კელი დეგნანი: არსებობენ ჯგუფები, რომლებიც ცდილობენ ჩვენს პარტნიორობას ძირი გამოუთხარონ

კელი დეგნანი საქართველოზე

ამერიკის შეერთებული შტატების ელჩმა საქართველოში კელი დეგნანმა „ინტერპრესნიუსისთვის“ მიცემულ ექსკლუზიურ ინტერვიუში განაცხადა, რომ საქართველოში არსებობენ ჯგუფები, რომლებიც ცდილობენ აშშ-სა და საქართველოს პარტნიორობას ძირი გამოუთხარონ, შექმნან დაბნეულობა და დაყოფა, მისი თქმით, “ეს კლასიკური კგბ/ფსბ-ს სტრატეგიაა”.

ამასთან, როგორც ელჩმა აღნიშნა, ოფიციალურ ვაშინგტონს არასდროს მოუხდენია ზეწოლა საქართველოს ხელისუფლებაზე, რომ რუსეთთან ორმხრივი სანქციები დაეწესებინა. მისი მტკიცებით, ერთადერთი დისკუსია, რომელიც ამ საკითხთან დაკავშირებით საქართველოს ხელისუფლებასთან ჰქონიათ, ეხებოდა იმას, უკრაინისთვის რა სახის დახმარების გაწევა იქნებოდა საქართველოსთვის კომფორტული. მისივე განმარტებით, აშშ-ს არ აქვს არანაირი მტკიცებულება, რომ საქართველო არ იცავს სანქციებს:

“არ მგონია, ვინმემ 100 %-იანი დარწმუნებით თქვას, მაგრამ საბაჟო სამსახურსა და სასაზღვრო პოლიციას აქვს სათანადო ცოდნა, აღჭურვილობა და იციან, რას აკეთებენ.”

ელჩი ხაზს უსვამს, რომ იმდენად რამდენადაც მნიშვნელოვანია განსხვავებებზე საუბარი და მსჯელობა, მნიშვნელოვანია პატივისცემა სიმართლისა და ფაქტებისადმიც.

“ვფიქრობ, რომ უმნიშვნელოვანესი საკითხი აქ არის ის, რომ ყველაფერი, რაც აქ გავაკეთეთ არის შენება ერთად. საქართველომ და ამერიკის შეერთებულმა შტატებმა ბოლო 30 წელი იმუშავა უფრო ძლიერი ეკონომიკის, ძლიერი უსაფრთხოების, ძლიერი სანაპირო დაცვისა და სასაზღვრო პოლიციის, ძლიერი დემოკრატიული ინსტიტუტების შექმნისა და შენებისთვის, რაც არის საფუძველი იმგვარი საზოგადოებისა და ქვეყნისა, როგორშიც საქართველოს მოსახლეობას სურს ცხოვრება. სწორედ ამაზეა მიმართული ჩვენი ძალისხმევა და უკან ვტოვებთ მათ, ვინც ცდილობს შექმნას დაბნეულობა, გახლეჩილობა და ვინც რეალურად მიჰყვება კრემლის დეზინფორმაციების სახელმძღვანელოს“, – განაცხადა კელი დეგნანმა.

● “საქართველოში დემოკრატიის უკუსვლა შემაშფოთებელია” – აშშ-ს სენატის საგარეო კომიტეტის სხდომა
● კელი დეგნანი: დამაბნეველია მთავრობის დამოკიდებულება მათ მიმართ, ვინც პარტნიორობას ძირს უთხრის
● ადამ კიზინგერი: რუსული პროპაგანდაა, როცა მესმის, რომ აშშ საქართველოს ომში ჩათრევას ცდილობს

მიმდინარე წლის 19 იანვარს CNN-ის ჟურნალისტმა ქრისტიან ამანპურმა ევროკომისიის პრეზიდენტ ურსულა ფონ დერ ლაიენს რუსეთის წინააღმდეგ დაწესებული სანქციების გვერდის ავლაზე ჰკითხა და ამის მაგალითად საქართველო დაასახელა.

ქრისტიან ამანპურმა ლაიენს ჰკითხა: “უკვე რამდენიმე პაკეტი დაამტკიცეთ რუსეთის წინააღმდეგ, მიუხედავად ამისა, გვესმის და ალბათ თქვენც შეიტყობდით, რომ ბევრი აკრძალული საქონელი მაინც შედის რუსეთში შემოვლითი გზებით, მათ შორის, როგორც ბოლო ინფორმაცია გვეუბნება, საქართველოს გავლით. როგორ უნდა მოვახერხოთ, რომ სანქციების ქვეშ მყოფმა რუსეთმა ვეღარ მიიღოს ის, რაც სჭირდება”.

ამის პასუხად ევროკომისიის პრეზიდენტმა თქვა, რომ რუსეთისთვის დაწესებული სანქციების გვერდის ავლის მცდელობები მიუღებელია.

“დიახ, ჩვენ უკვე დავაწესეთ სანქციების 9 პაკეტი და ეს სანქციები გავლენას ახდენს რუსეთის ეკონომიკაზე, თუმცა ვხედავთ, რომ არის გვერდის ავლის მცდელობებიც, ჩვენ ამას, რა თქმა უნდა, ვერ შევეგუებით. ჩვენ უნდა დავიწყოთ იმ ადამიანების სიის შედგენა, რომლებიც ყიდულობენ ევროკავშირში საქონელს და ჩააქვთ ის რუსეთში, თუმცა სანქციების მეათე პაკეტის მიზანი იქნება ამ ხვრელების დახურვა, შემოვლითი გზების დაკეტვა და იმ ადამიანების სანქცირებულთა სიაში შეყვანა, რომლებიც ხელს უწყობენ სანქციებისთვის გვერდის ავლას. მეათე პაკეტი სწორედ ამას შეეხება”, – განაცხადა ფონ დერ ლაიენმა.

15 იანვარს The New York Times–მა რუსეთში იმპორტირებული საქონლის შესახებ სტატია გამოაქვეყნა, რომლის ავტორი ივან ნეჩეპურენკოა. ავტორიტეტული ამერიკული გამოცემა წერს, რომ მას შემდეგ, რაც უკრაინაში რუსეთი შეიჭრა და ევროპამ ოკუპანტ ქვეყანასთან სანქციების გამო სავაჭრო კავშირები გაწყვიტა, რუსეთმა მალევე იპოვა ალტერნატიული გზები. ავტორი აღნიშნავს, რომ ყოველდღე საქართველოში რუსეთის საზღვართან სატვირთო მანქანების რიგები დგას.

როგორც ავტორი განმარტავს საქართველო რუსეთსა და გარე სამყაროს შორის მოსახერხებელ ლოგისტიკურ არხად იქცა. ამასთან, ჟურნალისტი საუბრობს, რომ საქონლის შეძენა საქართველოსა და მეზობელი ქვეყნების (სომხეთი და აზერბაიჯანი) გავლით, რუსეთს დაეხმარა, უკრაინაში შეჭრით გამოწვეული ეკონომიკური შტორმი გადაეტანა.