ამერიკელმა კონგრესმენებმა ბლინკენს წერილი მისწერეს, სადაც ივანიშვილისთვის ფინანსური სანქციების დაწესებას ითხოვენ
კონგრესმენები ივანიშვილის დასანქცირებას ითხოვენ
აშშ-ის კონგრესში არსებული „ჰელსინკის კომისიის“ სახელით ცნობილი ევროპის უსაფრთხოებისა და თანამშრომლობის კომისიის წევრები აშშ-ის სახელმწიფო მდივნის, ენტონი ბლინკენის სახელზე წერილს აქვეყნებენ, რომელშიც ბიძინა ივანიშვილისა და მისი გარემოცვის წინააღმდეგ ინდივიდუალური ფინანსური სანქციების დაწესებას ითხოვენ.
წერილში აღნიშნულია, რომ ბიძინა ივანიშვილი, საქართველოს ყოფილ პრემიერი და პარტია “ქართული ოცნების” საპატიო თავმჯდომარე, “კრიტიკის განსაკუთრებული ობიექტი საქართველოს ევროპული გზიდან გადახვევისა და ქვეყნის მზარდად ავტორიტარული მართვის გამო გახდა”.
26 ივლისით დათარიღებულ წერილს სოციალურ ქსელში Foreign Press USA-ს კორესპონდენტი ალექს რაუფოღლუ ავრცელებს.
წერილის ხელმომწერები არიან როგორც დემოკრატი, ისე რესპუბლიკელი კონგრესმენები – ჯო უილსონი, სტოვ კოენი, რიჩარდ ჰადსონი და მარკ ვისი.
კონგრესმენები ბლინკენს მუწოდებენ, “უფრო სწრაფი და გადამწყვეტი მოქმედებისკენ” საქართველოსთან დაკავშირებით. კერძოდ კი, ითხოვენ დაწესდეს ფინანსური სანქციები არა მარტო ბიძინა ივანიშვილის, არამედ მისი გარემოცვის მიმართაც.
დოკუმენტში აღნიშულია, რომ საქართველოში შექმნილი პოლიტიკური მდგომარეობიდან გამომდინარე მხოლოდ სავიზო შეზღუდვები საკმარისი არ არის და აუცილებელია ფინანსურად დასანქცირდნენ “საქართველოში კორუფციისა და მავნე გავლენის ძირითადი კვანძები” – ბიძინა ივანიშვილი და მისი ახლო გარემოცვა, რადგანაც ეს ადამიანები არ უნდა ზღუდავდნენ ქართველი ხალხის ნებასა და თავისუფლებას.
წერილში “ქართული ოცნება” მოხსენიებულია როგორც “მზარდი ავტორიტარული და ანტიდემოკრატიული ხელისუფლება”, რომლისგანაც სასწრაფოდაა დასაცავი ქართველი ხალხი.
„ადგილზე მოვლენების ტემპი და სიმძიმე გვაფიქრებინებს, რომ სასწრაფოდაა საჭირო მეტის გაკეთება საქართველოს მოსახლეობის დასაცავად. მიგვაჩნია, რომ დროა, დავიწყოთ ინდივიდუალური ფინანსური სანქციების დაწესების პროცესი კორუფციისა და ბოროტი გავლენის ძირითადი წყაროების მიმართ საქართველოში, კონკრეტულად ბიძინა ივანიშვილისა და მისი ახლო გარემოცვის მიმართ. ცხადი უნდა გახდეს, რომ კორუფციისა და ბოროტი გავლენის მთავარი აგენტები საქართველოში, ანტიდასავლურ ელემენტებთან ერთად, ვერ ინადირებენ თავისუფლად ქართველ ხალხზე და ვერ მიაყენებენ ზიანს მის დემოკრატიას“.
გარდა ამისა, წერილში ასევე საუბარია რამდენიმე ქვეყანაში, მათ შორის, საქართველოში არსებულ ქოლცენტრებზე, რომლებიც, განცხადების მიხედვით, შავი ფულის მთავარი წყარო და ქვეყანაში სამოქალაქო საზოგადოების წევრების, აქტივისტებისა, ოპოზიციისა და მათი ოჯახის წევრების შევიწროებასა და დაშინებას ემსახურება.
