იუსტიციის უმაღლეს საბჭოში ანა დოლიძე თამარ ღვამიჩავამ შეცვალა
იუსტიციის უმაღლესი საბჭოს არამოსამართლე წევრად საქართველოს პრეზიდენტის, სალომე ზურაბიშვილის განკარგულებით თამარ ღვამიჩავა დაინიშნა. მან ამ პოზიციაზე ანა დოლიძე ჩაანაცვლა, რომელმაც თანამდებობა 22 ივნისს დატოვა.
თამარ ღვამიჩავა სამართლის დოქტორი და თსუ-ს იურიდიული ფაკულტეტის ადმინისტრაციული სამართლის მიმართულების ასისტენტ-პროფესორია.
მას სახელმწიფო უნივერსიტეტში აკადემიური საქმიანობის 15 წლიანი გამოცდილება აქვს.
“მიმაჩნია, რომ ჩემ მიერ შერჩეული კანდიდატი აკმაყოფილებს ამ თანამდებობისთვის საჭირო მთავარ მოთხოვნებს: დამოუკიდებლობას, თავისუფალ აზროვნებას, პროფესიონალიზმს. ის არის და დარწმუნებული ვარ, იქნება, სრულიად დამოუკიდებელი,”- აღნიშნა პრეზიდენტმა ზურაბიშვილმა ღვამიჩავას წარდგენისას.
იუსტიციის უმაღლესი საბჭოს არამოსამართლე წევრი, ნაზი ჯანეზაშვილი მიიჩნევს, რომ პრეზიდენტის მიერ მიღებულ გადაწყვეტილებას იუსტიციის საბჭოში არამოსამართლე წევრის პოზიციაზე თამარ ღვამიჩავას დანიშვნის შესახებ მეტი დასაბუთება სჭირდება.
„ამ ადამიანის შესახებ პირადად მე ინფორმაციას არ ვფლობ. ერთადერთი, რისი თქმაც შემიძლია ისაა, რომ ის სამოქალაქო საზოგადოებაში აქტიური არ ყოფილა. ასევე ვწუხვარ, რომ პრეზიდენტის მიერ ჩატარებული კონკურსი ვერ აკმაყოფილებდა გამჭვირვალობის მინიმალურ სტანდარტებსაც კი. დღემდე არ ვიცით, ვინ იყვნენ კანდიდატები და რატომ გააკეთა არჩევანი კონკრეტულად ღვამიჩავაზე საქართველოს პრეზიდენტმა, რა დამსახურების თუ გამოცდილების გამო ამჯობინა ის სხვებს – ეს ინფორმაცია მნიშვნელოვანი იქნებოდა,“ – ამბობს ჯანეზაშვილი.
იუსტიციის უმაღლესი საბჭოს არამოსამართლე წევრად თამარ ღვამიჩავას დანიშვნის შესახებ განკარგულება საქართველოს პრეზიდენტმა უკვე გამოსცა. კანონის თანახმად, თამარ ღვამიჩავა არამოსამართლე წევრის პოზიციაზე 4 წლით იმუშავებს.
