"კატასტროფაა", "ჩვენთვის უინტერესოა" - როგორ გამოეხმაურა ოპოზიცია და მმართველი პარტია აშშ-ის სენატის სხდომას
ოპოზიცია და მმართველი პარტია აშშ-ის სენატის სხდომაზე
აშშ-ის სენატის საგარეო ურთიერთობათა კომიტეტის სხდომაზე განაცხადეს, რომ შეერთებული შტატების მხრიდან საქართველოს დახმარების სისტემა, შესაძლოა, შეიცვალოს და ე.წ დამსახურებაზე დაფუძნებული გახდეს.
ასევე, კომიტეტის სხდომაზე ისაუბრა ევროპულ და ევრაზიულ საკითხებში სახელმწიფო მდივნის თანაშემწემ, კარენ დონფრიდმაც, რომელმაც განაცხადა, რომ “ის, რასაც ბოლო პერიოდში ვხედავთ, ჩვენთვის ძალზე შემაშფოთებელია, რადგან ვნახეთ დემოკრატიის უკუსვლა საქართველოში”. დონფრიდმა ასევე ისაუბრა საქართველოში დემოკრატიული პროგრესის ნაკლებობაზე და შეეხო საქართველოში აშშ-ს ელჩ კელი დეგნანზე თავდასხმებს.
როგორ გამოეხმაურა ხელისუფლება და ოპოზიცია სენატის განცხადებებს:
ირაკლი ზარქუა, დეპუტატი, “ქართული ოცნების” წევრი:
“სენატორი ჯინ შაჰინი ჩათლახია. გუშინწინ რა განცხადებაც გააკეთა ევროპის მაღალჩინოსანმა, ევროკომისარმა, ეს არ არის კუბილიუსი ან გარკვეული ჯგუფების პოლიტიკაში მოსული ფოტიგები ან გრიგოროვები. ეს არის ჩინოვნიკი, ევროკომისარი, რომელიც ევროპის გაფართოებას ხელმძღვანელობს, ეს იყო მნიშვნელოვანი დეტალი და შაჰინმა ასეთი არასწორი ინფორმაციებით, ასეთი არასწორი მიდგომებით, არასწორი ტაქტიკებით, ამიტომაც არის რომ დემოკრატებმა კონგრესში დაკარგეს უმრავლესობა, ასეთი მიდგომით. არასწორი, არასამართლიანით. ჩვენთვის მნიშვნელოვანია, ღირებულია ის რჩევა, რომელიც ეფუძნება სწორ არგუმენტებს. შაჰინი ამას რომ მეტყვის, რით განსხვავდება კუბილიუსისგან?”
სამი პარტია: გირჩი – მეტი თავისუფლება, სტრატეგია აღმაშენებელი და დროა:
“ქართული ოცნების მცდელობები, შეცდომაში შეიყვანოს დასავლეთი და საკუთარი თავი პროდასავლურ ძალად წარმოსახოს, დასავლეთის პოლიტიკურ წრეებში სულ უფრო ნაკლები ადამიანისთვის არის დამაჯერებელი. აშშ-ის სენატსა და სახელმწიფო დეპარტამენტში დარწმუნდნენ, რომ “ოცნება” არ აპირებს ევროკომისიის მიერ დადგენილი 12 პუნქტის შესრულებას, რაც, აშშ-ის აზრითაც, ჩვენი ქვეყნის ევროპული და ევროატლანტიკური ინტეგრაციის გზაა”
მამუკა მდინარაძე, დეპუტატი, “ქართული ოცნების” წევრი:
“თვეების განმავლობაში ქალბატონ შაჰინს სიტყვა არ დაუძრავს საქართველოზე და ეს მოხდა მხოლოდ და მხოლოდ მაშინ, როდესაც ევროკავშირის გაფართოების კომისარმა ძალიან პოზიტიური განცხადებები გააკეთა საქართველოსთან დაკავშირებით. ეს არის მხოლოდ და მხოლოდ ნეგატიურ დღის წესრიგზე გადაყვანის მცდელობა. ძალიან სამწუხაროა, რომ ამის თქმა მიწევს. მერე უკვე ის ილაპარაკებდა დაფინანსებაზე, რომლის დიდი ნაწილი NGO სექტორს შეეხება, არ აქვს ამას მნიშვნელობა.”