კონგრესმენების წერილში წერია, რომ თაღლითური ქოლცენტრების ქსელი ზურგს უმაგრებს საქართველოს მმართველ პარტიას, “ქართულ ოცნებას” და “როგორც ჩანს, ეს ქოლცენტრები საქართველოში წარმოადგენს რგოლს კორუმპირებულ აქტორებს შორის, ასევე რუსეთში სხვა კლეპტოკრატ კოლეგებთან”.
კონგრესმენები გამოთქვამენ ვარაუდს, რომ სწორედ “ეს ქოლცენტრები იყო მობილიზებული სხვადასხვა მიზნით სამოქალაქო საზოგადოების, აქტივისტებისა და ოპოზიციონერი პოლიტიკოსების, მათი ოჯახის წევრების შევიწროებისა და დაშინებისთვის”.
„გვჯერა, რომ სახელმწიფო დეპარტამენტმა, შეერთებული შტატებისა და მეგობარი ქვეყნების სამართალდამცველი ორგანოების თანამშრომლობით, გარდაუვალად, სწრაფად, დაუყოვნებლივ უნდა მიიღოს სისტემური ზომები მსგავსი ქოლცენტრების ქსელის წინააღმდეგ, საერთაშორისო მასშტაბით მათი ქმედებების აღმოსაფხვრელად“.
წერილში აღნიშნულია, რომ მათ მიერ მოთხოვნილი სანქციები სრულ შესაბამისობაშია კანონპროექტთან, რომლის სახელწოდებაცაა „MEGOBARI Act-ი“.
“ეს კანონმდებლობა ხელს შეუწყობს საქართველოში დემოკრატიული პრაქტიკის, ადამიანის უფლებების და კანონის უზენაესობის გაძლიერებას და კიდევ ერთხელ დაადასტურებს შეერთებული შტატების ერთგულებას, მხარი დაუჭიროს საქართველოს ევროატლანტიკურ ინტეგრაციას და დაუპირისპირდეს ავტორიტარული რეჟიმების, განსაკუთრებით რუსეთის გავლენებს“, – ნათქვამია წერილში.
MEGOBARI აქტის ამოქმედების პერსპექტივა
აშშ-ის კონგრესის საგარეო ურთიერთობათა კომიტეტმა რესპუბლიკელი ჯო ვილსონის ინიციატივას, MEGOBARI აქტს, 11 ივლისს დაუჭირა მხარი. მისი მიღების საჭიროება მას შემდეგ დადგა, რაც საქართველომ ე.წ. “უცხოური აგენტების კანონი” მიიღო, რომელიც რუსული კანონმდებლობის ანალოგია და როგორც საქართველოს დასავლელი პარტნიორები აღნიშნავენ, აფერხებს საქართველოს ევროინტეგრაციას და დემოკრატიულ წინსვლას.
“MEGOBARI AQTI“-ს ინიციატორი აშშ-ის საკანონმდებლო ორგანოს ქვედა პალატის წევრი – რესპუბლიკელი კონგრესმენი ჯო უილსონია.
აქტის თანახმად, ერთი მხრივ, პასუხი უნდა აგონ იმ პირებმა, რომლებიც საქართველოში “რუსული სტილის უცხო ქვეყნის აგენტების კანონის მიღებაზე ან შესაძლო ამოქმედებაზე არიან პასუხისმგებელნი“, მეორე მხრივ კი, ის „საქართველოს მიერ დემოკრატიული, დასავლური კურსის გამყარების შემთხვევაში“ ქვეყანას გაძლიერებულ მხარდაჭერას ჰპირდება.
-
MEGOBARI აქტის ძირითადი დებულებები:
დემოკრატიისა და კანონის უზენაესობის მხარდაჭერა – აქტი განსაზღვრავს აშშ-ის პოლიტიკას საქართველოში დემოკრატიული ღირებულებების, ადამიანის უფლებებისა და კანონის უზენაესობის დასაცავად. იგი აღიარებს საქართველოს სამოქალაქო საზოგადოების მნიშვნელოვან პროგრესს და ხაზს უსვამს დემოკრატიის გაძლიერების მნიშვნელობას რეგიონული სტაბილურობისათვის.
