ირაკლი კობახიძე: ერთი ნაპირიდან მეორეზე გადასვლა პრაქტიკულად წარმოუდგენელი იყო - დეტალები გასარკვევია

კობახიძე შოვის ტრაგედიაზე

“ქართული ოცნების” თავმჯდომარე, ირაკლი კობახიძე შოვში, სტიქიის დროს გადარჩენილი ერთ-ერთი მოქალაქის, დავით ჯელაძის მიერ მიერ სოციალურ ქსელში გავრცელებულ პოსტს გამოეხმაურა და თქვა, რომ ფოტოს დეტალები გასარკვევი და გადასამოწმებელია, რადგან, მისი განცხადებით, იმ ადგილზე ერთი ნაპირიდან მეორეზე გადასვლა პრაქტიკულად შეუძლებელი იყო.

სტიქიის პირველ წუთებში გავრცელდა ფოტო, რომელზეც ბავშვი ღვარცოფს ებრძვის. შოვში გადარჩენილები ამბობდნენ, რომ ისინი ადგილობრივი მოქალაქეების დახმარებით ბავშვის გადარჩენას თითქმის 3 საათის განმავლობაში ცდილობდნენ.

მოგვიანებით კი შოვში, სტიქიის დროს გადარჩენილმა ერთ-ერთმა მოქალაქემ, დავით ჯელაძემ სოციალურ ქსელში მისი დისშვილის, ანასტასიას ფოტო გაავრცელა და დაწერა, რომ ბავშვი სტიქიას 4 საათის განმავლობაში მარტო ებრძოდა. მისივე თქმით, მან და მისმა დისშვილმა, მაშომ გზა ერთი ნაპირიდან მეორემდე ერთად გაიარეს.

“ერთი ნაპირიდან მეორეზე გადასვლა რატომ იყო საჭირო, ეს არ ვიცი, იმიტომ, რომ უფრო უსაფრთხო იმ ნაპირზე დარჩენა იყო. ჩვენ იმავე ტერიტორიაზე მეორე დღეს ვიყავით და იქ გადასვლა პრაქტიკულად წარმოუდგენელი იყო. ამიტომ, ეს ყველაფერი გადასამოწმებელია. კიდეებში ღვარცოფული მასის სიმაღლე დაბალი იყო და იქიდან გამოსვლა შესაძლებელი იყო. მაგრამ, დიდ მასაში მოყოლილი ადამიანების გამოსვლა შეუძლებელი იყო. ამ ფოტოს დეტალები გასარკვევია”. – ამბობს კობახიძე.

ასევე, კობახიძის თქმით, შოვში მომხდარ სტიქიასთან დაკავშირებით ვრცელდებოდა ინფორმაცია, რომ ერთ-ერთი ბავშვი ღვარცოფს 3 საათი ებრძოდა. მმართველი პარტიის თავმჯდომარე ამბობს, რომ ეს წარმოუდგენელი ტყუილია.

“იყო სპეკულაციები და არასწორი ინფორმაცია ვრცელდებოდა იმასთან დაკავშირებით, რომ მაგალითად, თითქოს, ერთ-ერთი ბავშვი 3 საათი ღვარცოფს ებრძოდა. ეს წარმოუდგენელი ტყუილია. უბრალოდ შეუძლებელია, რომ იქ პროცესები ასე განვითარებულიყო. სტიქია მყისიერი იყო და სამწუხაროდ, იმ ადამიანებს, ვისაც ღვარცოფული მასა მისწვდა, გადარჩენის შანსი არ ჰქონდათ. იმაზე საუბარი, რომ ვიღაც 3 საათი ებრძოდა სტიქიას, უბრალოდ ცარიელი ტყუილია”. – თქვა ირაკლი კობახიძემ.

დავით ჯელაძე მის მიმართ “ქართული ოცნების” თავმჯდომარის, ირაკლი კობახიძის მიერ გაკეთებულ განცხადებებს გამოეხმაურა. ჯელაძის თქმით, მისთვის ასეთი შეურაცხყოფა არასდროს არავის მიუყენებია.

