კარანტინი აზერბაიჯანში: სუიციდი, პოლიციის მხრიდან სექსუალური შევიწროება და სხვა შედეგები
აზერბაიჯანში, კორონავირუსის პანდემიის გამო გამოცხადებული განმეორებითი მკაცრი საკარანტინო რეჟიმი უკვე თვეზე მეტია მოქმედებს და მისი 5 აგვისტომდე გაგრძელება, საზოგადოებაში დიდ სტრესს იწვევს. მხოლოდ ბოლო რამდენიმე დღის განმავლობაში, უკვე რამდენიმე სკანდალი მოხდა, მათ შორის, თვითმკვლელობის მცდელობა და პოლიციელების მხრიდან სექსუალური შევიწროების მცდელობა.
აზერბაიჯანში, 21 ივნისიდან, კარანტინის რეჟიმის მკვეთრი გამკაცრების შემდეგ, ისევ შემსუბუქებები დაიწყო: 20 ივლისიდან, ქუჩაში გამოსვლა უკვე შეიძლება დღე-ღამეში არა 2 საათით, არამედ – სამით. და კიდევ, მუშაობა განაახლეს სილამაზის სალონებმა.
მაგრამ მაღაზიები და ბიზნესები კვლავინდებურად დაკეტილია, ისევე, როგორც საზღვრები. ქვეყნის შიგნით რეგიონებს შორის გადაადგილება მხოლოდ განსაკუთრებული ნებართვით შეიძლება.
20 ივლისს, აზერბაიჯანში, კორონავირუსით ინფიცირების 369 ახალი შემთხვევა დაფიქსირდა, სულ, პანდემიის დაწყებიდან – 27 890 შემთხვევა. 363 პაციენტი გარდაიცვალა, 19 490 – გამოჯანმრთელდა.
კარანტინი ბაქოსა და ქვეყნის რამდენიმე სხვა რეგიონში 5 აგვისტომდე გახანგრძლივდა. საზღვრების გახსნა 31 ივლისს იგეგმებოდა და მაშინ გაიხსნებოდა ქვეყნის შიგნით რეგიონებს შორის მიმოსვლაც, მაგრამ ახლა ამ თარიღმა 31 აგვისტომდე გადაიწია.
ძალიან ცხელი ზაფხულია, მაგრამ დაკეტილია პლაჟები, საცურაო აუზები, აბანოები და სპორტული ცენტრები. ასევე, არ მუშაობს სავაჭრო ცენტრები, გამონაკლისია მხოლოდ მათში განთავსებული სურსათის მაღაზიები და აფთიაქები.
ამასობაში, საზოგადოებაში იზრდება გაღიზიანება და ხდება ინციდენტები.
• “ჩაკეტილი ქვეყანა” და ზარალი ეკონომიკისთვის
კარანტინის გამო სუიციდის შეუმდგარი მცდელობა
17 ივლისის ღამით, როდესაც ხელისუფლებამ მხოლოდ მინიშნება გააკეთა მკაცრი საკარანტინო რეჟიმის გახანგრძლივებაზე, აქტივისტმა ელმადინ შამილზადემ Facebook-ის საკუთარ გვერდზე დაწერა, რომ თვითმკვლელობას აპირებს, თუკი ეს მართლაც მოხდება:
„ეს ჩემი გამოსამშვიდობებელი წერილია. ყველაფერი უკან დარჩა. მოდით, ამავე პოსტის ქვეშ შევრიგდეთ და დავემშვიდობოთ ერთმანეთს“.
მომდევნო დღეს, მკაცრი საკარანტინო რეჟიმის 5 აგვისტომდე გაგრძელების შესახებ განაცხადეს და აქტივისტის სახლთან მაშინვე მივიდა პოლიცია, ის დააკავეს და განყოფილებაში წაიყვანეს.
ორსაათიანი გასაუბრების შემდეგ, შამილზადე გაათავისუფლეს. ახალ პოსტში, მან დაკავება დამოუკიდებელ ინტერნეტტელევიზია Toplum-თან თანამშრომლობას დაუკავშირა. სუიციდის შესახებ მას აღარ უსაუბრია.
პირადი მონაცემების მოპარვა და პოლიციის მხრიდან სექსუალური შევიწროება
ბაქოში, სახლიდან გასვლა მხოლოდ ხელისუფლების სპეციალური SMS- ნებართვით შეიძლება. შემდეგ, ნებისმიერ ადგილას შეიძლება ადამიანი პოლიციამ გააჩეროს იმის შესამოწმებლად, რომ ნებართვა ნამდვილად აქვს. კარანტინის რეჟიმისთვის დაწესებული ჯარიმა 200-დან 400 მანათამდეა (117-235$).
როგორც მედიასა და სოციალურ ქსელებში წერენ, ეს ყოვლისმომცველი შემოწმებები, პოლიციელების მხრიდან არცთუ ისე იშვიათად გამოიყენება გოგოების გასაცნობად.
სკანდალი აგორდა, როდესაც პოლიციის თანამშრომელმა აქტივისტი სევდა მაჰმუდოვა გააჩერა, პირადობის დამადასტურებელი საბუთი შეუმოწმა – შემდეგ კი, სახელითა და გვარით Facebook-ზე მისი გვერდი ნახა და პირადი შეტყობინებები გაუგზავნა.
სევდა მაჰმუდოვამ საჩივრით შინაგან საქმეთა სამინისტროს მიმართა.
Facebook-ზე, მის აღშფოთებულ პოსტს სხვებიც გამოეხმაურნენ, ათობით მსგავსი ისტორიით.
კიდევ ერთმა აქტივისტმა, მეჰრიბან აბდულამ დაწერა:
„ასეთი რამ ბევრ ქალს შეემთხვა. რამდენჯერ შეავიწროვეს პოლიციელებმა ქალები, რომლებმაც მათ ავტომობილებთან გაიარეს? მოდიან და გეუბნებიან: მე თქვენ მომწონხართ, შეიძლება, ნომერი გამოგართვათ?
ბევრ ქალს ეშინია ჩივილი, რადგან ისინი პოლიციელები არიან და ეს სარჩელი საბოლოოდ მათ წინააღმდეგ შემოტრიალდება. მაგრამ ყველა შემთხვევაზე უნდა იჩივლონ“.
