"საქართველოს ხელისუფლების რუსეთის ორბიტისაკენ სვლის შესაჩერებლად, გვჭირდება კონკრეტული ნაბიჯები" - კონგრესში MEGOBARI Act-ზე იმსჯელეს
კონგრესში MEGOBARI Act-ზე იმსჯელეს
აშშ-ის კონგრესში, საქართველოში მიმდინარე მოვლენების შესახებ ჰელსინკის კომისიის ფარგლებში მოსმენა გაიმართა. MEGOBARI Act-ის მომხსენებელთა ძირითადი ხაზი ბიძინა ივანიშვილისა და “ქართული ოცნების” რუსული კურსზე გადიოდა. განხილვას კონგრესმენი და MEGOBARI Act-ის ავტორი ჯო უილსონი ხელმძღვანელობდა.
მოსმენაზე სიტყვით გამოვიდნენ „ღია საზოგადოების ფონდის“ ევროინტეგრაციის პროგრამის ხელმძღვანელი ივანე ჩხიკვაძე, ევროკავშირში საქართველოს ყოფილი ელჩი და „ჩეთემ ჰაუსის“ უფროსი მკვლევარი, ნატალი საბანაძე და საქართველოში აშშ-ის ყოფილი ელჩი და „რენდის კორპორაციის“ უფროსი მკვლევარი, უილიამ კორტნი.
რა თქვეს სიტყვით გამომსვლელებმა
“ქართველი ხალხის არჩევანი ცხადია – ქვეყნის მომავალი ევროკავშირსა და ნატოშია და ამ არჩევანს ისინი ხმამაღლა, ქუჩაში აფიქსირებენ. ეს ხმა ისმის აქ, ვაშინგტონში, და ევროპის ქვეყნების დედაქალაქებში, მაგრამ ის არ ესმის მმართველ პარტიას, რომელიც ხალხის ნების საწინააღმდეგოდ კედელს აღმართავს საქართველოსა და დასავლეთს შორის.
აგენტების კანონი სრულიად გააქრობს კრიტიკულ ხმებს და გაანადგურებს ცოცხალ სამოქალაქო საზოგადოებას, რომელსაც საქართველო წლების განმავლობაში აშენებდა მეგობრებისა და პარტნიორების, მათ შორის აშშ-ის გულუხვი მხარდაჭერით.
ჩვენ გვჭირდება კონკრეტული ნაბიჯები, რომელიც შეაჩერებს საქართველოს ხელისუფლების სვლას რუსეთის ორბიტისაკენ.” – განაცხადა ივანე ჩხიკვაძემ.
ნატალი საბანაძემ თქვა, რომ საქართველოს მმართველი რეჟიმი სტალინის სახელმძღვანელოთი მოქმედებს და აგენტებად რაცხავს კრიტიკულ ხმებს:
“ეს კანონი სიმპტომია და არა მიზეზი – რეპრესიის იარაღია, რომელიც წინასაარჩევნოდ ცდილობს არასამთავრობო ორგანიზაციების მოსპობას.”
“ქართველებმა ეს ბრძოლა თავად უნდა იბრძოლონ. ამას ვაკეთებთ კიდეც. მაგრამ, გვჭირდება მეგობრები. მათ, ვინც ჩვენს მშვიდობიან და დემოკრატიულ ნებას უგულებელყოფს და უარს გვეტყვის მომავალზე, რომელიც ჩვენი შვილებისათვის გვსურს, შედეგები უნდა მოიმკონ.“ – განაცხადა ნატალი საბანაძემ.
უილიამ კორტნიმ მიმოიხილა დამოუკიდებელი საქართველოსა და აშშ-ის ურთიერთობა და აღნიშნა, რომ ამერიკა მუდამ მტკიცედ უჭერდა მხარს საქართველოს სუვერენიტეტსა და ტერიტორიულ მთლიანობას.