“თავს ძალიან შეურაცხყოფილად ვგრძნობ. ყოველდღე იმის იმედად ვიღვიძებდი, რომ თუ არ დამირეკავდა, ვიღაც გამამხნევებელ შეტყობინებას მაინც მომწერდა, ეს როგორ შეძელიო. კობახიძის დღევანდელმა განცხადებამ შოკში ჩამაგდო, საერთოდ გამანადგურა. თურმე, ყველაფერი, რაც მოვყევი და თავს გადამხდა, ტყუილი იყო და ყველას ყველაფერი მოვატყუე. ძალიან განერვიულებული და აღელვებული ვარ. ასეთი შეურაცხყოფილი არასოდეს ვყოფილვარ.

ირაკლი კობახიძე სიტყვით გამოდის და ტყუილს ამბობო – რა უნდა გავაკეთო, არ ვიცი […] ასეთ განცხადებას არ ველოდი. გადარჩენილებზე არანაირი განცხადება რომ არ გაეკეთებინა და საერთოდ არაფერი ეთქვა, ალბათ, ყველაფერს შევეშვებოდი. მაგრამ, ასეთი შეურაცხყოფა ჩემთვის არასოდეს არავის მოუყენებია. ირაკლი კობახიძემ კი მომაყენა და გადარჩენილი ადამიანები გაგვანადგურა. ვერ ვხვდები, მას ჩემი დადანაშაულება რაში აწყობს. ალბათ, არ უნდა, რომ ის საშინელება გასაჯაროვდეს, რაც შოვში ხდებოდა. არ ვიცი”. – თქვა დავით ჯელაძემ ტელეკომპანია “ფორმულასთან” ჩართვის დროს.

● შოვის ტრაგედია: რა მოხდა და შეიძლებოდა თუ არა მსხვერპლის თავიდან აცილება
● სტიქიის პროგნოზი შეუძლებელი იყო – გარემოს დაცვის სამინისტრო
● „მოხალისეობრივი ჩართულობის აუცილებლობა არ იყო“, – შალვა პაპუაშვილი შოვის სტიქიაზე

3 აგვისტოს, კურორტ შოვში, მათ შორის სასტუმრო სანსეტ შოვთან მეწყერი ჩამოწვა. ადიდებულმა მდინარემ წაიღო სამანქანო ხიდი. მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი. სამაშველო ღონისძიებები ამ დრომდე გრძელდება. ოფიციალური ინფორმაციით, სტიქიას 24 ადამიანის სიცოცხლე ემსხვერპლა.

გარემოს ეროვნული სააგენტოს დასკვნის მიხედვით, ტრაგედიის მიზეზი გახდა რამდენიმე სტიქიური გეოლოგიური და ჰიდრომეტეოროლოგიური მოვლენების თანხვედრა, რამაც მდინარე ბუბუსწყლის ხეობაში ექსტრემალური ხასიათის ღვარცოფული ნაკადის ფორმირება გამოიწვია.

როგორც დასკვნაში წერია, მართალია, მეწყრული პროცესების ფორმირება მრავალი ფაქტორის თანხვედრამ გამოიწვია, თუმცა უშუალოდ ტრაგედიის დღეს მომხდარი სტიქია მყისიერად განვითარდა. დასკვნის თანახმად, არ დასტურდება გავრცელებული მოსაზრება, თითქოს სტიქიის განვითარებამდე ცოტა ხნით ადრე მდინარე ბუბას ხეობაში წყალი დაგუბდა.

ანგარიშში ნათქვამია, რომ მეწყრულ პროცესებს ხელი შეუწყო კლიმატურმა ცვლილებებმა – ბოლო პერიოდში მომატებულმა ჰაერის ტემპერატურამ გამოიწვია მყინვარების ინტენსიური დნობა და ჭარბი ატმოსფერული ნალექი.

გარემოს ეროვნული აცხადებს, რომ ამ ეტაპზე, საფრთხის შემცველი არ არის.

“აღსანიშნავია, რომ მდ. ბუბისწყლის კალაპოტში მიმდინარეობს სტიქიის თანმდევი პროცესები. მასშტაბური სტიქიების შემდეგ, ასეთი მოვლენები მოსალოდნელი ფაქტია. ამ ეტაპზე, აღნიშნული პროცესები საფრთხის შემცველი არ არის”, – აღნიშნავენ სააგენტოში.