"ხალხს აღარ სურს მოთმენა". რას აჩვენებს „ოჯახური პიკეტი“ სამხრეთ ოსეთში?
ვიქტორ მარგიევის ოჯახი
26 თებერვალს, სამხრეთ ოსეთის შინაგან საქმეთა სამინისტროს პოლკოვნიკის, ვიქტორ მარგიევის დედამ და მეუღლემ, ცხინვალში, პრეზიდენტის ადმინისტრაციის შენობის წინ, საპროტესტო აქცია გამართეს. მათ ამის გაკეთება მას შემდეგ მოუწიათ, რაც უცნობმა თავდამსხმელებმა ვიქტორის შვილი, რუსეთის შინაგან საქმეთა სამინისტროს უნივერსიტეტის სტუდენტი, იგორ მარგიევი სცემეს.
მარგიევების თქმით, ამ ყველაფრის უკან სამხრეთ ოსეთის პრეზიდენტის, ალან გაგლოევის გარემოცვა დგას, რომელიც უკვე ნახევარი წელია მათ ოჯახს ავიწროებს.
საეჭვო ციტატა
„შეაჩერე, ორგანიზებული დანაშაული!“ „გაგლოევ, შეწყვიტე უკანონობა!“ – ამ შინაარსის პლაკატებით მივიდა ორი ქალი პრეზიდენტის ადმინისტრაციის შენობასთან. თუმცა, პოლიციამ ისინი დააკავა. ვარაუდობენ, რომ ქალები ერთ-ერთ ძალოვანი უწყების შენობაში გადაიყვანეს, სადაც პოლიციამ მათი „დამშვიდება” სცადა.
მთელი დღის განმავლობაში ქალების ბედის შესახებ არაფერი იყო ცნობილი. საღამოს, სამთავრობო საინფორმაციო სააგენტო “Рес-მა” გამოაქვეყნა რეპორტაჟი, რომელშიც ნათქვამი იყო, რომ „რუსეთის ფედერაციაში უცხოელ აგენტებად აღიარებულმა მედიასაშუალებებმა სცადეს საოჯახო – ყოფითი დავები მთავრობის წინააღმდეგ გამოეყენებინათ“.
“Рес-ის” ვერსიით, პრეზიდენტი ალან გაგლოევი აქციის ერთ-ერთ მონაწილეს, ასმატ გიგოლაევას – ნაცემი იგორის დედას შეხვდა. სააგენტო ავრცელებს ციტატას, რომელიც გიგოლაევას მიეწერება:
„ალან ედუარდოვიჩმა თბილად მიმიღო და ყურადღებით მომისმინა. ჩვენი საუბრის შემდეგ სამართალდამცავი უწყებების წარმომადგენლები დამიკავშირდნენ და გამოხატეს სრული მზადყოფნა, კანონიერ ფარგლებში მიიღონ ზომები შესაძლო პროვოკაციებისგან ჩემი შვილის დასაცავად“, – თითქოს განაცხადა ქალმა.
თუმცა, მთავრობის კრიტიკოსები თვლიან, რომ გაგლოევი და მისი გარემოცვა ასეთ ზომებს სკანდალის ჩასახშობად და რეპუტაციის რისკების მინიმიზაციისთვის იყენებს. ეჭვს იწვევს, პირველ რიგში, ის ფაქტი, რომ „Рес-ის” მიერ გამოქვეყნებულ გიგოლაევას ციტატაში არაფერია ნათქვამი თავად ვიქტორ მარგიევის და მათი ოჯახის სხვა წევრების შესაძლო დევნაზე. მეორეც, ეს ინციდენტი აშკარად არ არის „ოჯახური დავა“, არამედ მესამე მხარის მიერ ჩადენილი სისხლის სამართლის დანაშაულია.
„პროტესტი გახშირდება“
ცხინვალის რამდენიმე მცხოვრების თქმით, რომელთაც JAMnews -ი ესაუბრა, ეს პროტესტი მოწმობს, რომ სამხრეთ ოსეთის მოქალაქეები საბოლოოდ დარწმუნდნენ ხელისუფლების არაკომპეტენტურობაში და საკუთარი უფლებების დაცვის აუცილებლობაში.
„ხელისუფლებას და თავად ალან გაგლოევს აღარ შეუძლიათ მოსახლეობის კონტროლი მუქარისა და დაშინების გზით. ვიქტორის დედამ და მეუღლემ გააკეთეს ის, რაც ვერ შეძლო თამარ მეარაყიშვილმა (ქართველი აქტივისტი, რომელიც ჯაშუშობის ბრალდებით დააკავეს და სამხრეთ ოსეთიდან გააძევეს – JAMnews): მათ მოასწრეს პიკეტირება, ვიდრე დააკავებდნენ და წაიყვანდნენ.
ვფიქრობ, რომ საპრეზიდენტო არჩევნების მოახლოებასთან ერთად, პროტესტი გახშირდება. და მაშინაც კი, თუ ის მასობრივი არ იქნება, ეს უკვე იმის ნიშანია, რომ ცხინვალი აღარ მოითმენს ალიკ გაგლოევისა და მისი მეგობრების თავნებობასა და დაუსჯელობას“.
