FES-ის კვლევა: 25-29 წლის ახალგაზრდების თითქმის ნახევარი არც დასაქმებულია და არც სწავლობს
კვლევა ახალგაზრდებზე
საქართველოში 14-29 წლის ახალგაზრდების დამოკიდებულებები, აღქმები და მოსაზრებები ფრიდრიხ ებერტის ფონდმა (FES) გამოიკვლია. კვლევა, სახელად „იმედებსა და გაურკვევლობას შორის” 26 სექტემბერს გასაჯაროვდა. კვლევაში ვკითხულობთ, რომ 25-29 წლის ახალგაზრდების თითქმის ნახევარი არც დასაქმებულია და არც სწავლობს.
მთავარი მიგნებები:
● ახალგაზრდების უმრავლესობა (58%) ამბობს, რომ არ აქვს სამსახური. ყოველი ხუთი გამოკითხულიდან ერთი (21%) აქტიურად ეძებს სამსახურს.
● “ახალგაზრდების ორი მესამედი (65%) ამბობს, რომ ისინი ფინანსურად, მეტწილად, სხვა ადამიანებზე (მაგალითად, მშობლებზე, პარტნიორებზე, ნათესავებზე) არიან დამოკიდებულნი. გამოკითხულთა მხოლოდ 38% აღნიშნავს, რომ მათ საკუთარი შემოსავალი აქვთ, მაგალითად, ხელფასი, სესხი ან გრანტი, ან უძრავი ქონების გაქირავებისგან მიღებული შემოსავალი.
ახალგაზრდა მამაკაცებს, ასევე, მათ, ვინც 25-29 ასაკობრივ ჯგუფშია, თბილისში ცხოვრობს და უმაღლესი განათლება აქვს, უფრო ხშირად გააჩნიათ საკუთარი შემოსავალი, ვიდრე ახალგაზრდა ქალებს, მათ, ვინც 24 წლამდე ასაკშია, თბილისის გარეთ ცხოვრობს და საშუალო განათლება აქვს.”
● UNICEF-ის კვლევა: დეპრესიის ნიშნები ახალგაზრდებში და ფიქრები სუიციდზე
● ახალგაზრდებში ხშირია ჰომოფობია, არადომინანტური ჯგუფების მიმართ უარყოფითი განწყობა.
● კვლევის მიხედვით, მართალია, ახალგაზრდები საქართველოში თავს ევროპელებად მიიჩნევენ და მიაჩნიათ, რომ „ევროპულ ღირებულებებს“ იზიარებენ, მათთვის პრიორიტეტული და უფრო ფასეული „ქართული ეროვნული“ ღირებულებებია.
● 69% ეწინააღმდეგებიან იმ იდეას, რომ სიტყვის თავისუფლება გულისხმობს უფლებას, აკრიტიკო ყველა რელიგია.
● ოჯახური ღირებულებები, შვილების ყოლა (88%) და ქორწინება (77%) ასევე საკმაოდ ან ძალიან მნიშვნელოვანია. ოჯახური ღირებულებები უფრო მნიშვნელოვანია მამაკაცებისა და 25-29 წლის ახალგაზრდებისთვის. ამასთან, დედაქალაქს გარეთ მცხოვრები ახალგაზრდებისთვის ქორწინება უფრო მნიშვნელოვანია, ვიდრე დედაქალაქში მცხოვრები ახალგაზრდებისთვის.
● ყველაზე მნიშვნელოვანი ღირებულებები ახალგაზრდებისთვის „პიროვნული ღირსება“, და „პატიოსნება/წესიერებაა“. ასევე ხშირად სახელდება „ერთგულება“ და „გულწრფელობა“.
● ინსტიტუტებს შორის ახალგაზრდები ყველაზე მეტად ენდობიან ჯარს (74%), ეკლესიას/ რელიგიური აღმსარებლობის ინსტიტუტებს (67%), პოლიციას (48%) და სასამართლოებს (39%)
● ახალგაზრდები ინსტიტუტებს შორის ყველაზე ნაკლებად ენდობიან პოლიტიკურ პარტიებს (79% არ ენდობა), მედიას (74% არ ენდობა), პრეზიდენტს (71% არ ენდობა), პროფკავშირებს (67% არ ენდობა) და ეროვნულ მთავრობას (66% არ ენდობა).
