ამას არ უნდა შევეგუოთ - "ჯემნიუსის" განცხადება "ბათუმელების" დირექტორის, მზია ამაღლობელის დაკავებასთან დაკავშირებით

ჯემნიუსის განცხადება სოლიდარობა მზია ამაღლობელს

„ბათუმელებისა“ და „ნეტგაზეთის“ დამფუძნებელი და დირექტორი, მზია ამაღლობელი 12 იანვარს ბათუმის პოლიციის მთავარ სამმართველოსთან გამართულ ხალხმრავალ აქციაზე დააკავეს.

პროპაგანდისტული ტელეკომპანია „იმედის“ მიერ გავრცელებულ უხმო კადრებში ჩანს, რომ მზია ამაღლობელი სახეში ხელს არტყამს პოლიციის უფროსს, ირაკლი დგებუაძეს. თავად ჟურნალისტმა სახალხო დამცველის წარმომადგენელს უთხრა, რომ დაკავებამდე სამართალდამცავები ძალიან უჭერდნენ ხელზე, რის გამოც ხელი ძლიერად აიქნია და უნებურად პოლიციელს მოარტყა.

ეს ინციდენტი პოლიციაზე თავდასხმად შეფასდა, რის გამოც მზია ამაღლობელს 4-დან 7 წლამდე პატიმრობა ემუქრება. სწორედ ასეთ სასჯელს ითვალისწინებს სისხლის სამართლის კოდექსის 353-ე პრიმა მუხლის პირველი ნაწილი, რაც ამაღლობელს წარედგინა.

როდესაც ამას ვწერთ, მნიშვნელოვანია გავიაზროთ კონტექსტი – 28 ნოემბრიდან დღემდე ჯამში 500-ზე მეტი ადამიანი დააკავეს და თითქმის ყოველ მეორეს ფიზიკური დაზიანების კვალი ეტყობა, წერია სახალხო დამცველის ანგარიშში. დაკავებულები დაუჯერებელ ისტორიებს ჰყვებიან. მათ მიმართ განხორციელებულ ქმედებებს უფლებადამცველები, მათ შორის სახალხო დამცველი, წამებად აფასებენ. ნაცემია 70-ზე მეტი ჟურნალისტი, მათგან რამდენიმე რეალურად სასწაულით გადაურჩა სიკვდილს და ამას ხალხი პირდაპირ ეთერში ადევნებდა თვალს.

ამ დრომდე არც ერთი (!) ამ ფაქტის გამო, არც ერთი სამართალდამცავის წინააღმდეგ საქმე არ არის აღძრული. არ არიან დაკავებული არც პროსახელისუფლებო ტიტუშკები, რომლებმაც სასიკვდილოდ გაიმეტეს ტვ პირველის ჟურნალისტი მაკა ჩიხლაძე და მისი ოპერატორი. არავინაა დასჯილი გაზაფხულზე “რუსული კანონის” წინააღმდეგ აქციების დროს სასტიკად ნაცემი აქტივისტების და პოლიტიკოსების გამო.

მზია ამაღლობელის აღკვეთის ღონისძიებაზე სასამართლო 14 იანვარს იმსჯელებს. პროკურატურა მის წინასწარ პატიმრობაში დატოვებას ითხოვს.

კადრებზე, სადაც ჩანს მზიას დაკავების მომენტი, ვხედავთ, რომ ჟურნალისტი ქალი პოლიციელებს უხეშად მიჰყავთ. ისმის გინება და მუქარა. დაკავებიდან რამდენიმე საათის განმავლობაში მასთან არ შეუშვეს ადვოკატი, რისი უფლებაც არ ჰქონდათ. ჟურნალისტი აცხადებს, რომ დაკავების შემდგომ მის მიმართ არასათანადო მოპყრობა გამოიჩინეს.

