ჯოზეფ ბორელი: საქართველოს ძლიერი ცვლილებები სჭირდება იმისთვისაც კი, რომ EU-ს კანდიდატად დარჩეს
ჯოზეფ ბორელი საქართველოზე
საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელის, ჯოზეფ ბორელის თქმით, საქართველოს ძლიერი ცვლილებები სჭირდება “იმისთვისაც კი”, რომ კვლავ ევროკავშირის კანდიდატ ქვეყნად მოიაზრებოდეს. ამის შესახებ მან უკრაინულ გამოცემა Европейская правда-სთან ინტერვიუში ისაუბრა.
როგორც ბორელმა ხაზი გაუსვა, ევროკავშირის წარმომადგენლები საქართველოს ხელისუფლებას ბოლო დროს აფრთხილებდნენ, რომ მათ ევროპული გზიდან გადაუხვიეს. მისივე განმარტებით, ევროინტეგრაციის თვალსაზრისით საქართველოსა და უკრაინას შორის მსგავსებებს ვერ ხედავს.
საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის თქმით, თუკი საქართველოს ხელისუფლებას ევროკავშირის წევრობა კვლავ სურს, რუსული კანონი უნდა გაიწვიოს, არჩევნებზე გამოვლენილი ხარვეზები უნდა მოაგვაროს და ევროინტეგრაციის გზას დაუბრუნდეს.
რა თქვა ჯოზეფ ბორელმა
“უპირველეს ყოვლისა, საქართველოსა და უკრაინას შორის ვერანაირ მსგავსებას ვერ ვხედავ. საერთოდ.
უკრაინის პრეზიდენტი და მთავრობა სრულად ჩართულია ევროკავშირში გაწევრიანებაში, ისევე, როგორც უკრაინული საზოგადოება.
ეჭვგარეშეა, რომ თქვენს ქვეყანას ევროკავშირის წევრობა სურს და უკრაინის წევრობა ევროკავშირში არის უსაფრთხოების ყველაზე ძლიერი ვალდებულება ანდა გარანტია, რომლის შეთავაზებაც უკრაინისთვის შეგვიძლია.
საქართველოს შემთხვევაში ეს ასე ნამდვილად არ არის.
ჩვენ საქართველოს მმართველებს, საქართველოს ხელისუფლებას ვეუბნებოდით, რომ ისინი ევროპულ გზას შორდებიან. თუკი ევროკავშირის წევრობა სურთ, მაშინ მიღებული კანონი უნდა გაიწვიონ, არჩევნებზე გამოვლენილი პრობლემები უნდა მოაგვარონ და ევროკავშირისკენ გზას უნდა დაუბრუნდნენ.
მათ ძლიერი ცვლილებები სჭირდებათ იმისთვისაც კი, რომ ისევ ევროკავშირის კანდიდატად მოიაზრებოდნენ.
უკრაინის შემთხვევაში კი საქმე საერთოდ სხვანაირად არის!”
7 ნოემბერს საფრანგეთის პრეზიდენტმა, ემანუელ მაკრონმა, ბუდაპეშტში მიმდინარე ევროპის პოლიტიკურ სამიტზე, მოლდოვის ახლადარჩეულ პრეზიდენტს, მაია სანდუს, არჩევნებში გამარჯვება მიულოცა, ამავე სამიტზე მყოფ საქართველოს პრემიერს, ირაკლი კობახიძეს კი არა.
სიტყვით გამოსვლისას მან საქართველოში შექმნილი პოლიტიკური ვითარება გააკრიტიკა და იმედი გამოთქვა, რომ “საქართველო გააძლიერებს თავის ევროპულ არჩევანს”
ასევე, საფრანგეთის პრეზიდენტი ემანუელ მაკრონი, გერმანიის კანცლერი ოლაფ შოლცი და პოლონეთის პრემიერმინისტრი დონალდ ტუსკი საქართველოში არსებულ პოლიტიკურ ვითარებასთან დაკავშირებით ერთობლივ განცხადებას ავრცელებენ და გამოხატავენ შეშფოთებას საქართველოში ჩატარებულ არჩევნებზე.
“ჩვენ მოვუწოდებთ არჩევნებთან დაკავშირებულ დარღვევებზე ყველა საჩივრისა და ცნობის სწრაფ და გამჭვირვალე გამოძიებას და სიფრთხილით გამოვიკვლევთ საერთაშორისო სადამკვირვებლო მისიის ბოლო ანგარიშს, რომელსაც მოგვიანებით ველოდებით.” – წერია განცხადებაში.
