"მიმდინარე წელი იქნება ძალიან სერიოზული ტესტი ქართული დემოკრატიისთვის" - პრემიერის პირველი ვიზიტი ბრიუსელში

კობახიძის პირველი ვიზიტი ბრიუსელში

საქართველოს პრემიერმინისტრი ირაკლი კობახიძე პირველი ვიზიტით ბრიუსელს ეწვია. ევროკომისიის ვიცე-პრეზიდენტმა ჯოზეფ ბორელმა ასოცირების საბჭოს მე-8 სხდომის შემდეგ, ირაკლი კობახიძესთან და ევროპული სამეზობლო პოლიტიკისა და გაფართოების საკითხებში ევროკომისართან − ოლივერ ვარჰეისთან ერთად გამართულ პრესკონფერენციაზე განაცხადა, რომ მიმდინარე წელი იქნება “ძალიან სერიოზული” ტესტი ქართული დემოკრატიისთვის.

“ეს საუბარი, რაც ჩვენ გვქონდა ასოცირების საბჭოს ფარგლებში, ხაზს უსვამს იმას, რომ ერთობლივად გვაქვს ნაკისრი ვალდებულება იმ უცვლელი გზის მიმართ, რომელიც გულისხმობს საქართველოს ევროკავშირში ინტეგრაციას, თუმცაღა საქმე იწყება ახლა, თქვენს შემთხვევაში და ეს საჭიროებს ახალ ძალისხმევას, გაძლიერებულ პასუხისმგებლობას მთავრობის მხრიდან, პოზიციას, რომელიც ყველას მხრიდან იქნება გასათვალისწინებელი. ყველა პირი, ყველა ქართველი, ყველა სექტორი უნდა იყოს ჩართული ამ პროცესში“, – აღნიშნა ჯოზეფ ბორელმა.

ჯოზეფ ბორელის თქმით, მათ ჰყავთ წარმომადგენელი რეგიონიდან, მათ ევროკავშირის მონიტორინგის მისია გააჩნიათ და ეს გახლავთ ყველაზე ხანგრძლივი მისია რეგიონში მათი მხრიდან. ბორელმა ხაზი გაუსვა, რომ ისინი მნიშვნელოვან სამუშაოებს ახორციელებენ ყოველდღიურად საქართველოს მოსახლეობისთვის.

ოლივიე ვაჰრეის განმარტებით, თუ საქართველო მზად იქნება 2030 წლისთვის, რომ შეასრულოს ყველა პირობა – ევროკავშირი, ასევე, უნდა იყოს მზად, რომ მიიღოს საქართველო მის რიგებში ამ პერიოდისთვის, რადგან “ეს ორმხრივი” გზაა.

“შევთანხმდით, მივიღოთ პროგრესი ევროკავშირის გზაზე – სამუშაო ჯერ კიდევ ბევრია. ჩვენ ვეკითხებით და ვთხოვთ ჩვენს ქართველ მეგობრებს, რომ დააჩქარონ სამუშაო – ეს იქნება სასამართლო რეფორმა, სხვა ნაწილები რეფორმის დღის წესრიგისა, რომელიც განვსაზღვრეთ ერთად 9 პუნქტში, რომ გადავიდეთ შემდგომ ეტაპზე, რადგან ეს არის ამ სამუშაოს მიზანი, რომ საქართველო ევროკავშირში მოხვდეს. ჩვენ აქ არ გავჩერდებით, ბევრი სამუშაოა ჯერ კიდევ განსახორციელებელი და კანდიდატის სტატუსის მიღების შემდეგ, უფრო მეტია სამუშაო.” – აღნიშნა ვაჰრეიმ.

● საქართველოს პარლამენტმა მთავრობა დაამტკიცა – ირაკლი კობახიძე ქვეყნის ახალი პრემიერმინისტრია
● ირაკლი კობახიძის სამთავრობო პროგრამა. ევროინტეგრაცია, დეოკუპაცია, დასაქმება და სხვა პრიორიტეტები
● “ივანიშვილმა თამაშიდან გაიყვანა ღარიბაშვილი, მაგრამ პოლიტიკურ სიტუაციას არ მოწყვიტა” – რას ფიქრობენ ექსპერტები პრემიერის გადადგომაზე

რა თქვა ირაკლი კობახიძემ

საქართველო-ევროკავშირის ასოცირების საბჭო მნიშვნელოვანია საქართველო-ევროკავშირის ურთიერთობისთვის, რომელიც კიდევ ერთხელ უსვამს ხაზს ჩვენს ისტორიულ მიღწევას, საქართველოს მიერ ევროკავშირის წევრობის კანდიდატის სტატუსის მიღებას – ამის შესახებ საქართველოს პრემიერმინისტრმა განაცხადა. მისივე განმარტებით,  2030 წელს საქართველო ევროკავშირის წევრობისთვის უფრო მზად იქნება, ვიდრე ნებისმიერი სხვა კანდიდატი ქვეყანა. როგორც კობახიძემ აღნიშნა, ეს საქართველოს ამბიციური გეგმაა.

ასევე, კობახიძის თქმით, საქართველოს უკრაინასთან დაკავშირებით ძალიან მყარი პოზიცია აქვს და პოლიტიკურად მყარად უჭერს მხარს:

“სამწუხაროდ, მეორე ფრონტთან დაკავშირებით რამდენიმე განცხადება იყო, რომლებიც უკრაინის მთავრობამ და ოფიციალურმა პირებმა გააკეთეს. ესენი უკრაინის უშიშროების საბჭოს თავმჯდომარე და პრეზიდენტის მრჩევლები იყვნენ, რაც საკმაოდ სამწუხაროა.

მაგრამ უნდა ვთქვა, რომ უკრაინასთან დაკავშირებით ძალიან მყარი პოზიცია გვაქვს – პოლიტიკურად მყარად ვუჭერთ მხარს უკრაინას. ჰუმანიტარულ დახმარებას ვაწვდიდით. უკრაინელ ხალხთან ძალიან განსაკუთრებული მეგობრული ურთიერთობა გვაქვს. ეს ქართველი ხალხის გრძნობაა უკრაინელი ხალხისადმი და როდესაც საქმე უკრაინის დახმარება იქნება, მაგის ნაწილი ვიქნებით.

სანქციებთან დაკავშირებით ჩვენს პოლიტიკასთან დაკავშირებით ძალიან ნათელი პოზიცია გვაქვს. სანქციებს არ ვიღებთ და ამაზე ძლიერი არგუმენტები გვაქვს. ამავდროულად, საქართველო სანქციებისთვის გვერდის ასავლელად არ გამოიყენება. ასე რომ, ეს ძალიან ძლიერი პოლიტიკაა, რომელსაც მივყვებით და გავაგრძელებთ ამ გზას.

ასე რომ, კიდევ ერთხელ, ჩვენი პოზიციები ძალიან მყარია და უკრაინის მიმართ ჩვენი პოლიტიკური მხარდაჭერა ძალიან ძლიერია იმ განსაკუთრებული მეგობრობის გამო, რომელიც ქართველ და უკრაინელ ხალხს შორის არსებობს.” – განაცხადა კობახიძემ.