“ქართული ოცნების” თავმჯდომარე ირაკლი კობახიძე:
“დაფინანსების უდიდესი ნაწილი მოდის NGO-ებზე, ამიტომ ჩვენთვის ეს ნამდვილად არ არის საინტერესო პრაქტიკული თვალსაზრისით. რაც შეეხება უსამართლო კრიტიკას, ჩვენთვის უსამართლო კრიტიკას არ აქვს ფასი, ფასი შეიძლება ჰქონდეს მხოლოდ ისეთ კრიტიკას, რომელსაც აქვს კონკრეტული საფუძველი. NGO-ები დაფინანსდებიან თუ არა, ამაზე ინერვიულონ NGO-ებმა. ძირითადად, ეს არის NGO-ების დაფინანსება, უდიდესი ნაწილი არის მათი დაფინანსება”
“ევროპული საქართველოს” ლიდერი გიგა ბოკერია:
“იმის ნაცვლად, რომ ახლა ამერიკის სენატში, კონგრესში, შეერთებულ შტატებში, ვაშინგტონში, ბრიუსელში, ჩვენი მთავრობის ძალისხმევით განხილვის საგანი იყოს საქართველოს უსაფრთხოების სარტყელში მოხვედრა, NATO-ში გაწევრიანება, ეკონომიკაში თავისუფალი ვაჭრობა შეერთებულ შტატებთან, ანუ ჩვენი დაბრუნება თავისუფალ სამყაროში და დაცვა ჩვენი თავისუფლების, ამის ნაცვლად, ივანიშვილის რეჟიმის წყალობით, დისკუსიაა იმაზე, რომ საქართველო მიდის საპირისპირო მიმართულებით”
“ერთიანი ნაციონალური მოძრაობის” წევრი ლევან ხაბეიშვილი:
“სრული კატასტროფა, ქართველი ხალხი, საზოგადოება ხედავს, რომ ცივილიზებულ სამყაროს გვაშორებს რუსი ოლიგარქი და მისი კრიმინალური რეჟიმი. დაშორდნენ ამერიკას, ევროპას და უახლოვდებიან კი არადა, ჩაეხუტნენ ევტუშენკოვს, პუტინს და რუსეთს. ეს არის მოცემულობა და ყველამ კარგად იცის, ამ ქვეყანაში როგორ იქცევა ქართული ოცნების ხელისუფლება და როგორ გადაიქცა ქართული ოცნება რუსულ ოცნებად.”
● სენატორი ჯინ შაჰინი: საქართველოში უკუსვლაა – შესაძლოა გადავხედოთ სტრატეგიას დახმარებასთან დაკავშირებით
● “საქართველოში დემოკრატიის უკუსვლა შემაშფოთებელია” – აშშ-ს სენატის საგარეო კომიტეტის სხდომა
● გადაწყვეტილება მიღებულია: უკრაინას და მოლდოვას კანდიდატის სტატუსი მისცეს. საქართველოს – მხოლოდ პერსპექტივა
8 ნოემბერს ევროპარლამენტარებმა ბრიუსელში, საგარეო კომიტეტის სხდომაზე, საქართველოს ევროკავშირთან ასოცირების შეთანხმების დანერგვის ყოველწლიური ანგარიში განიხილეს. მიღებული კომპრომისული დოკუმენტის მიხედვით, ბიძინა ივანიშვილი აღარ არის ნახსენები როგორც ოლიგარქი, თუმცა დეოლიგარქიზაციის პუნქტის თავშივე მოცემულია მისი სახელი და გვარი და წერია, რომ აუცილებელია ივანიშვილის ჭარბ გავლენებთან დაკავშირებით მიღებული იყოს, მათ შორის, საკანონმდებლო გადაწყვეტილებები.
გარდა ამისა, დოკუმენტში საუბარია მედიის შევიწროებაზე, პოლიტიკურ დევნაზე, სახალხო დამცველის არჩევის წესზე და ასევე, ევროპარლამენტი მოუწოდებს საქართველოს ხელისუფლებას, “ჰუმანიტარული მიზნებით და პოლარიზაციის შესამცირებლად”, გადაიყვანოს მიხეილ სააკაშვილი საზღვარგარეთ სამკურნალოდ.