“თითქმის ოცდაათი წელია, რაც აშშ-სა და საქართველოს ღირებულებებზე დაფუძნებული ურთიერთობა გააჩნია. ახლა კი ამერიკამ განაცხადა ვიზების შეზღუდვის შესახებ მათთვის, ვინც სამოქალაქო საზოგადოებას ავიწროებს. ურთიერთობა კიდევ უფრო გაუარესდება, თუ “ქართული ოცნება” ოქტომბრის არჩევნებს გააყალბებს.” – აღნიშნა უილიამ კორტნიმ.
რა თქვეს კონგრესმენებმა
ჯო უილსონმა ისაუბრა რუსულ კანონზე, ასევე, თავდასხმებზე ოპოზიციისა და სამოქალაქო საზოგადოების წარმომადგენლების მიმართ და ხაზი გაუსვა, რომ საქართველოს ხელისუფლება ემსგავსება ვლადიმერ პუტინსა და სხვა ავტორიტარულ მმართველებს.
კონგრესმენმა საქართველო-ჩინეთის ურთიერთობებზეც გაამახვილა ყურადღება. ის ასევე მიესალმა სახელმწიფო დეპარტამენტის განცხადებას სავიზო აკრძალვასთან დაკავშირებით და აღნიშნა, რომ უნდა მოხდეს სანქციების დაწესება მათ მიმართ, ვინც “ძირს უთხრის საქართველოს დემოკრატიას და ახორციელებს რეპრესიებს საქართველოს მოქალაქეების წინააღმდეგ”.
ხდება ოპოზიციის ოფისების განადგურება. საქართველოს ხელისუფლება ემსგავსება პუტინს და სხვა ავტორიტარულ მმართველებს, მიუხედავად იმისა, რომ პუტინის მხრიდან საქართველოს 20%-ია ოკუპირებული. აქტიურად ხდება პუტინის პოლიტიკის გადმოღება.
“საქართველოს უსაფრთხოების ძალები დარტყმას ახორციელებენ მოქალაქეებზე და ქართული ოცნება ასევე ამყარებს ჩინეთის კომუნისტურ პარტიასთან თავის ურთიერთობებს, ძირითადი ინფრასტრუქტურის ობიექტების გადაცემა ხდება ჩინური კომპანიებისთვის. შეერთებულმა შტატებმა არ უნდა მისცეს საშუალება, რომ მოხდეს შეტევა საქართველოს დემოკრატიაზე, მის ევროატლანტიკურ მომავალზე, რომ ამას პასუხი არ გაეცეს.” – აღნიშნა უილსონმა.
მისივე თქმით, MEGOBARI Act-ის კანონპროექტი ხაზს უსვამს უფრო ძლიერ, სიღრმისეულ ურთიერთობებს, რომლებიც საჭიროა დამყარდეს აშშ-საქართველოს შორის. აქ იგულისხმება დახმარების პაკეტებიც, თუ საქართველოს ხელისუფლება დაუბრუნდება ხალხის ევროატლანტიკურ არჩევანს.
კონგრესმენი მარკ ვისის თქმით, აშშ-ის კონგრესში ინიციირებული MEGOBARI Act ხაზს უსვამს, რომ კონგრესი იმოქმედებს საქართველოს დემოკრატიის დასაცავად.
“შეერთებულმა შტატებმა და ქართველმა ხალხმა ბოლო სამი დეკადის განმავლობაში ძლიერი მეგობრობა ააშენეს. ჩვენ ერთად ვგლოვობდით, ერთად ვზეიმობდით მიღწევებს და გვერდიგვერდ ვიბრძოდით.
MEGOBARI Act ხაზს უსვამს, რომ კონგრესი იმოქმედებს საქართველოს დემოკრატიის დასაცავად, რათა ხაზი გაუსვას უკეთეს გზას წინსვლისთვის.” – აცხადებს კონგრესმენი.
კონგრესმენმა სტივ კოენმა აშშ-ის კონგრესში თქვა, რომ საქართველომ “სამხრეთ ოსეთის” და აფხაზეთის მაგალითზე უნდა ისწავლოს, რომ რუსეთი მტერია:
არ გახლავთ დასავლური ღირებულებები, როდესაც ცდილობთ დათრგუნოთ საკუთარი არასამთავრობო ორგანიზაციები. საქართველოს სურს ევროკავშირის წევრობა, NATO-ში წევრობაზეც აქვს პრეტენზია, მაგრამ ახლა უახლოვდებიან რუსეთს. საქართველომ “სამხრეთ ოსეთისა” და აფხაზეთის მაგალითზე უნდა ისწავლოს, რომ რუსეთი არის მტერი.
