუფლება მისთვის ქვეყანაში შესვლის აკრძალვაზე საუბრობდა.
იანვრის ბოლოს სლოვაკეთის პრემიერმინისტრი, რობერტ ფიცო აცხადებდა, რომ ოპოზიცია ქვეყანაში სახელმწიფო გადატრიალებას ამზადებდა და სლოვაკეთში ჩასული იყო “ექსპერტთა ჯგუფი, რომელიც აქტიურად მონაწილეობდა საქართველოში, ასევე უკრაინის მაიდანის მოვლენებში”. ფიცომ მტკიცებულებების გარეშე აღნიშნა, რომ ანტისამთავრობო აქციების ორგანიზებაში უკრაინის ომში მებრძოლი “ქართული ლეგიონი” მონაწილეობდა.
31 იანვარს კი შინაგან საქმეთა მინისტრმა, მატუს შუტაი ეშტოკმა შესაძლო სახელმწიფო გადატრიალების მცდელობაში მამუკა მამულაშვილი დაადანაშაულა და თქვა, რომ მას და კიდევ 10 პირს სლოვაკეთში შესვლა აეკრძალათ.
ოთხშაბათს, სლოვაკმა ჟურნალისტმა, ტომაშ ფორომ გამოაქვეყნა მამულაშვილთან ინტერვიუ, რომელიც ივლისის ბოლოს ბრატისლავაში, სლოვაკეთის მთავრობის შენობასთან ახლოს ჩაიწერა. ინტერვიუში მამულაშვილმა კიდევ ერთხელ უარყო სლოვაკეთის მთავრობის ბრალდებები “გადატრიალების მცდელობასთან” დაკავშირებით.
“ცხადია, მე სლოვაკეთში ყუთით არავის შევუყვანივარ. მათ არ შეუძლიათ წარმოადგინონ რაიმე სახის მტკიცებულება იმის შესახებ, რომ მე გადატრიალებას ვამზადებდი. არანაირი კავშირი არ მქონია არცერთ პოლიტიკოსთან და დღემდე ასეა. ცივილიზებულ ქვეყანაში ფაქტებს უყურებენ და არა ტელევიზიიდან გავრცელებულ რაღაც ზღაპრებს.
მე არასოდეს მიცდია სახელმწიფო გადატრიალება სლოვაკეთში და არასოდეს მიფიქრია ამაზე. როდესაც ისინი ამაში მადანაშაულებდნენ, მე ვიცავდი თავისუფლებასა და დემოკრატიას და არა მხოლოდ უკრაინისათვის, არამედ საქართველოსთვის, სლოვაკეთისთვის და სხვა ქვეყნებისთვის, რომლებიც პოტენციურად შესაძლოა რუსეთის აგრესიის სამიზნე გახდნენ.” – ამბობს მამუკა მამულაშვილი.
წინაისტორია
სლოვაკეთის მთავრობის მრჩეველმა და ევროპარლამენტის წევრმა ერიკ კალინიაკმა თბილისში “ქართული ოცნების” წარმომადგენლებთან, მათ შორის მაკა ბოჭორიშვილთან შეხვედრის შემდეგ ასევე განაცხადა, რომ “საქართველოში და სლოვაკეთში მიმდინარე საპროტესტო აქციები უცხოეთიდან ფინანსდება სხვადასხვა არასამთავრობო ორგანიზაციის მეშვეობით.”
კალინიაკმა გამოაქვეყნა ფოტო, რომელზეც მამულაშვილი სლოვაკეთის ანტისამთავრობო აქციების ერთ-ერთ ორგანიზატორთან, ლუცია შტასელოვასთან ერთადაა გადაღებული. შტასელოვამ განმარტა, რომ ფოტო ორი წლის წინ, ბრატისლავაში გადაიღო, ტომაშ ფოროს წიგნის პრეზენტაციის ფარგლებში, სადაც მამულაშვილი ერთ-ერთ ცენტრალურ ფიგურად არის მოხსენიებული.
აღსანიშნავია, რომ სლოვაკეთში იანვრის ბოლოს ასევე დააკავეს უკრაინის მოქალაქე, რომელსაც სახელმწიფო გადატრიალების მომზადებაში ედებოდა ბრალი. ადგილობრივი მედიის ინფორმაციით, დაკავებული დეპორტირებულია ქვეყნიდან.
ქართული ლეგიონი არის უკრაინული სამხედრო ქვედანაყოფი, რომელიც ქართველი მოხალისეებისგან და პროფესიონალი სამხედროებისგან შედგება. ლეგიონი აღმოსავლეთ უკრაინაში რუსეთის შეჭრის შემდეგ შეიქმნა. მისი მეთაურია პოლკოვნიკი მამუკა მამულაშვილი.
2016 წლის თებერვალში ქართული ლეგიონი ოფიციალურად შეუერთდა უკრაინის 25-ე მოტოქვეითთა ბატალიონს და ამჟამად უკრაინის თავდაცვის სამინისტროს დაზვერვის სამმართველოს ექვემდებარება.
ქართული ლეგიონი, რომლის რიგებშიც ქართველი მოხალისეების გარდა სხვა ეროვნების წევრებიც იბრძვიან, დღეისთვის 2000-მდე სამხედროს აერთიანებს.
რუსეთის შინაგან საქმეთა სამინისტრომ უკრაინაში ქართული ლეგიონის მეთაური ძებნილთა სიაში 2023 წლის 5 ოქტომბერს შეიყვანა. მამუკა მამულაშვილი აღნიშნულს გამოეხმაურა და სოციალურ ქსელში დაწერა: “საოცარია, როგორ გაუსწრეს (ქართულ) ოცნებას”.