● საქართველოს მთავრობა ბაღებში სამხედრო სწავლების შეტანას აპირებს
● გამოკითხვამ გამოავლინა სამი ჯგუფი, რომელიც ახალგაზრდებისთვის ყველაზე მეტად მიუღებელია: ნარკოტიკზე დამოკიდებული ადამიანები (61%), ქვიარ ადამიანები (46%) და რუსეთიდან შემოსულები (44%), რომლებსაც ახალგაზრდები არ მისცემდნენ ქვეყანაში შემოსვლის უფლებას, რომ შეეძლოთ.
● მეორე მხრივ, ახალგაზრდებისთვის ყველაზე მისაღები ადამიანები არიან მრავალშვილიანი დედები, რელიგიური ადამიანები, იძულებით გადაადგილებული პირები და ლტოლვილები.
● ახალგაზრდების დაახლოებით მესამედი საზღვარგარეთ ერთიდან ხუთ წლამდე წასვლის სურვილს გამოთქვამს. ახალგაზრდები საზღვარგარეთ ცხოვრების სურვილს ორი ძირითადი მიზეზით ხსნიან: უფრო მაღალი ხელფასები (57%) და უკეთესი განათლება (45%).
● ფოკუს-ჯგუფებში დისკუსიის დროს ახალგაზრდებმა ემიგრაცია ქვეყნის წინაშე არსებულ ერთ-ერთ ყველაზე მნიშვნელოვან გამოწვევად დაასახელეს და აღნიშნეს, რომ ახალგაზრდები ქვეყანას, ძირითადად, ქვეყანაში არსებული ეკონომიკური სიდუხჭირის გამო ტოვებენ. სხვა მიზეზებს შორის დასახელდა განათლების დაბალი დონე და პიროვნული განვითარებისა ან რაიმეს მიღწევის შესაძლებლობების სიმწირე.
● მექსიკის გავლით ამერიკაში – სად და რატომ გარბიან ქართველები
● ახალგაზრდები პოლიტიკისადმი ძირითადად აპათიურად არიან განწყობილნი. 62% ამბობს, რომ პოლიტიკით დაინტერესებული არ არის. ახალგაზრდების მხოლოდ 34% ეცნობა პოლიტიკური მოვლენების შესახებ ინფორმაციას.
● ბევრი ახალგაზრდა ერთმანეთისგან ვერ ასხვავებს მემარჯვენე და მემარცხენე პოლიტიკას და უჭირს თავის მონიშვნა სკალაზე.
● ასევე, ახალგაზრდების 44% დადებითად აფასებს დემოკრატიის ამჟამინდელ მდგომარეობას ქვეყანაში.
● 89%-ს არასოდეს მიუღია მონაწილეობა დემონსტრაციაში
● ახალგაზრდების მინიმუმ 75% ამბობს, რომ ბოლო ექვსი თვის განმავლობაში
არ მიუღია მონაწილეობა რომელიმე პოლიტიკურ აქტივობაში (მაგ.
მოხალისეობა, შემოწირულობა, პეტიციების ხელმოწერა, დემონსტრაციებში
მონაწილეობა, და ა.შ.).
● 71% სანდოდ მიიჩნევს რელიგიურ ორგანიზაციებს
● 74% არ ენდობა მედიას
● ამასთან, 77% ფიქრობს, რომ მათი ოჯახების ცხოვრების დონე მომდევნო ხუთი წლის განმავლობაში გაუმჯობესდება
● 31% არ იღებს განათლებას.
● საქართველოში ახალგაზრდების თითქმის ორი მესამედი (62%) ეთანხმება
მოსაზრებას, რომ საქართველო ევროპული ქვეყანაა.
● ყოველი მეხუთე რესპონდენტი მიიჩნევს, რომ საქართველოს უახლოესი
მეგობარი ქვეყანა არ ჰყავს. ახალგაზრდები, რომლებიც ასეთ ქვეყანას
იხსენებდნენ, ყველაზე ხშირად ასახელებდნენ უკრაინას (28%),
ამერიკის შეერთებულ შტატებს (18%) და თურქეთს (11%), ხოლო
რუსეთი აღიქმება ყველაზე მნიშვნელოვან საფრთხედ საქართველოს
სახელმწიფოებრიობისთვის (84%), ეროვნული უსაფრთხოებისთვის (78%),
ეკონომიკური სისტემისთვის (74%) და ეროვნული ღირებულებებისთვის
(72%). აღსანიშნავია, რომ ამგვარად უფრო ხშირად ეთნიკურად
ქართველი ახალგაზრდები ფიქრობენ, ხოლო ეთნიკური უმცირესობების
წარმომადგენელი ახალგაზრდების მხოლოდ მცირე ნაწილი მიიჩნევს, რომ
რუსეთთან თანამშრომლობა საფრთხეს უქმნის საქართველოს.
