ლიტერატურული კონკურსი "მაჩაბელი" პროტესტის ნიშნად ჟიურის სამმა წევრმა დატოვა - რა მოხდა დაჯილდოებაზე
ლიტერატურული კონკურსი “მაჩაბელი”
ლიტერატურული პრემია „მაჩაბლის“ დაჯილდოება ჟიურის სამმა წევრმა პროტესტის ნიშნად დატოვა. მათი განცხადებით, მიზეზი ჟიურის ერთ-ერთი წევრის, იოსებ ჭუმბურიძის მიკერძოებული დამოკიდებულება გახდა კონკურსის ერთ-ერთი მონაწილის, ნინიკო მშვიდობაძის მიმართ, რომელიც ამავე დროს მმართველი პარტია “ქართული ოცნების” აქტიური მხარდამჭერი და გურიის საკრებულოში ფრაქციის თავმჯდომარის მოადგილეა.
იოსებ ჭუმბურიძე კულტურის სამინისტროს შემოქმედებითი პროცესების ხელშეწყობის დეპარტამენტის თანამშრომელია. იგი ხელისუფლების მიმართ ლოიალობით, კრიტიკულ მედიაზე სიტყვიერი თავდასხმებით, ჰომოფობიით გამორჩეული პერსონაა.
სხვადასხვა დროს მას მმართველი პარტიის, “ქართული ოცნებისა” და მიი საპატიო თავმჯდომარის, ბიძინა ივანიშვილის მიმართ არაერთი მხარდამჭერი განცხადება გაუკეთებია. საჯარო განცხადებებში ის თავს ესხმის ოპოზიციას, კრიტიკულ მედიას, ავრცელებს შავრაზმული და პრორუსული პლატფორმების მასალას.
ჟიურის ერთ-ერთი წევრის, თამარ გელიტაშვილის თქმით, კონკურსი დატოვეს იმიტომ, რომ “ერთის კაცის გადაწყვეტილებაზე” აიგო ყველაფერი. როგორც გელიტაშვილი განმარტავს, სოსო ჭუმბურიძეს უნდოდა, პოეზიაში გაემარჯვა ნინიკო მშვიდობაძეს, რასაც ჟიურის წევრების მძაფრი პროტესტი მოჰყვა.
“დაჯილდოებამდე ვიგებთ, რომ დააწესეს ნინიკო მშვიდობაძისთვის განსაკუთრებული პრიზი, ეს ჩვენთვის სიურპრიზი იყო. ამით საერთოდ დასამარდა „მაჩაბელი“. მე ვმუშაობ გორის უნივერსიტეტში, რომც საერთოდ გამიშვან სამსახურიდან, მე მაქვს ჩემი ღირსება და ამ ღირსებას ვერ გადავლახავ.“ – ამბობს თამარ გელიტაშვილი.
თამარ გელიტაშვილთან ერთად კონკურსის დაჯილდოების ცერემონია პროტესტის ნიშნად ჟიურის კიდევ ორმა წევრმა – ნინია სადღობელაშვილმა და თათია მთვარელიძემაც დატოვეს.
ჟიურის პროტესტს ნინიკო მშვიდობაძე სოციალურ ქსელში გამოეხმაურა:
„ეი თქვენ მანდ, ორ სკამზე მჯდომარეთა კასტავ, „მაჩაბლის“ საკმაოდ პრესტიჟულ ლიტერატურულ კონკურსს თქვენი პროტესტით არაფერი დააკლდება, აი, გორის უნივერსიტეტიდან კი რაც მალე წავა გოიმი „ლექტორი“, მით უკეთესი უნივერსიტეტისთვის. ჟურნალი „ცისკარიც“ უნდა დატოვოს ახლა თამარ გელიტაშვილმა, რადგან ეს ჟურნალი სამინისტროსგან ფინანსდება. ნინია სადღობელაშვილმა ხელისუფლებისა და სამინისტროს მიერ დაფინანსებულ ყველა კონკურსის ჟიურის წევრობაზე უნდა თქვას უარი, უარი უნდა უთხრას სამინისტროს თავისი პიესების დადგმის ხელშეწყობისთვის. ზუსტად ასევე უნდა თქვას უარი პრემია „ანაზე“ მარიამ წიკლაურმა“. – წერს მშვიდობაძე სოციალურ ქსელში.
ჟიურის წევრთა პროტესტს სოციალურ ქსელში გამოეხმაურა სოსო ჭუმბურიძეც. მისი განმარტებით „სპეციალური პრიზი“ დამფუძნებლის უფლება იყო და ამ გადაწყვეტილებასთან კავშირი არ აქვს.
“მაჩაბლის“ პრემიას 2020 წელს ჩაეყარა საფუძველი და წელს მეოთხედ გაიმართა. კონკურსის შესახებ, საჯაროდ გამოქვეყნებული ინფორმაციის მიხედვით, წინა წლებში დამფუძნებლის პრიზი არ გაცემულა და წელს ის პირველად გაიცა.