“საქართველოში 2012 წელს მოვხვდი – ეს იყო დრო, როცა ქართული ოცნება მოვიდა ძალაუფლებაში; დრო, როცა ბატონმა ივანიშვილმა შექმნა რეფორმატორის შთაბეჭდილება – ეს იყო ოცნება, კარგი ოცნება.
მაშინ ბატონი სააკაშვილი საკმაოდ დრაკონულ ციხის სისტემას მართავდა – ის ციხის სისტემას იყენებდა ხალხის დასასჯელად, რამაც დიდი წინააღმდეგობა და თავისუფლების ნაკლებობა გამოიწვია.
ბატონი ივანიშვილი უკვე თორმეტი წელია რაც ძალაუფლების სათავეშია – მიუხედავად იმისა, რომ ის არც პრემიერმინისტრია და არც პრეზიდენტი, ის არის მთავარი კაცი, მას მიჰყავს შოუ.
არ მიყვარს ხალხის განსჯა, მაგრამ როცა ივანიშვილი პირველად ვნახე, მივხვდი, ის “ოცნება” არ იყო – ის ჰგავდა ბევრ კორპორაციულ, საქმიან ადამიანს, რომელთაც სურთ მართავდნენ ყველაფერს – ავტოკრატის ტიპს, რომლებიც მთავრობებს უყურებენ, როგორც გზას, გააფართოონ თავიანთი სურვილები და ინტერესები. – განაცხადა კოენმა.
რა არის MEGOBARI Act
ანტიდემოკრატიულ კურსზე უარის თქმის შემთხვევაში, აშშ საქართველოსთვის მნიშვნელოვანი სამხედრო, სავაჭრო პაკეტის გადაცემასა და სავიზო რეჟიმის ლიბერალიზაციას განიხილავს. ამის შესახებ ნათქვამია ამერიკელი კონგრესმენის, ჯო უილსონის მიერ შემუშავებულ კანონპროექტში.
კანონპროექტის სახელია MEGOBARI (Mobilizing and Enhancing Georgia’s Options for Building Accountability, Resilience, and Independence Act – საქართველოში ანგარიშვალდებულების, სიმტკიცისა და დამოუკიდებლობის აშენების მიზნით შესაძლებლობების მობილიზაციისა და გაფართოების აქტი).
● კანონპროექტის თანახმად ვაშინგტონს შეუძლია ხელი მოაწეროს საქართველოს ეკონომიკური და უსაფრთხოების მხარდაჭერის ყოვლისმომცველ პაკეტს, თუ მისი ხელისუფლება მიატოვებს მზარდ ანტიდასავლურ რიტორიკას და ადამიანის უფლებათა კუთხით უკან აღარ დაიხევს.
● აშშ დაიწყებს მოლაპარაკებებს საქართველოსთან “სანდო შეღავათიანი სავაჭრო რეჟიმის“ გასახსნელად, თუ საკვანძო პოლიტიკური კრიტერიუმები დაცული იქნება.
● სავაჭრო რეჟიმის გაუმჯობესების გარდა, კანონპროექტი საქართველოს მოქალაქეებისთვის სავიზო რეჟიმის ლიბერალიზაციას განიხილავს.
● კანონპროექტი ასევე ავალდებულებს ოფიციალურ პირებს შეიმუშაონ საქართველოსთვის სამხედრო მხარდაჭერის პაკეტი, რომელიც მოიცავს “უსაფრთხოებისა და თავდაცვითი აღჭურვილობის უზრუნველყოფას, რომელიც იდეალურად შეეფერება რუსეთის აგრესიისგან ტერიტორიული თავდაცვისთვის და თანმხლები წვრთნების, ტექნიკური უზრუნველყოფისა და ოპერაციების მხარდაჭერის ელემენტებს.”
