კორონავირუსი ჩრდილოეთ კავკასიაში: უკმაყოფილება ხელისუფლების მიმართ იზრდება
პანდემიის მასობრივი უარყოფა ჩრდილოეთ კავკასიაში, აღშფოთებითა და სასოწარკვეთით იცვლება.
ჩრდილოეთ კავკასიაში, დღე-ღამის განმავლობაში, კორონავირუსით ინფიცირების 428 ახალი შემთხვევა გამოვლინდა. ეპიდემიის დაწყებიდან, რეგიონში 11 548 შემთხვევა დადასტურდა. თუმცა, ცოტას თუ სჯერა, რომ ეს რიცხვები რეალურია.
ჩრდილოეთი ოსეთი: „საავადმყოფოებში საკმარისი ადგილები აღარ არის“
ჩრდილოეთ ოსეთში, სწრაფად იზრდება ინფიცირებულთა რიცხვი. უკანასკნელი დღე-ღამის განმავლობაში, 93 ადამიანი დაინფიცირდა, სულ – 1 253. ცხრა ადამიანი გარდაიცვალა.
თუმცა, რესპუბლიკაში მკვეთრად იზრდება სხვა სტატისტიკა – პაციენტები პნევმონიის დიაგნოზით.
რესპუბლიკურ საავადმყოფოში, 24 საათის განმავლობაში, კომპიუტერული ტომოგრაფიით 200-ზე მეტ შემთხვევას იკვლევენ, როდესაც ჩვეულებრივ პერიოდში, ნორმა 30 იყო.
- კორონავირუსი უჰანის ლაბორატორიიდან? რაში ადანაშაულებს დასავლეთი ჩინეთს
- რატომ ინფიცირდებიან ექიმები უკრაინაში?
- თურქეთი ტურისტული სეზონის გახსნას უკვე მაისის ბოლოს გეგმავს. როგორ მოხდება ამის ორგანიზება. ფოტო
- კორონავირუსი, განახლებადი
კორონავირუსისა და ორმხრივი პნევმონიის დიაგნოზის მქონე პაციენტებს რესპუბლიკის ორ უმსხვილეს საავადმყოფოში ათავსებენ. მაგრამ იქ უკვე აღარ არის საკმარისი ადგილები და ამ დიაგნოზის მქონე ადამიანები რაიონულ საავადმყოფოებში გადაჰყავთ.
ვიდეოზე, რომელიც სოციალურ ქსელებში გავრცელდა, გადაღებულია ერთ-ერთი საავადმყოფოს ეზო, სადაც კორონავირუსისა და პნევმონიის მქონე პაციენტებს ათავსებენ. იქ აღბეჭდილია სასწრაფო დახმარების ავტომობილების დიდი რაოდენობა.
მოდის ინფორმაცია მონასტრებში ინფიცირებული სასულიერო პირების შესახებ. სულ უფრო და უფრო მეტ მონასტერს კეტავენ გარეშე პირთათვის, მაგალითად, დაიხურა ტამისკის დედათა მონასტერი.
სოციალურ ქსელებში აცხადებენ, რომ ვლადიკავკაზის ღვთისმშობლის ტაძრის წინამძღვარი კორონავირუსის დიაგნოზით საავადმყოფოში გადაიყვანეს. ეკლესიის დანარჩენი წარმომადგენლები ორკვირიან შვებულებაში გაუშვეს, ტაძარი დაკეტეს, ჩატარდა შენობის დეზინფექცია და კარანტინი 16 მაისამდე გაგრძელდა.
ხელისუფლება ასეთ მკვეთრ მატებას 20 აპრილს, ვლადიკავკაზში გამართულ არასანქცირებულ მიტინგზე, თვითიზოლაციის მასობრივ დარღვევას უკავშირებს
5 მაისის მონაცემებით, რუსეთში გამოვლენილია კორონავირუსით ინფიცირების 150 ათასზე მეტი შემთხვევა. მხოლოდ უკანასკნელი დღე-ღამის განმავლობაში – 10 102 ახალი შემთხვევაა. ოფიციალური ინფორმაციით, რუსეთში, კორონავირუსით 1 451 პაციენტი გარდაიცვალა.