მიმართვა დემოკრატიულ უკუსვლას – საქართველოში ბოლოდროინდელი დემოკრატიული უკუსვლის საპასუხოდ, აქტი მოითხოვს საქართველოს მთავრობის ქმედებების, რუსეთსა და სხვა ავტორიტარულ რეჟიმებთან მისი კავშირების გაძლიერებულ შესწავლას.
ანგარიშგება და სანქციები – არასათანადო გავლენა და სანქციების თავიდან აცილება: ანგარიშები საქართველოში კორუფციული პრაქტიკის შესახებ, რომელიც მხარს უჭერს რუსეთის ინტერესებს და სანქციების თავიდან აცილებას.
რუსეთის სადაზვერვო აქტივები – საქართველოში რუსული დაზვერვის შეღწევისა და ჩინეთის პოტენციური თანამშრომლობის შეფასება.
სანქციები ქართველ პირებზე – იდენტიფიკაცია, სანქციებისა და მოგზაურობის აკრძალვის დაწესება იმ პირებისთვის, რომლებიც ძირს უთხრიან დემოკრატიას საქართველოში.
დემოკრატიის მონიტორინგის სამუშაო ჯგუფის შექმნა – სამუშაო ჯგუფი შექმნილი იქნება საქართველოში დემოკრატიული გარემოს მონიტორინგისა და ხელშეწყობისთვის, განსაკუთრებით საარჩევნო პერიოდში, რათა უზრუნველყოს სამართლიანი და თავისუფალი საარჩევნო პროცესები.
ორმხრივი ურთიერთობების გაღრმავება და მხარდაჭერა – საქართველოში მნიშვნელოვანი დემოკრატიული პროგრესის დადასტურების შემდეგ, აქტი ასახავს აშშ-ის შემდგომ დახმარებას:
- მოლაპარაკებები საქართველოსთან უფრო შეღავათიანი სავაჭრო ხელშეკრულების დადებაზე;
- გაცვლის გაფართოება და სავიზო რეჟიმის გამარტივება;
- ეკონომიკური პაკეტის შემუშავება;
- უსაფრთხოებისა და თავდაცვითი მხარდაჭერის უზრუნველყოფა რუსეთის აგრესიის დასაძლევად.
31 ივლისს მედიასთან საუბარში საქართველოს პრემიერ-მინისტრმა ირაკლი კობახიძემ განაცხადა, რომ „მეგობარი აქტი“ შეიცავს შანტაჟს, შანტაჟი კი კონტრპროდუქტიულია.
“შანტაჟის ენით საუბარი არ არის სწორი, მით უმეტეს იმ ხელისუფლების მიმართ, რომელმაც ფუნდამენტურად შეცვალა ის ვითარება, რომელიც დაამკვიდრა ამ ქვეყანაში უცხოეთიდან მხარდაჭერილმა ხელისუფლებამ”. [უცხოეთიდან მხარდაჭერილ ხელისუფლებას “ქართული ოცნება” სააკაშვილის ხელისუფლებას ეძახის_JAMnews]
კობახიძის თქმით, კონგრესმენების მიღებულ აქტს არა „მეგობარი აქტი“, არამედ “დაუძინებელი მეგობარი აქტი” უნდა ერქვას.
რაც შეეხება სანქციებს, კობახიძის თქმით, “სწორედ ასეთი ტონით საუბარი არის კონტრპროდუქტიული, რაც ვერავითარ შემთხვევაში ვერ ჩაითვლება შემხვედრ ნაბიჯად. ნაცვლად შანტაჟისა, მუქარისა, ჩვენ უნდა გვქონდეს ჯანსაღი საუბარი ურთიერთობების გაჯანსაღებასთან, გადატვირთვასთან დაკავშირებით“. შეკითხვაზე, აქვს თუ არა სანქციების მოლოდინი, კობახიძემ თქვა, რომ “ეს თემა არ არის საინტერესო”.