ჩვენ, “ჯემნიუსის” რედაქტორებსა და ჟურნალისტებს ძალიან რთულ რეგიონში გვიწევს მუშაობა. ზოგიერთ ქვეყანაში ჩვენს ავტორებს და რედაქტორები ფსევდონიმით უწევთ მუშაობა. ჩვენ გვყავს თანამშრომლები, რომლებსაც სახლში ჩალაგებული ჩემოდნები უდევთ, რადგან არასოდეს იციან, როდის მოუწევთ ქვეყნიდან გაქცევა მათი ჟურნალისტური საქმიანობისთვის სახელისუფლებო დევნის გამო.

ჩვენ გულუბრყვილოდ გვჯეროდა, რომ საქართველო არასოდეს აღმოჩნდებოდა ამ ქვეყნების რიცხვში. თუმცა, ბოლო წლებმა დაგვარწმუნა, რომ ასე არაა.

მზია ამაღლობელის დაკავება კიდევ ერთი შემაძრწუნებელი მაგალითია იმისა, თუ როგორ იყენებს ივანიშვილის რეჟიმი სამართლებრივ ინსტიტუტებს კრიტიკული ხმების გასაჩუმებლად.

„ბათუმელები“ ერთ-ერთი ყველაზე ხანდაზმული მედიაა დღეს არსებულ ქართულ ელექტრონულ მედიებს შორის. ის 2001 წელს ასლან აბაშიძის აჭარაში დაარსდა და ათწლეულებია, რაც სიმართლის ხმაა არა მარტო აჭარაში, არამედ მთელ საქართველოში. ჯერ კიდევ ასლან აბაშიძის მმართველობის დროს, ეს გაზეთი იყო ერთ-ერთი პირველი, ვინც გაბედა რეჟიმის წინააღმდეგ ბრძოლა.

დღეს, ისტორია მეორდება: რეჟიმები იცვლება, კრიტიკული მედიის დევნის ტენდენცია – არა.

წლებია „ბათუმელების” თამამი, უკომპრომისო მასალები საზოგადოებას უყვება კორუფციის, ნეპოტიზმისა და სოციალური უსამართლობის შესახებ. ჟურნალისტური საქმიანობის გამო “ბათუმელების” თანამშრომლების სიცოცხლე და უსაფრთხოება არაერთხელ დამდგარა რისკის ქვეშ.

ჩვენ, “ჯემნიუსის” თანამშრომლებს, გვჯერა, რომ მხოლოდ ერთიანი ძალისხმევით შეიძლება დავიცვათ თავისუფალი მედია და შევინარჩუნოთ დემოკრატიის შანსი საქართველოში.

ამ სიტუაციაში მნიშვნელოვანია საერთაშორისო თანამეგობრობის, ჟურნალისტების და სამოქალაქო საზოგადოების მხარდაჭერა.

მნიშვნელოვანია, რომ არ შევეგუოთ მედიის და თავისუფალი სიტყვის შევიწროებას.

მზია ამაღლობელი არ არის პირველი და, სამწუხაროდ, შესაძლოა, არც უკანასკნელი, ვინც ივანიშვილის რეჟიმის ხელში უსამართლობას შეეჯახა.

მაგრამ, მნიშვნელოვანია, რომ ასეთი შემთხვევები არ უნდა იქცეს სტატისტიკად, რისი მაგალითებიც გვაქვს მეზობელ აზერბაიჯანში, ასევე რუსეთში, ბელარუსში, ცენტრალური აზიის ქვეყნებში.

ეს არის ბრძოლა არა მხოლოდ ერთ ადამიანის თავისუფლებისთვის, არამედ მთელი საზოგადოების თავისუფლებისთვის.

დაუყოვნებლივ უნდა გათავისუფლდეს ჟურნალისტი მზია ამაღლობელი!

სოლიდარობა „ბათუმელებს“ და “ნეტგაზეთს”, სოლიდარობა მზია ამაღლობელს! მათი ბრძოლა ჩვენი ბრძოლაა. ეს არის ბრძოლა საქართველოს მომავლისთვის.

“ჯემნიუსის” რედაქცია