კრემლის გზავნილი თბილისს: რუსეთთან დიპლომატიური კავშირები მეტ ეკონომიკურ სარგებელს მოიტანს
კრემლის გზავნილი თბილისს
რუსეთი მზადაა თბილისთან თანამშრომლობის გაფართოებისთვის და საქართველოს ხელისუფლებას მოუწოდებს, გადახედოს დიპლომატიური ურთიერთობების აღდგენის პოტენციურ ეკონომიკურ სარგებელს – ამის შესახებ რუსეთის საგარეო საქმეთა მინისტრის მოადგილე, მიხაილ გალუზინი პროპაგანდისტულ მედია TASS-თან ინტერვიუში აცხადებს.
საქართველომ და რუსეთმა დიპლომატიური ურთიერთობები 2008 წლის აგვისტოს ომის შემდეგ გაწყვიტეს. მას შემდეგ ეკონომიკური კავშირები ეტაპობრივად აღდგა, თუმცა პოლიტიკური დიალოგი შეზღუდულ ფორმატში მიმდინარეობს. სწორედ ამ ფონს ეხმიანება კრემლის გზავნილი, რომელიც ეკონომიკურ ურთიერთობებს პოლიტიკურ ნორმალიზაციაზე წინ აყენებს.
მიხაილ გალუზინი ამბობს, რომ “მოსკოვი ღიაა რუსეთ-საქართველოს კავშირების გაღრმავებისთვის“ და ამ პროცესის მთავარ მამოძრავებელ ძალად ეკონომიკურ თანამშრომლობას ასახელებს. მისი თქმით, სწორედ რუსეთთან თანამშრომლობაა საქართველოს “უპრეცედენტო ეკონომიკური” აღდგენის ერთ-ერთი მთავარი ფაქტორი.
მინისტრის მოადგილე ამტკიცებს, რომ ორ ქვეყანას შორის პოლიტიკური დიალოგის არარსებობა “მკვეთრად ეწინააღმდეგება“ ეკონომიკურ დინამიკას და მიუთითებს, რომ დიპლომატიური ურთიერთობების არსებობის შემთხვევაში მიღწევები შესაძლოა უფრო მასშტაბური ყოფილიყო.
“ეს მათი საქმეა,“ — ამბობს გალუზინი საქართველოს ხელისუფლებაზე საუბრისას, თუმცა ამატებს, რომ მოსკოვს სურს, თბილისმა იცოდეს მისი მზადყოფნის შესახებ, იქ სადაც თანამშრომლობა ორმხრივ სარგებელს მოიტანს.
ინტერვიუში გალუზინი ასევე აქებს საქართველოს მოქმედ ხელისუფლებას და ამბობს, რომ ის “ქვეყნის სუვერენიტეტის აღდგენისკენ“ ისწრაფვის. პარალელურად, ის აკრიტიკებს ქვეყნის წინა ხელისუფლებას და კონკრეტულად ასახელებს მიხეილ სააკაშვილის ეპოქას, რომელსაც, მისი შეფასებით, დასავლეთისკენ “ცალმხრივი გადახრა“ ახასიათებდა რუსეთთან თანამშრომლობის საზიანოდ.
გალუზინი დასავლეთსაც ახსენებს და ამტკიცებს, რომ საქართველო-რუსეთის ურთიერთობებს “ბუნებრივი ხასიათი“ აქვს და ისინი „სულიერ ერთიანობასა და საუკუნოვან ისტორიულ და კულტურულ კავშირებზეა დაფუძნებული“, რაც, მისი თქმით, ეწინააღმდეგება დასავლეთის მიერ შექმნილ ნარატივს, თითქოს ეს კავშირები მოსკოვის მხრიდან ხელოვნურად თავსმოხვეულია.
მან ხაზი გაუსვა, რომ 2025 წელს ორ ქვეყანას შორის სავაჭრო ბრუნვამ რეკორდულ ნიშნულს — 2.7 მილიარდ დოლარს მიაღწია. გალუზინმა ასევე წარმოადგინა კონკრეტული მონაცემები ქართული პროდუქციის რუსულ ბაზარზე წილის შესახებ:
“თავის მხრივ, რუსეთი საქართველოსთვის ხორბლისა და ნავთობის მთავარი მიმწოდებელია. ანალოგიური ვითარებაა ტურიზმის სექტორშიც, რომელიც საქართველოსთვის საკვანძო ინდუსტრიაა – თითქმის ყოველი მეოთხე ტურისტი ჩვენი ქვეყნიდანაა.“ – აღნიშნა გალუზინმა.