ინგუშეთი: წამალი არსებობს, მაგრამ ის „საკუთარ“ აფთიაქებშია
ინგუშეთის საზოგადოებაში ვრცელდება ვიდეო ნაზრანის რესპუბლიკურ საავადმყოფოში ახალი სკანდალის შესახებ.
ახალგაზრდა მამაკაცი, რომელმაც, გავრცელებული ინფორმაციით, დედა დაკარგა, ინფექციურ განყოფილებაში შევარდა, სადაც კორონავირუსიან პაციენტებს მკურნალობენ. ის პალატებში არსებულ ვითარებას კამერით იღებდა და ამბობდა, რომ საავადმყოფოებში არ ჰყოფნით წამლები და ის პირადად ყიდულობდა მედიკამენტებს კორონავირუსის სამკურნალოდ.
ინგუშეთის ჯანდაცვის სამინისტროს ხელმძღვანელის განცხადებას იმის შესახებ, რომ ყველაფერი საკმარისია, ის სიცრუეს უწოდებს.
5 მაისისთვის არსებული ოფიციალური ინფორმაციით, ინგუშეთში, ინფიცირების 966 შემთხვევა და 26 გარდაცვალების ფაქტი არის დადასტურებული.
სოციალურ ქსელებში ამტკიცებენ, რომ რესპუბლიკაში მედიკამენტები არის, მაგრამ ჯანდაცვის სამინისტროს ხელმძღვანელები მათ საკუთარ აფთიაქებში გზავნიან, შემდეგ კი ინფიცირებულთა ნათესავებს იქ უშვებენ მათ შესაძენად. როგორც სოციალურ ქსელებში აღნიშნავენ, ეს სქემა ინგუშეთში უკვე 25 წელია მუშაობს.
ადგილობრივი ჯანდაცვის სისტემის მიმართ უნდობლობა იმდენად დიდია, რომ სამედიცინო დაწესებულებებზე თავდასხმას სისტემური ხასიათი აქვს.
დაღესტანი: მასობრივი სიკვდილის საფრთხე
დაღესტანმა სამხრეთ რუსეთის სხვა რეგიონებს გადაასწრო როგორც ინფიცირებულების რიცხვის ზრდით, ისე ინფიცირებულთა საერთო რაოდენობით.
5 მაისის მონაცემებით, დაღესტანში 2 086 ადამიანია ინფიცირებული, მათგან 14 პაციენტი გარდაიცვალა.
განსაკუთრებით კატასტროფული სიტუაცია იქმნება რაიონულ ცენტრებში, სადაც მასობრივი სიკვდილის საფრთხეზე საუბრობენ.
30 აპრილს, Instagram არხზე tut.dagestan გამოჩნდა მიმართვა, რომელიც რესპუბლიკის ერთ-ერთი რაიონული ცენტრის, სოფელ გერგებილის მცხოვრებლებმა ჩაწერეს.
„ჩვენთან უკვე 12 ადამიანი გარდაიცვალა გასული რამდენიმე დღის განმავლობაში. ერთი ამდენი კიდევ მძიმე მდგომარეობაშია. სოფლის თითქმის ყველა მცხოვრები ავად არის. საავადმყოფოები გადავსებულია, ბევრი სახლში წევს.
საავადმყოფოებში არ არის დიაგნოსტირების საშუალებები, წამლები, სახარჯო მასალები. ყველაფერი, რაც საავადმყოფოებშია, ჟანგბადის ბალონების ჩათვლით, თვითონ მოქალაქეებმა შეიძინეს, საკუთარი ფულით. სოფლის ყველა მცხოვრები ფულს დებს და ამ ყველაფერს ყიდულობს“, – ნათქვამია მიმართვაში.