ალიკ გაგლოევი და კომპანია
ალიკ გაგლოევი პრეზიდენტი ალან გაგლოევის ძმა და ერთგვარი „ლეგენდარული“ ფიგურაა სამხრეთ ოსეთში. მისი სახელი, პრაქტიკულად, ყველა გახმაურებულ კრიმინალურ ინციდენტში ფიგურირებს. ჩვენი წყაროების თქმით, მარგიევების ოჯახის პრობლემებიც მისი მეგობრების “დამსახურებით“ დაიწყო.
2025 წლის სექტემბრის დასაწყისში, ალიკ გაგლოევთან დაკავშირებული კრიმინალური დაჯგუფების წევრებმა ვიქტორის ძმა, ალან მარგიევი გაიტაცეს და წამებით მოითხოვეს მისი ძვირადღირებული ავტომობილის გადაცემა.
ალანმა გამტაცებლებისგან გაქცევა მოახერხა. მან ინციდენტის შესახებ შინაგან საქმეთა სამინისტროსა და გენერალურ პროკურატურას აცნობა. მას შემდეგ, რაც არცერთმა უწყებამ არ მიიღო ადეკვატური ზომები, ვიქტორ მარგიევმა ჩაწერა ვიდეომიმართვა, სადაც განმარტა, რომ ადრე თავადაც განიცადა ზეწოლა ხელისუფლების მხრიდან, რადგან პრეზიდენტი ალან გაგლოევი დაადანაშაულა ორგანიზებული დანაშაულის მფარველობაში.
ვიქტორმა განაცხადა, რომ მისი ძმა გაიტაცა ხოხა გაბარაევის ბანდამ, რომელიც სამხრეთ ოსეთში ცნობილი კრიმინალური ავტორიტეტი და ალიკ გაგლოევის ერთ-ერთი „თანამებრძოლია“.
ვიქტორ მარგიევის თქმით, ამ ბანდის მიერ ჩადენილი დანაშაულებები „თავად პრეზიდენტის მიერ არის წახალისებული, რომელმაც ეს ბანდა გამოზარდა” .
მარგიევის თქმით, ძმის გატაცებიდან მეორე დღეს მან სოციალური მედიის გამოყენებით მოუწოდა გაბარაევის ბანდის მიერ დაზარალებულ ადამიანებს, არ შეშინებულიყვნენ და სამართალდამცავ ორგანოებს დაკავშირებოდნენ.
„გამოქვეყნებიდან რამდენიმე საათში ჩემს სახლში სპეცრაზმი გამოჩნდა. საუბრის საბაბით მანქანაში ჩამსვეს. მაშინვე მივხვდი, რომ ჩემს გატაცებას ცდილობდნენ, მანქანიდან გადმოვხტი და ჩემი სახლის ეზოში შევვარდი“, – აცხადებს ვიქტორი.
მისივე თქმით, შემდეგ დაურეკა ოპოზიციური პარტია „ერთიანი ოსეთის“ ლიდერს, აცამაზ ბიბილოვს და დახმარება სთხოვა. ბიბილოვი მივიდა, სპეცრაზმელებს ესაუბრა და როგორღაც დაარწმუნა, ვიქტორისთვის თავი დაენებებინათ.
რუსეთის იმედი
ამ მოვლენებიდან მალევე, საკუთარი სიცოცხლის დაცვისა და უსაფრთხოების მიზნით, ვიქტორ მარგიევმა სამხრეთ ოსეთი დატოვა და პირობა დადო, რომ მიმართავდა „რუსეთის კომპეტენტურ ორგანოებს, რათა გამოაშკარავებულიყო მიმდინარე თვითნებობა“.
იგი მიიჩნევს, რომ ამ საჩივრის საფუძველი ის ფაქტია, რომ სამხრეთ ოსეთის მაცხოვრებლების უმრავლესობას რუსეთის მოქალაქეობა აქვს. ეს ნიშნავს, რომ ტექნიკურად, ყველა ეს დანაშაული რუსეთის მოქალაქეების წინააღმდეგ არის ჩადენილი და რუსეთის სამართალდამცავ ორგანოებს შეუძლიათ და უნდა ჩაერიონ.
თუმცა ნახევარი წელი გავიდა და სიტუაცია არ შეცვლილა. ვიქტორის წასვლის მიუხედავად, მისი ოჯახის წევრები, მათი თქმით, მუდმივად ექვემდებარებიან მუქარას შსს-სა და პრეზიდენტის ადმინისტრაციის მხრიდან.
რუსეთის ჩარევის საბოლოოდ უზრუნველყოფის იმედით, ვიქტორმა ღია წერილით მიმართა რუსეთის ფედერაციის პრეზიდენტის ადმინისტრაციის უფროსის პირველ მოადგილეს, სერგეი კირიენკოს, რომელიც კრემლში სამხრეთ ოსეთს კურირებს.
ვიქტორ მარგიევის ოჯახი
