კორონავირუსით ინფიცირებულია იოანე ღვთისმეტყველის სახელობის ტაძრის მღვდელმსახური

სასულიერო პირი, რომელსაც კორონავირუსი დაუდასტურდა, თბილისში, ვერაზე მდებარე წმ. იოანე ღვთისმეტყველის სახელობის ტაძრის მღვდელმსახურია. ბოლოს მან საეკლესიო მსახურება სხვა სასულიერო პირებთან ერთად რამდენიმე დღის წინ, ხარებაზე აღასრულა. covid-19 დაუდასტურდა საპატრიარქოს დაცვის თანამშრომელსაც. 

14 აპრილის 10:00 საათისთვის, საქართველოში კორონავირუსით ინფიცირების 296 შემთხვევაა დადასტურებული. კარანტინის რეჟიმშია 4834 ადამიანი, ხოლო სტაციონარში მეთვალყურეობის ქვეშ – 434 პირი. კორონავირუსით ინფიცირებულთაგან 67 გამოჯანმრთელდა და 3  გარდაიცვალა. უცხოეთიდან საქართველოში სამკურნალოდ გადმოყვანილია კორონავირუსით ინფიცირებული საქართველოს 3 მოქალაქე.

როგორც საპატრიარქოს პრესსამსახურის უფროსი, დეკანოზი ანდრია ჯაღმაიძე განმარტავს, დაინფიცირებული მღვდელმსახური ეკლესიაში რამდენიმე დღის წინ იმყოფებოდა, მსახურებას კი სხვა სასულიერო პირებიც ესწრებოდნენ. ჯაღმაიძე ადასტურებს, რომ covid-19 დაუდგინდა საპატრიარქოს დაცვის თანამშრომელსაც.

ანდრია ჯაღმაიძე ფეისბუკის საკუთარ გვერდზე წერს, რომ დაცვის ეს წევრი საპატრიარქოს გარე პერიმეტრს იცავდა და მას საპატრიარქოს შიდა შენობასთან და თანამშრომლებთან კონტაქტი არ ჰქონია.

ბოჭორიშვილის კლინიკის სამეთვალყურეო საბჭოს დირექტორის, მაკა სოლოღაშვილის თქმით, სასულიერო პირი, რომელსაც covid-19 დაუდასტურდა, მათ კლინიკაში მკურნალობს. ამავე საავადმყოფოშია გადაყვანილი კორონავირუსით ინფიცირებული სასულიერო პირის ოჯახის ორი წევრი: და და დისშვილი. 

„სასულიერო პირი გუშინ შემოიყვანეს კლინიკაში. ოჯახის სულ სამი წევრია მოთავსებული, მაგრამ რომელს რომლისგან გადაედო, ამ ეტაპზე ამაზე საუბარი არ არის საფუძვლიანი,“ – ამბობს სოლოღაშვილი.

covid-19-ით დაავადებული მღვდელმსახურის და, რომელიც ასევე ინფიცირებულია, მედპერსონალის წარმომადგენელია. ის “თბილისის მედიცინის ინსტიტუტში” მუშაობს. “თბილისის მედიცინის ინსტიტუტში” მისგან კორონავირუსით მედპერსონალის 4 წარმომადგენელი დაინფიცირდა, რის გამოც კლინიკაში კარანტინი გამოცხადდა. 

კორონავირუსით ინფიცირებულ მღვდელმსახურს მაღალი სიცხე აქვს და ახველებს. ექიმების თქმით ისიც და მისი ოჯახის წევრებიც თავს კარგად გრძნობენ.

იოანე ღვთისმეტყველის სახელობის ტაძარი ამ დროისთვის დაკეტილია. მრევლი, რომელიც ტაძარში დღეს, შვიდგზის ზეთისცხებაზე მივიდა, უკან გამოაბრუნეს. 

პირველ აპრილს პატრიარქმა ილია მეორემ განაცხადა, რომ ტაძრის კარი ღია იქნება ყველასთვის, ვინც ეკლესიაში მისვლას მოისურვებს და ეკლესიებში სააღდგომო ლიტურგია ისევ ჩვეულებრივი ტრადიციით, მრევლის თანდასწრებით ჩატარდება. 

12 აპრილს მაღალი იერარქიის სასულიერო პირებმა განაცხადეს, რომ მართლმადიდებელ ეკლესიებში სააღდგომო ღვთისმსახურება ღამით, კომენდანტის საათის დროს ჩატარდება.

ვიცე-პრემიერი მაია ცქიტიშვილი აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრება კომენდანტის საათის დარღვევა იქნება, თუმცა ეკლესიაში 3-ზე მეტი ადამიანის შეკრებისთვის შსს-ს დღემდე არავინ დაუჯარიმებია. 

• კორონავირუსი უკვე ეკლესიაშია. რას აპირებს საპატრიარქო სააღდგომოდ?
• ახლობლები რომ მირეკავდნენ, ზოგს ეტირებოდა – რას ჰყვება კორონავირუსით ინფიცირებული სტუდენტი
• კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 31 მარტიდან კი საქართველოს მთელს ტერიტორიაზე კომენდანტის საათი ამოქმედდა. კორონავირუსის პამდემიის გავრცელების შეჩერების მიზნით, მარნეულში, ბოლნისში, ლენტეხში და ქობულეთის მუნიციპალიტეტის სოფლებში: გვარაში, მუხაესტატეში, ლეღვასა და წყავრუკაში კარანტინი გამოცხადდა.