მსგავსი სიტუაციაა დაღესტნის სხვა რაიონებშიც.
„ზუსტად ანალოგიური სიტუაციაა კაიტაგის რაიონში. საავადმყოფოები პნევმონიის მქონე პაციენტებით არის გადავსებული. დედაჩემი პარამედიკია პატარა დასახლებაში და იქ ვირუსით ინფიცირებული იმდენი პაციენტი ჰყავთ, რომ სამედიცინო პერსონალი ვერ აუდის. დამცავი საშუალებები არ არის, სიცხის დამწევი საშუალებებიც კი არ არის. მედპერსონალს, როგორც საზარბაზნე ხორცს ისე იყენებენ“, – წერს საკუთარ ინსტაგრამარხზე ramazanova.aikhanum.
მახაჩყალის მცხოვრები, მუსლიმ მუსაევი JAMnews-ს უდასტურებს ინფორმაციას, რომ რესპუბლიკაში „საგანგაშო ვითარებაა“.
„ახლა ეს შეეხო ჩვენს მეზობლებს, ახლობლებს. ადამიანები მასობრივად ავადდებიან პნევმონიით. ჩვენ დიდი ხნის განმავლობაში ვერ ვაცნობიერებდით, რამდენად საშიშია ეს – დავდიოდით ზღვაზე, პიკნიკზე. კორონავირუსის ძირითადი წყარო ის ადამიანები გახდნენ, რომლებიც შინ რუსეთის სხვა რაიონებიდან, ძირითადად, მოსკოვიდან დაბრუნდნენ“.
3 მაისიდან სრულად ჩაიკეტა ქალაქი ხასავიურტი.
საზოგადო მოღვაწე, ბლოგერი მახაჩ აბდულაევი ამბობს, რომ ადგილობრივ ხელისუფლებას „თავისი დაღესტანი აქვთ პარალელურ განზომილებაში“. ამ დროს კი არსებობს ნამდვილი დაღესტანი, საშინელი სიტუაციით გერგებილში, გუბდენში, იზბერბაშსა და ყიზლარში, ამბობს ის.
COVID-დისიდენტები კავკასიაში უკვე ცოტანი დარჩნენ, მაგრამ ისინი ჯერ კიდევ არიან
სანამ ექიმები კორონავირუსით ინფიცირებული პაციენტების სიცოცხლისთვის იბრძვიან, ჩრდილოეთ კავკასიაში კვლავინდებურად არიან აქტივისტები, „COVID-დისიდენტები“. ისინი სოციალურ ქსელებში აგრძელებენ პროპაგანდას და მოუწოდებენ მოქალაქეებს, არ დაიჯერონ პანდემიის არსებობა და არ დარჩნენ სახლში.
თუმცა, ამავდროულად, ბევრი საკუთარ თავს ეწინააღმდეგება. მაგალითად, უარყოფენ კორონავირუსს, მაგრამ ამ ვირუსის გავრცელებაში მობილური კავშირგაბმულობის ანძებს ადანაშაულებენ.
ჩრდილოეთ ოსეთის ტერიტორიაზე 5G-ის არც ერთი ანძა არ არის. თუმცა, სოფელ ნოგირის მცხოვრებლებმა ონლაინპროპაგანდის გავლენით დაწვეს მათ დასახლებაში განთავსებული ერთ-ერთი მობილური ოპერატორის ძველი ანძა და ინტერნეტის გარეშე დარჩნენ.
ინგუში საზოგადო მოღვაწე, ტამირლან აკიევი, ჩრდილოეთ კავკასიაში არსებულ სიტუაციას აფასებს და ამბობს, რომ „რაც უფრო მეტი ადამიანი გარდაიცვლება კორონავირუსით – მით უფრო მეტად გაიგებენ ადამიანები, რომ პანდემია რეალურია“.
კარგი იქნებოდა, COVID-დისიდენტები მანამდე შეაჩერონ, სანამ ეს მოხდება, ამბობს ის.
